BB習慣坐喺度玩，一瞓低佢就大喊，點做好呢?
有媽咪問
「 BB慣咗要坐喺度玩，但佢又未識得自己坐起身，放佢喺軟墊瞓低會即刻大喊抗議，咁點樣可以做到床上入睡呢？」
你嘅觀察非常正確呀，日頭清醒時嘅活動習慣，對睡眠都會有影響㗎！
好多時我哋都會諗住畀BB練坐係幫緊佢。但其實，專門研究嬰兒動作發展嘅匈牙利兒科醫生Emmi Pikler指出，咁做反而會妨礙到BB嘅發展，令佢跳過一啲好重要嘅發展里程碑，例如爬行呢個對大腦發展非常重要嘅動作！
伸延閱讀：Sitting Babies Up – The Downside
咁點樣可以令BB習慣返瞓低嘅姿勢呢？RIE育兒法資深導師及代言人Janet Lansbury 建議過一個做法：
先同BB溝通
首先，放低BB之前要同佢預告一聲，然後再慢慢放低佢，記得要溫柔啲，再坐喺佢身邊。
BB習慣坐喺度玩，瞓低時覺得唔對路會發出不滿嘅聲音，呢個時候你可以同BB講吓嘢先，用RIE稱之為「sportcasting」嘅方式，同佢講：「我見到你似乎唔係好舒服... 唔係好開心咁...」
講嘅時候要保持冷靜，千祈唔好諗住「唉... 唔work喎... 喊到咁...」全心全意陪住BB，同佢進行對話，對佢啲哭泣作出回應，表示你明白佢嘅感受。可以點頭，摸吓BB，同佢講「我知道...我明白...」
你甚至可以瞓埋喺BB隔離都得㗎！
如果過咗一陣BB仲係抗議緊嘅，就問吓佢要唔要抖抖，張開手問佢要唔要抱。畀啲時間佢回應，當你明白佢想你抱（例如張開雙手），就可以慢慢抱起佢，抱一陣傾一陣計，等佢平靜返就同佢講畀佢聽，你會放返低佢，跟住再次溫柔地慢慢放低BB喺地下。
如是者重覆幾次，慢慢畀BB適應瞓低嘅姿勢，就可以瞓耐啲㗎嘞！
記得除咗食飯時，其他時候要避免協助BB直接坐起身，畀多啲機會佢自由活動。
咁樣做，至能夠畀BB遵循返自然嘅肢體活動發展里程碑，令佢有足夠機會練習自己坐起身，以及其他活動技能，鍛鍊BB嘅毅力，並增強自信心。
培養BB嘅獨玩能力
當BB習慣咗瞓喺地下，你唔駛成日撩佢玩水㗎！畀佢自己周圍望吓，自己玩吓，佢望住你至同佢打個招呼，再等佢initiate想同你有進一步互動。
容許佢由細開始練習independent play係好重要嘅一步，第日大個啲至唔會下下要你陪玩甚至不斷咁entertain佢，唔識自己玩。而且，對於BB嘅專注力同創意，亦有好大益處。
想BB得到足夠嘅安全感，我們需要做嘅係好好去理解佢嘅性格以及需求，提供恰當並且一致嘅回應，令佢覺得被愛與被明白，咁至能夠建立一個緊密嘅親子關係㗎！
「如何回應孩子哭泣」免費工作坊
