識得自行入睡就唔會再夜醒大喊? 呃人架!

冇BB會真正「一覺瞓到天光」。

唔單止BB，就算係小朋友，或者成年人，technically都唔會一覺瞓到天光。

所有BB都會夜醒，分別只係在於醒咗佢識唔識得自己瞓返。

咁究竟點樣至能夠BB夜醒識得自己瞓返呢？

喺一項橫跨17個國家，一共涉及超過29,000個BB嘅研究，以及好多其他研究都一致指出，當BB入睡時冇需要依賴大人嘅幫助，咁夜醒就能夠有更大機會能夠自己瞓得返。

而如果BB入睡時需要協助，例如抱睡、搖睡、奶睡、車睡、孭睡、拍睡、拖(手)睡等等... 當呢啲情況成為入睡條件，自然夜醒都好難會可以自己瞓得返（月齡越大依賴越大）

所以，你見坊間好多資料，甚至有睡眠顧問會同你講 - 只要BB識得「自行入睡」，咁就自然唔會再夜醒大喊，可以一覺瞓到天光...

唔係囉！

我見過好多case，無論係能夠自然入睡，定係做咗睡眠訓練都好，就算BB識得自行入睡，夜醒都一樣會大喊，要人抱、拍，甚至餵奶至瞓得返。

所以，唔好諗住咬牙忍住，只要由得BB爆喊一兩個鐘，佢自然就唔會再夜醒大喊！

好有可能，你BB爆喊足一個月，都繼續會夜醒早醒自己瞓唔返㗎

我見過，真係見過。唔止一個兩個，係好多個都係咁...

就算係環境已經夠黑、BB已經食飽、日間小睡情況理想、就寢時間喺8點前，都一樣有可能會夜醒大喊。

「自行入睡」只係將BB能夠自己瞓返嘅機會提高，但不等如就能夠解決夜醒問題。

所以，我真係好想好想同大家講，唔好將「自行入睡」呢回事睇得咁大，因為其實幅砌圖仲有好重要嘅一個部份，好多人都會忽略咗…

研究資料來源：Alice Callahan, PhD, "The Science of Mom" 作者