親餵母乳嘅BB半夜係咪一定醒得密啲?

好多人都話，餵人奶嘅BB，夜晚會醒得密啲，亦會遲啲至戒到夜奶...

究竟係咪真嘅呢？

英國曾經有一項研究，錄低BB喺5周大及3個月大時，夜晚瞓覺嘅情況。

研究發現，所有BB半夜都會夜醒。

四份之一BB唔需要大人嘅協助，都可以自己重新入睡。

大部份BB都冇喊就自己瞓返，其餘BB都只係郁郁吓發出聲音，或者喊咗1分鐘左右就已經瞓得返。

更早前一個研究更加發現，有接近50%BB喺3個半月大時，夜醒都能夠自己瞓返，完全唔駛人幫。

另外亦有研究指出（係，睡眠相關嘅研究其實一直都有好多），當BB喺3個月大時，能夠有幾分鐘時間去嘗試自己瞓返，佢哋去到12個月大時，能夠一覺瞓到天光嘅機會高咗好多！

除此之外，英國嘅研究亦發現，有68%嘅BB喺3個月大時，已經能夠連睡5小時（呢個年紀其實已算係一覺瞓到天光，有機會再講）。

而呢個比率，無論BB係親餵或食配方奶都冇分別。

呢個月齡嘅BB，有62%能夠自己啜手指自我安撫入睡添！

所以，無論親餵定配方奶，本身對BB嚟講其實冇乜分別。

但係，對媽咪嚟講就唔同嘞！

上面3個研究都指出，只要畀機會BB，佢哋夜醒時係有好大可能自己瞓得返嘅。

之不過，因為親餵太方便，於是好多媽咪慣咗一見BB有動靜，就立即塞奶...

BB越嚟越大，開始會對入睡方式形式依賴。

久而久之，就會失去咗自行入睡嘅本能，需要有一定條件（啜奶）至可以瞓得返。

相反嚟講，因為準備配方奶需時，而且大人半夜走出房沖奶嘅意欲亦好低，自然就比較少BB會有夜奶頻繁嘅問題嘞。

所以，希望BB瞓得好，最重要嘅其實係我哋大人對BB嘅回應方式。

BB會從我哋對佢嘅回應方式中學習，成為佢哋自己嘅習慣及偏好㗎！

研究資料來源：Alice Callahan, PhD, "The Science of Mom" 作者