你會唔會開睡眠顧問證書課程啊？
最近收到一啲邀請，出席頒獎典禮：
「最可信賴嬰幼兒睡眠顧問」
「年度最傑出本地嬰幼兒睡眠顧問」
嘩！收到第一封email時好驚喜㗎！
不過望望下...
原來要畀錢㗎!!
原來係一盤幫你做PR嘅生意，仲要係好多錢$$$$$…
其實我都有諗過，當畀錢搵人幫我做條pro啲嘅宣傳片。
尤其是，攪完啱啱場免費工作坊後，知道自己喺marketing上真係嚴重不足 （但準備講座同開live我都好enjoy ）
賣廣告或其他宣傳工作，完全係我嘅弱項...
我一向都係靠媽咪爹哋口耳相傳嘅推介，令多啲家庭認識到Dolce Sleepers。
咁老實講一開始我都只不過係想搵返少少尿片錢（而家開始要儲錢畀孖仔交學費 ），Dolce Sleepers對我嚟講唔係一盤生意，所以其實都唔係真係有需要做好多宣傳...
但同時間好茅盾嘅係，follow咗Dolce Sleepers一段時嘅媽咪爹哋或者會記得，我曾經出過一篇文章 -- 「一個唔想只係做睡眠顧問嘅睡眠顧問」
我嘅願望，係推廣健康睡眠 及RIE育兒法，我好想好想改變一般人對BB，對睡眠嘅睇法。
所以，我係以接觸到最多人嘅目標去做，而唔係每個月接到幾多單，賺到幾多錢咁樣去諗...
講遠咗嘞…
最後都係決定唔畀錢，因為呢啲所謂嘅獎項只係虛名（尤其是其實係畀錢買獎，好冇意義囉！）
Dolce Sleepers嘅聲譽，唔需要靠呢啲門面嘢去堆砌嘅，係咪先？
係咪最可信賴，相信喺各位媽咪心中有數。
最後講多幾句，上次講座結尾有媽咪問我，有冇打算開個證書課程，教人做睡眠顧問。
自問，仲未有呢個資格…
外國有公信力嘅證書課程，攪手都係有十年以上嘅經驗，處理過唔知幾千個case。
BB唔係機械人，所以顧問嘅經驗好重要，要識得搵出睡眠問題嘅真正原因，而唔係純粹試晒唔同方法，得就得唔得就算咁...
DolceSleepers獨門心法 嘅重點係觀察、瞭解、尊重，同相信BB。
因為我嘅做法，係基於 RIE育兒法，所以要知道嘅嘢，比一般睡眠顧問證書課程會讀嘅嘢其實深入好多。
雖然我都有經驗幫Teamstork 送子鳥團隊做培訓，但初生BB嘅情況始終冇咁複雜。
而且，親身同媽咪爹哋傾佢哋BB嘅情況，同我教人點樣去處理一個case，中間亦有好大分別。
所以，暫時都唔會諗攪證書課程嘞...
不過，呢幾日同一啲相熟嘅媽咪傾計，有個諗法好想做，都係香港而家未有嘅嘢（唔知點解成日做開荒牛挑戰自己 ）
希望能夠盡快實行，請大家密切留意住啦！
☆☆☆
嬰幼兒睡眠顧問 Catherine
全港首位本地嬰幼兒睡眠顧問 ‧ RIE育兒法專業課程畢業生 ‧ 孖仔媽媽
網上課程 / 電話諮詢 / 免費資源分享
