轉小童床，會瞓得好啲嗎?

有媽咪問：「應該幾時轉小童床？我囝囝而家歲半，最近成日唔肯瞓覺，轉小童床會唔會合作啲呢？」

千祈唔好因為見小朋友唔願上床瞓覺，而貿貿然轉床呀！

咁樣做，唔單止無助解決睡眠問題，仲會導致入睡困難同夜醒㗎

一般嚟講，3歲前嘅小朋友都未能夠有足夠嘅自控能力，留喺自己張床上面。而且，冇咗一個見得到嘅physical boundary，有可能令佢反而唔能夠安心入睡，半夜亦會醒咗瞓唔返...

咁應該幾時至轉小童床呢？

— 接近3歲，或至少2.5歲
— 小朋友已經習慣留喺自己張床上瞓覺
— 冇發生緊睡眠問題
— 有危險顧慮

危險顧慮嘅意思，係指小朋友識得自己離開張床。

注意一般爬出床嘅行為，其實仲可以有方法去阻止嘅，例如著睡袋限制住小朋友嘅活動能力，同埋拎走晒床上可以用嚟踏腳嘅物品。如果張嬰兒床有一邊喺高啲嘅話，亦可以掉轉方向。

只不過，如果你囝囝囡囡係一位小泰山

請立即轉床，或者拎走張床，將床褥放喺地下啦！

注意，有啲人會建議留低嬰兒床架，但拆走個底，將床褥放地下。由於未能肯定冇咗個底張床仲係咪穩陣，為免發生意外，我唔建議咁樣做。

嬰兒床其實對小朋友同媽咪爹哋嚟講都係「好物」，用得越耐就越好，唔駛急住轉小童床㗎！

最後，其實仲有一點非常重要：

小朋友有冇要求轉小童床？

如果你囝囝囡囡安心瞓喺嬰兒床入面，又冇安全顧慮，咁就唔好攪咁多嘢，搵著自己嚟攪啦！