10大睡眠誤解(下)
嬰幼兒睡眠，可能係令新手父母最頭痛嘅事。
原因係一般人對點樣令BB瞓得好有太多誤解，諗住跟一兩個貼士，就會一天都光晒。
殊不知，亂咁試反而令BB瞓得越嚟越差...
因為，希望BB瞓得好，係需要全面去睇，全面去做調整。
而首先，必須要對嬰幼兒睡眠有正確嘅認識。
上星期，同大家分享咗５個常見誤解，今日繼續講埋其餘幾點（所有斜體字都可以click，睇返相關嘅文章）：
6. 唔可以畀BB趴睡
好多時，當BB開始識得翻身，大人因為擔心BB透唔到氣, 不斷將佢反返轉，跟住佢又翻返過去... 結果大人成晚提心吊膽唔敢瞓得耐，BB不斷被騷擾亦無法瞓得好。其實，只要跟足安全指引，你係可以由得BB趴睡㗎！雖然有兒科醫生話BB頭一年都唔可以趴睡，但其實，有時醫生對嬰幼兒睡眠都未必好瞭解...
7. 越早戒夜奶越好
「幾時可以戒夜奶？」係好多媽咪都想知道嘅問題，似乎戒咗夜奶BB就自然會瞓得好... 其實，當BB生理上唔再需要嘅時候，就自然會停止夜醒討奶，身體自然會選擇瞓到飽為止。重點係我哋唔好令BB養成一定要食奶要瞓得返嘅習慣。點樣判斷BB真係需要食，定只係習慣要食甜品奶呢？呢篇文章話你知
8. 同大人一齊瞓就會瞓得好
BB一晚醒幾次，晚晚都要起身安撫，係一件好攰嘅事，好多媽咪爹哋會喺不情願嘅情況下，抱BB去大人床一齊瞓。好彩嘅話，BB冇醒得咁密，但就成晚起飛腳，大人結果都係冇覺好瞓。更壞嘅情況係，BB繼續不斷夜醒，雖然唔駛起身安撫，但同樣都瞓得唔長... 所以，唔好諗住同床就能解決所有睡眠問題，呢個好多時只係治標不治本嘅方法。當然,每個家庭有唔同嘅情況，家長嘅育兒觀亦可以有好大分別。喺考慮係咪應該同囝囝囡囡一齊瞓時，要先諗諗呢３點
9. 日頭放多啲電
成日聽到有人「教路」，話只要放晒啲電小朋友就會瞓得好。咁樣做，雖然可能有助入睡，但亦可能會令佢哋過度疲勞，令體內壓力荷爾蒙水平過高，結果造成反效果，因為無法銜接睡眠週期而頻頻驚醒。Click呢度再瞭解多啲
10. 日頭瞓少啲
最後，亦係最「靠害」嘅一個誤解，就係叫人日頭唔好畀BB瞓咁多，咁夜晚就自然會可以一覺瞓到天光。BB嘅適應能力好強，如果日頭真係冇得瞓覺，佢會自然夜晚怒瞓補返，但係咁並非健康嘅做法，長遠對BB嘅發展亦會有影響。因為，瞓覺唔係淨係為咗恢復體力，亦係大腦好活躍嘅時期，忙於鞏固記憶，對BB嘅學習能力非常重要。而且，全日勁攰冇得瞓，BB心情亦唔會好，好易會大喊發脾氣，或者要痴住人尋求安撫，對親子關係亦可能會造成影響... 如果你BB嘅睡眠時數遠比建議時數少，可以留意呢幾點
最後，都想講吓，一個好多媽咪爹哋都有嘅疑問...
每個BB都係獨一無二嘅，每個家庭嘅情況亦有所不同。所以我知道好多媽咪爹哋都會覺得，搵睡眠顧問要單對單先真係幫到
但其實，就算係搵睡眠顧問幫手畀意見，落手落腳照顧BB嗰個，都係媽咪爹哋你哋。而且，你哋亦係最瞭解BB嗰個。
如果只係諗住靠睡眠顧問話你知點做，但自己唔識得去搵出原因同諗吓點處理的話，其實成件事會困難好多。
更何況，睡眠顧問只能幫你解決一時三刻嘅問題，長遠嚟講都係需要照顧BB嘅大人，識得點樣去處理唔同嘅情況至得。
因為，BB喺唔同階段，都會自然出現唔同嘅睡眠問題，所以唔係而家攪掂咗，就可以一直安枕無憂㗎
呢個係我設計 睡眠調整全面睇 嘅原因之一，內容由6個月一直講到3歲，協助你成為你囝囝囡囡嘅睡眠專家
如果你想知道更多有關課程嘅資料，歡迎瀏覽 Dolce Sleepers 網站
www.dolcesleepers.com
☆☆☆
嬰幼兒睡眠顧問 Catherine
全香港首位本地嬰幼兒睡眠顧問 ‧ RIE育兒法追隨者 ‧ 孖仔媽媽
