如何選擇最合適的睡眠顧問

2年前（2019年）香港冇人講嬰幼兒睡眠，到今日(2021)已經有至少5位本地睡眠顧問，我知道仲有2位媽咪讀緊個睡眠顧問課程添（點解我知？因為佢哋同我講囉！）

多咗咁多新人入行，係一件好事！

覺得Dolce Sleepers啱佢嘅媽咪爹哋，自然會搵我幫手。有猶豫嘅，睇多幾個顧問嘅offer再決定，亦係應該嘅（現時我知active嘅有5位）

咁點樣揀選最合適嘅睡眠顧問呢?

之所以我話「最合適」，係因為每個顧問都會有佢自己一套方式/風格，所以建議你要先問吓自己，到底需要啲乜嘢，然後再諗邊個顧問可以滿足到你嘅需要

因為，每個人做事方式都唔同，有啲人鍾意自己研究同去嘗試，唔鍾意有人成日問長問短; 有啲人就想每一步都有人帶住，隨時有問即答。

如果你正打算搵睡眠顧問幫手，可以考慮以下幾點：

1) 有列明認證資格嘅頒發機構

嬰幼兒睡眠顧問呢行，暫時嚟講係冇管制嘅，所以任何人都可以話自己係顧問。而要畢到業拎張證書，其實難度亦好低。之不過，有列明認證機構，應該對嬰幼兒睡眠都有基本認識。但要注意一點，就係讀咗書，都唔代表識得運用啲知識。

2) 過往經驗

要令BB瞓得好，雖然大部份顧問都有一致嘅方向（避免疲勞過度，營造好安睡環境等），但要真正解決到BB嘅睡眠問題，其實喺執行上都有好多種方法。係咪能夠視乎每個BB及家庭嘅獨特性，去作出相應嘅建議，就好睇顧問本身有冇足夠嘅經驗，判斷到睡眠問題嘅真正原因，並且會同你深入細致去講解每一步嘅做法，而唔係只識得人人都畀同一樣嘅「建議」。

3) 願意去尋根究底

嬰幼兒睡眠喺香港仍然好新，所以如果你搵本地顧問，經驗方面一定冇外國顧問咁豐富。只不過，冇做過唔代表唔識做，最重要係願意認真對待每一個case，肯去尋根究底。而且，要累積經驗，唔係只能夠靠接case。例如，我喺讀個顧問課程之前，已經加入咗好幾個外國嘅睡眠及育兒群組，刨咗2年文，所以而家同媽咪傾電話時，好多情況就算自己冇經歷過都已經有聽聞過，亦都儲儲埋埋好多貼士，隨時可以派上用場。

4) 個人化計劃書

點知道個顧問有幾認真去對待每個case呢？你可以問吓，佢會唔會為你編寫一份個人化睡眠計劃書，一或只係你問佢就答，冇全面去審視你同BB嘅情況，提供一套完整嘅睡眠計劃。仲有就係，出咗計劃書後，仲會唔會繼續做調整，提供進一步建議。

5) 同時接咗幾多個case

呢點應該好易明 -- 如果個顧問同時要處理好多個case嘅話，自然分配唔到咁多時間畀每一個家庭，成效亦會受影響。呢點亦係我整網上課程嘅原因，因為我知道自己每個月最多可以接幾多個case，至能夠確保提供到足夠嘅支援，又唔會令自己太吃力。所以，如果你需要貼身支援，可以考慮搵新入行嘅睡眠顧問，佢哋未必同時要處理好多個case，自然能夠畀到更多時間你，亦應該會更有心機去跟貼啲。

6) 幫你管理期望 / 唔會誇下海口

如果個顧問同你講，只要做睡眠訓練就能解決一切問題，甚至話一定要做睡眠訓練至得，咁我會建議你諗諗先... 睡眠訓練並非萬能，BB識自行入睡亦不代表唔會夜醒大喊。單單睇入睡方式，並唔足夠。而且，進行訓練時可能會出現點樣嘅情況，作為顧問亦有責任預先同客戶做好心理準備。

7) 育兒觀 / 性格

絕大部份睡眠顧問自己本身都係一位媽媽，自然有佢自己一套做法及育兒觀。你可以留意吓佢哋嘅專頁，特別係當佢講有關睡眠訓練，以及睡眠以外嘅其他話題時，你覺得啱唔啱聽呢？例如有媽咪同我講，一般坊間所用嘅睡眠訓練方式，佢覺得都冇顧及到BB嘅情緒及需要，直至搵到Dolce Sleepers，即刻叮一聲通晒。相反，如果你只希望得到一條好易執行嘅方程式，唔駛考慮咁多嘢嘅話，咁Dolce Sleepers就未必適合你。

8) 價錢冇關係

BB瞓得好，全家都會有翻天覆地嘅轉變。所以，無論係幾百定幾千，其實都抵到爛 而且，睡眠顧問呢行仲好新，其實未有一個真正嘅行價。平唔代表差，貴唔代表好。所以，可以睇返你自己能夠負擔到嘅費用作為決定因素之一。

9) 口裨

最後，當然都要留意推薦文嘅內容。除咗成果之外，過程中所面對嘅問題及掙扎，仲有所得到嘅支援，同埋對顧問所用到嘅形容詞，都可以畀到一個大概嘅印象你。

☆☆☆

正向睡眠顧問 + 孖仔媽媽 Catherine
全港首位本地嬰幼兒睡眠顧問
RIE育兒法專業課程畢業生
PET父母效能訓練課程畢業生
網上課程：www.dolcesleepers.com/courses
電話諮詢：www.dolcesleepers.com/services