唔理佢就會自己瞓到天光?
「 啲人話，想囝囝囡囡唔再夜醒，半夜就要由得佢喊... 我試咗幾次，但次次都係嘔奶收場，因為如果佢醒咗時，我唔理佢，佢就會失控大喊喊到嘔...」
呢啲就係知啲唔知啲嘅建議囉...
如果個BB一向需要依靠抱睡或奶睡，半夜醒咗又點會突然識得自己瞓呢？
6個月前都仲有可能嘅，因為嗰時BB對入睡方式未形成依賴，而且睡眠驅力高，體力低，加上銜接睡眠周期時，好多時都會郁吓嗌吓，但其實未真係醒咗。所以我哋一般會建議等等先，睇定啲至去作出回應。
但係，大個啲機會就會低好多好多囉！
當BB需要靠你抱佢搖佢拍佢抱住佢行嚟行去畀佢啜住至瞓到（下刪其他十八萬種方法），佢半夜醒咗，好多時都會尋求同一個條件至瞓得返...
而且如果係因為疲勞過度而醒咗瞓唔返，佢都好辛苦... 明明見到媽咪喺度，但又唔理自己，會好驚㗎！
另一個情況係，明知喊冇人理，但嘔就會有人理，咁咪嘔囉... （見過話9個月大就已經能夠控制到令自己嘔 ）
所以，要改善夜醒，必須要從入睡方式著手。
而且需要全盤計劃至得，而唔係單單只做一兩樣嘢，就會突然瞓天光囉！（咁你日頭唔畀佢瞓，夜晚昏迷不醒都有可能嘅... ）
