加固會對睡眠造成影響嗎？

有媽咪問

「加固會對睡眠造成影響嗎？」

呢個問題，係一位已報名參加「睡眠調整全面睇」嘅媽咪喺報名表問嘅問題。

網上課程嘅重點係講解BB由6個月一直到3歲嘅睡眠發展，所以就冇提到開始加固呢個太有時限性嘅問題。

唔緊要，我喺呢度答啦！

坊間對於點樣改善BB睡眠質素嘅傳言有好多，其中一個廣為人知嘅係：

加固後，BB食得飽啲，夜晚自然會瞓得好啲

珍打媽（請讀出嚟 ）？

的確，肚餓係夜醒嘅其中一個主要原因。BB喺6個月大之前，生理上仍需要夜奶，多數要到9個月至會完全停止夜奶。

但咁並唔代表，食得飽就會瞓得好... 好可能只不過係時間上咁啱吻合而已。

美國兒科醫學會建議，在BB滿6個月大時開始加固，呢個正好係BB開始能夠夜晚連睡11-12小時嘅年紀。

此外，喺BB出生後頭一年，應該以奶為主食，未需要一開始加固就即刻代一餐奶。而且，食得太飽，其實對消化系統會造成過份負荷，反而令BB更難入睡。

最重要嘅一點係，夜醒嘅原因有好多，BB係咪能夠瞓得好，要視乎日間作息時間，以及入睡方式等因素而定。所以，就算BB食飽咗，都唔代表唔會半夜驚醒大哭㗎

有時候，加固後由於BB嘅用餐及作息時間表出現改變，奶量下降令身體吸收嘅水份不足，引致腸胃不適，甚至可能會引發食物敏感，令BB瞓得更差！

所以，加固對睡眠係好有可能有影響嘅，但就並非一般人認知咁樣囉...