停止午睡後就唔會再有夜醒?

有媽咪問：「過左清醒時間，會令BB較難入睡或者瞓得唔好，呢樣嘢其實到幾大先至會無咁明顯？係咪唔駛瞓晏覺時，夜晚就會瞓得好？」

如果你follow咗Dolce Sleepers一段時間，或者曾經PM我詢問睡眠問題，應該會知道我成日都會提到「清醒時間」呢樣嘢。

要注意一點，清醒時間係指由BB瞓醒，去到合埋眼瞓返之間嘅時間，年紀越細能支撐嘅清醒時間就越短，初生BB甚至只有45-60分鐘！

如果過咗清醒時間，BB應該要瞓但冇得瞓，大腦就會分泌皮質醇（cortisol）呢種壓力荷爾蒙，令身體能夠繼續撐落去。喺呢個時候就算你畀BB瞓，佢都唔會咁易瞓得到，甚至要等1個鐘後，壓力荷爾蒙水平下降至會瞓得著。

所以，如果你次次要氹成個鐘至瞓到，清醒時間遠遠超過標準長度，咁你BB唔係唔夠攰，而係攰得滯嘞！（尤其是當你發現囝囝囡囡黃昏時進入精神亢奮嘅狀態，大叫大笑跑嚟跑去，佢唔係未攰，係攰得滯啦！）

當BB進入疲勞過度嘅狀態，就會好難連接睡眠周期，最常見嘅情況係日間小睡會30分鐘就醒，夜晚會每2個鐘醒一次。

只不過，銜接睡眠周期嘅能力，係發展性嘅，即係年紀越大，越容易銜接得到。

答返呢位媽咪嘅問題，一般嚟講，去到2歲左右，日間小睡會自然延長，就算過咗清醒時間，都一樣可以瞓到2個鐘或更長。不過，夜晚就仍然會因為攰得滯，或者午睡時間太接近就寢時間而出現夜醒早醒（係呀，清醒時間太短都一樣有問題㗎！）

去到3歲，有啲小朋友已經唔再需要瞓晏覺，清醒時間對睡眠嘅影響就會相應下降。

但咁亦唔代表，去到3歲就唔會有睡眠問題。

3歲小朋友最少最少都要瞓到10個鐘，理想係11-12小時。睡眠時段亦好重要，夜瞓遲起身，恢復力冇咁好，並非理想嘅睡眠習慣。

如果小朋友長期疲勞過度，加上大腦經常受過度刺激（例如睇得多電視手機一類電子螢幕），甚至生活上承受住壓力（例如開始返學、戒片、成為哥哥姐姐等），就好可能會出現「夜驚」呢個情況...

半夜突然大喊尖叫，對任何安撫都冇反應，好似仍然瞓緊覺咁... （相關連結見留言）

呢個情況，甚至有可能會去到8歲…

所以，真係唔係話捱到大個就ok，長期睡眠不足，對小朋友嘅身體發展、情緒、抵抗力、甚至學習能力、專注力同記憶力都會有負面影響。

欠落嘅睡眠債，係冇得還㗎！