今日跟唔到個時間表，點算好...

好多時同啲媽咪爹哋傾佢哋囝囝囡囡嘅睡眠問題，都會發現佢哋好緊張BB每日瞓得夠唔夠， 一早制定時間表，如果某日小睡瞓少咗，就會好驚，唔知點算好。

我明，我都曾經係咁...

見其中一個仔瞓唔著或早醒，於是掉佢上車去遊車河，希望佢可以恰一恰，好過冇（我有孖仔，如果一個瞓咗一個冇瞓，作息唔同步我會亂晒 ）

我知道咁樣落去唔掂，於是慢慢摸索到處理方法，最後終於能夠睇開咗 (啲)...

而家，當我收到呢個情況嘅 ，我會話：

1) 深呼吸，保持冷靜。記住，BB唔係機械人，間唔時瞓得唔好係正常嘅，只要唔係連續幾日出現問題，咁其實唔駛擔心㗎！

2) Nap 1瞓少咗就提早Nap 2，日頭瞓少咗就夜晚早啲瞓補返，唔駛咁緊張呀！

3) 如果夜晚唔能夠早啲瞓，或清醒時間都係太長，BB可能會夜醒多啲，亦可能會早醒。預定諗定點樣處理，有需要嘅話自己都早啲瞓。做好心理準備，就可以放鬆啲啦！

4) 當BB攰得滯，反而會更難入睡。平時可以床上入睡嘅，會大喊扭抱。能夠自行入睡嘅，會大叫唔准你走... 遇到呢啲情況，可以畀多啲安撫，但必須要避免做出你之後會後悔嘅回應...

5) 最後，記住，每一日都係一個restart。就算前一晚瞓得唔好，第二日都唔好諗住畀BB瞓晏啲補返呀！否則只會亂上加亂，繼續瞓得唔好㗎咋！

瞓覺係要放鬆㗎！

你放鬆BB至放鬆到。

伸延閱讀：《長輩幫手湊BB, 跟唔到時間表 》