小朋友唔肯瞓覺，點處理好？
小朋友越嚟越大個，睡眠需要亦會逐漸下降，日頭瞓得越嚟越少… 但媽咪仲需要抖抖呀！點樣令小朋友就算瞓唔著都願意自己喺床玩呢？今集0-3歲寶寶podcast，我邀請咗Cindy媽媽，同大家分享，佢點樣處理囝囝Daniel嘅睡眠問題。
“原本囝囝已經能夠自行入睡，但18個月時出現分離焦慮，我一出房佢就不停喺度喊… 我搵Catherine幫手，決定先退一步，變返陪睡先，事先都有同佢講解返… 之後到佢穩定返，再同佢講返媽咪會出房，咁佢又ok，變返自行入睡。”
Click下面左邊嘅三角形箭咀，即能收聽（17:17）
文字版本請繼續拉到下面 👇
文字版本
Catherine：Hello Cindy。
Cindy：Hello Catherine。
Catherine：Hello 你好呀，好多謝你今日同我傾計呀。我知道Daniel而家唔經唔覺已經廿九個月，我聽你講佢開始晏覺有啲唔願瞓嘅情況，但係你又話佢都好乖，可以喺張床度攞住個公仔碌吓玩吓，玩到夠鐘，又冇話好大掙扎。相信好多媽咪爹哋都好想知道，究竟有啲咩魔法令到Daniel竟然可以留喺張床嗰度呢？
不過講呢樣嘢之前，我都想你好簡單分享一下最初你係點樣認識dolce sleepers，嗰陣時Daniel個情況係點樣嘅呢？
Cindy：一開始就係大概四至六個月左右，喺呢段時間佢就開始夜醒非常嚴重，大概兩個鐘左右佢就會喺度喊，醒一醒咁樣，所以其實嗰段時間成個人都幾攰。所以就開始上網搵資料，喺呢個過程之中就搵到dolce sleepers呢個page，就睇到好多資訊；然後都有嘗試喺你嘅post入面搵到適合自己嗰個情況，咁就照住去做，咁樣都有改善。佢一開始初生嘅時候係奶睡嘅，因為四至六個月，我都叫做比較早去接觸到睡眠方面嘅資訊，所以嗰段時間轉咗做拍睡，佢嗰個情況已經改善咗好多，同埋因為佢細個，個掙扎亦都冇咁大。之後我就都一路keep住睇你個page。
Catherine：好喇，真係改善咗、改變咗，呢個就係我好多時候講，就係床上入睡嗰樣嘢，因為好多時候一講到想BB瞓得好，好多人就直接諗到要做睡眠訓練，要令到佢自己自行入睡，咁樣就搞掂啦。但係其實嗰樣嘢，根據我嘅經驗，尤其是細個啲嘅BB嚟講，其實如果你能夠做到床上入睡，意思就係BB佢清醒嘅時候你放佢落張床嗰度，令到佢喺床嗰度瞓著覺，你陪住佢都ok嘅，絕對唔需要留低佢自己一個，其實嗰個情況已經有一個好大嘅改善。
細個啲嘅時候，呢個亦都係點解我有一個「健康睡眠工作坊」，個目的就係專為零至五個月呢一個月齡，佢哋對個入睡(方式)，例如頭先你講奶睡、抱睡嗰啲，個依賴未咁重，其實比較容易啲可以改變得到，個掙扎相對比較細。
咁你好早已經係認識到健康上面呢樣嘢，咁但係當然中途都有遇過好多其他ups and downs嘅，可唔可以又分享一下呢？
Cindy：可能去到八九個月又有一次倒退期，跟住一歲、歲半，其實都會有唔同嘅情況出現，所以都需要一路自己keep住去搵，究竟係每一次佢嗰個突然間瞓得唔好，究竟係咩事？可能係佢三覺轉兩覺、兩覺轉一覺，或者佢嗰個清醒時間，佢需要再拉長啲咁樣，呢個需要自己去再觀察、留意吓，究竟佢嗰個signal係邊一樣嘅問題，而再去調整，其實佢細個嘅時候需要不停去調整呢一個時間表。
Catherine：係呀，尤其是頭一年… 我都好記得孖仔細個嗰陣時都係，我諗住搞掂喇，搵到一個啱嘅作息時間喇，開心咗兩個星期，又開始唔啱，又要再調整，呢個係頭一年需要不斷去調整。當然呢個都要你aware到原來係會改變嘅，因為好多人就會覺得「BB攰就會瞓㗎喇，唔需要搞咁多嘢啦」，咁但係其實如果真係想BB瞓得好，同埋我哋大人都可以有覺好瞓，真係有好多好多知識上面嘅嘢，我哋真係需要學習，可以睇書又得，或者網上都有好多資訊嘅，當然睇吓你有幾多時間用心去刨吓文去認識呢樣嘢，或者可能需要多啲輔助嘅話，當然而家香港都有好多位睡眠顧問，都可以幫到唔同嘅媽咪爹哋一齊去做一個睡眠調整。
咁你都有join到「睡眠調整全面睇」嗰個網上課程，可唔可以分享吓課程入面邊一個部份你覺得係最有用，或者比較特別啲嘅呢？
Cindy：其實我覺得個課程，因為佢每一條片會逐步逐步去教我哋跟住去做、去check究竟呢個步驟有冇問題，呢度OK咁就再去下一個步驟，會好清晰、一步一步咁幫你check吓可能你冇留意到嘅地方，究竟係邊一part出咗問題而需要去調整、改善。
Catherine：呢個都係我整呢個課程嘅目的，因為好多時候大家都諗住想盡快搞掂成件事，可以一覺瞓到天光，「yeah，好開心」咁。當然有啲情況之下都可以係好快解決，但係有陣時實際上嚟講，係真係需要一步步、每一個安睡嘅因素去逐步去調整好。所以好多時候我都話要慶祝階段性勝利，即係你做好咗一點之後，你會見到個情況改善咗，譬如最簡單就可能入睡嘅時候已經順利咗，當你個時間掌握得好嘅時候，咁去逐步去做嗰個調整，同埋你知道點樣去做呢一個調整嘅時候，當BB出現一個狀況，你都會比較容易去明白到點解會發生呢件事，你會去諗有啲乜嘢係會影響到，同埋有啲乜嘢可以去做，呢個亦都係我好想同好多媽咪爹哋分享嘅一樣嘢。
好喇講返近啲，而家佢兩歲幾嗰個情況，其實你都有搵過我做單次諮詢，我記得係佢晏晝唔肯瞓覺嗰個情況。可唔可以又講吓嗰個位呢？
Cindy：佢曾經有一段時間，嗰陣係十八個月，就有一次分離焦慮。佢原本係自行入睡嘅，嗰陣我一出房佢就不停喺度喊，keep住都一兩個禮拜，佢都係唔肯瞓晏覺。
嗰一次搵你幫手，咁就退咗一步先，就去返做陪睡，事先都有同佢講解：「媽咪知道你而家唔想媽咪離開你，所以暫時呢幾日媽咪會陪住你瞓覺，到你瞓著咗之後，媽咪先會再出返去」。到佢穩定返之後，就再同佢講返：「咁而家媽咪出返去喇，你自己留喺呢度瞓覺啦」，咁佢又OK，之後又變返自行入睡。
Catherine：你同佢講返呢個改變嗰陣時，係你就咁同佢嗰日講咗，跟住就離開，咁佢ok吖，抑或你有同佢講咗幾日，畀佢做個preparation？
Cindy：其實日頭嗰段時間，我已經有同佢預先做定一啲心理準備，話畀佢聽：「一陣間瞓晏覺嘅時候，你嘗試吓自己瞓返啦，做完睡前儀式之後呢，咁媽咪就會出返去㗎喇」咁樣。即係唔係當入房嗰陣時我先話畀佢聽，而係喺佢瞓覺前一段時間已經同佢做咗一啲心理建設。
Catherine：係呀，預先做心理準備，當然Daniel佢本身係自己瞓嘅，咁所以你同佢講返出返去嘅時候，佢會安心，知道你會喺屋企陪住佢，佢比較容易接受啲。
有啲小朋友可能需要更加長啲、多幾日嘅一個預告，所以呢一個位好多時我都同媽咪爹哋講，就係唔好太心急，因為年紀越大，我哋越需要注重返小朋友心理上嘅因素，如果你太快去做，佢真係好唔ready嘅時候，個掙扎一定會大好多，結果最後你又要走返入去，甚至要做好多其他嘢去安撫返佢，咁其實個掙扎會大好多。所以預告好重要。最緊要都係RIE育兒成日講嗰樣嘢，就係你要觀察、聆聽你小朋友，了解佢嗰個需要、情況，再作出一個恰當嘅做法。所以好多時候我都唔會話「你exactly幾多日要點樣」，你真係觀察吓你個小朋友佢係咪ready呢，年紀越大，呢個位係越需要嘅。
而家講一講返，佢而家係可以自己瞓得返，但係開始佢唔瞓晏覺呢個情況，又可唔可以請你分享吓呢？
Cindy：佢大概而家差唔多兩歲半，亦都開始晏覺自己喺床，佢係自行入睡，所以就留低咗佢自己喺房入面。但係佢就整段晏覺嘅時間佢都係瞓唔著嘅，我就喺出面對自己做自己嘢，喺個cam度都睇到佢同隻公仔自己喺度玩、碌嚟碌去，等到碌到夠鐘我就抱返佢出嚟。夜晚就再提早返一個鐘畀佢上床瞓覺，補返冇瞓到晏覺呢個時間。
Catherine：我見到當中可能有一點都幾關鍵，就係你有一隻公仔畀佢、陪佢瞓覺。佢由幾時開始有呢隻公仔呢，又點樣令到佢同呢隻公仔成為朋友呢？
Cindy：大概兩歲左右，嗰陣其實屋企本身都有啲公仔喺度，之前都有嘗試畀屋企嗰啲公仔佢，睇吓佢會唔會要嚟陪佢瞓覺、攬住瞓覺。但係佢對屋企嗰啲公仔冇咩興趣，佢都唔玩佢哋。直到有一次行街，見到一隻公仔佢好鐘意，捉住唔肯放，於是我哋就買咗嗰隻公仔返屋企。跟住嗰隻公仔日頭都有陪佢喺度玩、同佢一齊玩玩具，都陪住佢，跟住就同佢講話：「呢隻公仔夜晚會陪埋你一齊瞓覺」，咁佢就好開心，每晚都攬住隻公仔瞓覺。
Catherine：係呀，孖仔而家其實五歲幾，都仍然有隻公仔陪住，陪咗佢哋好多年，已經洗咗好多次，好殘舊，佢哋仲要認到淋patpat嗰隻，有隻硬啲嘅後備，硬啲嗰隻唔要，一定要穿咗個窿嗰隻。但係嗰個真係佢哋嘅一個朋友，我覺得好重要嗰樣嘢就係，我哋真係會好想可以攞個公仔：「喂你攬呢隻公仔啦，放過我啦，唔好攬住我，等我可以郁吓啦，可以自由」，呢個好正常；當然有啲媽咪都好想攬、我都好鐘意攬住孖仔，但係我知攬住佢嘅話，佢瞓唔到，我都瞓唔到，咁呢個對大家都唔好，就唔會咁樣去做。
但係嗰樣嘢就係，我哋冇得迫個小朋友去鍾意一個公仔，同埋有一點更加重要就係，如果嗰個公仔係佢自己揀嘅話，真係佢自己去一見鍾情，搵到佢個情人，我都好記得嗰時係帶孖仔去舖頭，又係好多隻公仔中間佢就搵到嗰隻熊仔，即刻就攬住咗、好鍾意，跟住我就攞多兩個擺入shopping bag入面做後備。當佢自己去揀咗呢隻公仔嘅時候，佢嗰個接受度一定大好多。同你頭先講緊做任何改變，可能做預告呀，呢個公仔都係畀佢自己去選擇；或者好多時候越嚟越大個，我哋諗住同佢分床、分房等等都係，好多時候我都會建議你可以畀小朋友有say，畀佢做一個選擇。
對於其他受睡眠困擾嘅媽咪，你有冇啲乜嘢想同佢哋講呢？
Cindy：其實有時見到好多媽咪有唔同嘅睡眠問題，好似好茫無頭緒咁，我會覺得，首先因為每一個階段都會有唔同嘅問題出現，亦都唔係一次改善咗之後就會路路暢通，其實瞓覺呢方面真係唔係咁樣。所以我會覺得自己去了解咗呢一方面嘅資訊之後，因為始終真係每一日對住嗰個小朋友嘅其實係媽咪，亦都每一個小朋友都係一個獨立嘅個體，每一個人都唔同，就算你可能刨晒成本瞓覺相關嘅書，入面嘅資訊亦都未必完全適合晒自己個小朋友，所以真係需要去觀察，究竟佢哋需要乜嘢、邊一方面嘅改善，所以係自己要首先了解咗睡眠呢一方面嘅資訊之後，成件事都會變得好暢順。
Catherine：係呀，你講得好好，雖然我係一個睡眠顧問，我會知道好多情況點樣處理等等，但係我要畀到一個建議，我都好需要依靠媽咪爹哋畀個資料我，話畀我聽你小朋友嘅情況，越詳細嘅時候，我就越多資料可以明白到：咦，可能就係kick住喺呢一個位喎。好多時真係要電話去傾嘅時候，傾吓傾吓就會發現到原來呢一個位係咁樣情況。好多時候我做電話諮詢都係，一開始媽咪可能冇諗過呢個係一個問題，但係傾吓傾吓、我又問吓問吓嘅時候，越嚟越多資料，就會終於可以搵到個問題所在。
因為始終我哋有一個睡眠問題，一定要搵到嗰個成因先至能夠徹底解決；而唔係你純粹睇咗一本書，啲人話要咁樣做，跟呢個時間表，好啦跟啦，跟住做睡眠訓練喎，好啦做啦，但係如果欠缺咗媽咪爹哋好細心去觀察小朋友實際上嘅情況，簡單如你去定一個時間表，我成日都話：唔係話呢個月齡就要跟呢個時間表嘅，你真係有一個框架，跟咗呢個時間表做幾日之後，你睇吓究竟work唔work呢，唔work你要再去做調整，呢個真係好重要。
所以我雖然係一個睡眠顧問，但我好想做嗰樣嘢係，我真係好想幫到媽咪爹哋佢哋成為自己BB、小朋友嘅睡眠專家，令到佢哋自己知道點樣去做呢一件事，我覺得係最理想，同埋長遠嚟講先至最能夠令到嗰個家庭有覺好瞓。
Cindy：所以我覺得「睡眠調整全面睇」 其實係一個好好嘅平台，去畀佢哋自己了解咗睡眠呢一件事先，因為可能有時有啲位佢哋自己根本冇留意到係有問題嘅，咁佢哋上咗呢個課程之後，佢哋可能突然間發覺原來呢一度要改變。
Catherine：係呀，好多謝你嘅推介。我仲有好多其他想同你傾，不過一集嘅時間有限，有機會我約你再錄過第二集podcast啦。好多謝你，拜拜！
