最近有育兒平台分享一位媽媽做CIO嘅經驗

最近見 POPA Channel 一連兩日出咗篇有關睡眠訓練嘅分享文，覺得又係時候重溫呢個題目嘞

首先想講嘅係...

無論選擇做唔做睡眠訓練，用邊種方法都好，我嘅睇法都係必須尊重。

冇父母鍾意聽自己BB喊，本能係會想用盡方法令BB停止哭泣。

所以，就算選擇用 cry it out 呢個相對極端嘅做法，其他人都唔應該，亦冇資格去評論。

因為，其他人講就容易，唔駛負責任；但BB瞓得唔好，受嗰個係BB父母。

亦請唔好用自己都冇覺好瞓去比。

每個人受睡眠不足嘅影響程度都唔同，當察覺到自己已經function唔到，影響到同BB及伴侶之間嘅關係，咁就唔只係「犧牲睡眠」咁簡單。

嚴重嘅話，甚至會令產後抑鬱嘅情況惡化... 可以係一件好危險嘅事，影響亦係非常深遠。

講返篇文...

其實我睇完嘅第一個諗法係... 究竟呢位媽咪寫出嚟嘅目的，係想叫人唔好做CIO，定係想話做咗其實都冇負面影響呢？

因為，特別係下篇嘅內容，所用嘅字眼都非常負面，但係結尾又話BB瞓得玩得，令人覺得好矛盾...

又或者應該話，呢位媽咪其實自己都好矛盾...

當然，我諗呢個係做CIO或Ferber一類睡眠訓練方式之後嘅正常感受。但係寫一篇文，個中心思想，就係想表達呢個矛盾？

以POPA一向嘅文章深度，呢個位似乎編輯可以引導媽咪再諗深入少少，咁或者就唔會出現而家咁多罵聲四起嘅留言...

希望POPA能夠就住呢個題目，再深入講解多啲啦！以佢哋嘅規模，比我講到口水都乾會有效幾千倍…

今日想先同大家分享一本好書 "The Bottom Line for Baby"

呢本係由 The Whole Brain Child 及 No Drama Discipline 其中一位作者 Dr Tina Payne Bryson 喺年幾前出嘅一本基於科學研究所寫嘅書。

呢本書整理咗好多受爭議嘅育兒題目嘅相關研究，包括睡眠訓練、母乳、疫苗等，以科學解答各種疑問，非常值得參考。

shu z書中嘅結論係 "It's OK to sleep train, as long as you remain emotionally attuned to your child"。

所以，做睡眠訓練，其實最理想嘅方式唔係去睇鐘跟時間（ferber method一類），或者齋陪但唔畀反應（扮瞓覺亦一樣），而係用sensitive & responsive嘅方式去做。

家長亦唔應該抱住「訓練BB瞓覺 」嘅心態，而係同BB一齊學習同適應新嘅入睡方式（btw，要訓練嘅其實係家長，去學識聆聽同瞭解佢哋嘅BB）

睇到呢度嘅媽咪爹哋，希望你哋可以幫手share呢個訊息，令多啲人明白到睡眠訓練到底係點嘅一回事，令做咗睡眠訓練嘅媽咪唔會內疚，亦令因為怕被責怪而冇覺好瞓嘅媽咪唔駛死撐落去啦！