自行入睡其實並非睡眠訓練嘅真正目的

之前提到喺 POPA 嗰篇有關CIO嘅分享文...

我見到好多人對睡眠訓練都有好深嘅誤解，而其實我喺睡眠顧問support group，都曾經見過有啲顧問對睡眠訓練一樣係一知半解

好多人以為，想有覺好瞓，就要訓練到BB識得自行入睡，咁至能夠解決所有問題...

於是，諗住咬牙忍幾日，BB爆喊完就一天都光晒...

但結果，好多時都會出現以下2個情況：

A) BB爆喊幾個鐘，又或者一直爆喊到斷電幾個星期，最終放棄抱返或奶睡返...

B) BB爆喊完可以瞓到，情況似乎改善咗好多，但之後當BB大個啲，出現狀況時，因為大人唔知點處理，於是BB再次晚晚爆喊...

睡眠訓練，唔係話訓練BB識得自行入睡/自主入睡就攪掂㗎！

需要訓練嘅亦唔係BB。

而且， 自行入睡其實並非睡眠訓練嘅真正目的。

所以如果有人話，無論係乜嘢情況，只要令BB識得自行入睡，就可以解決睡眠問題云云...

得罪講句，呢個人對嬰幼兒睡眠嘅認識只係非常表面

想BB瞓得好，絕對唔係只有睡眠訓練一個途徑，未滿6個月嘅BB甚至唔需要做睡眠訓練*

而決定要做睡眠訓練嘅話，事前必須經過：

資料搜集、細心觀察、深思熟慮

要搜集乜嘢資料？

最起碼要知道，睡眠訓練唔係淨係得CIO同Ferber，仲有chair method一類先陪睡，再逐步減低大人存在感嘅方式（呢類亦可以細分成幾個唔同做法），最好知道埋比較少人認識嘅 responsive settling（執行方法更複雜）

而唔算正式嘅睡眠訓練方式，仲有pick up put down、Pantley pull off、habit stacking等...

先瞭解有乜嘢選擇，然後再揀適合你同BB嘅方法，諗清楚喺唔同情況下應該點樣處理，加上調整好睡眠環境、作息時間、睡前準備，甚至要睇埋日間活動同食量，仲有大人同BB嘅互動方式等...

咁樣，成件事至會work，至能夠唔會令BB同你嘅淚水白流

另外，有啲家庭嘅情況，其實並唔適合做睡眠訓練。

於是，仲有其他處理方式，令BB嘅睡眠時數及質素能夠得到改善。

好複雜? 其實已經講得簡化咗

不過又唔駛嚇窒嘅

成件事，係可以好有系統咁樣，逐步慢慢去做，唔好心急諗住掉BB落床就得嘞。

想知道更多有關睡眠訓練嘅資訊，歡迎免費下載呢份小冊子《睡眠訓練：真的能幫到我和孩子嗎？》

Download之後覺得有用，都好歡迎你share個file畀朋友㗎，希望多啲媽咪爹哋知道，睡眠訓練其實係點嘅一回事，少啲淚水少啲guilt啦！

☆☆☆

嬰幼兒睡眠顧問 Catherine

全港首位本地嬰幼兒睡眠顧問 ‧ RIE育兒法專業課程畢業生 ‧ 孖仔媽媽

網上課程 / 電話諮詢 / 免費資源分享

安全睡眠ABC