點樣令BB食得開心又健康？
好多媽咪爹哋都怕BB因為偏食而唔夠飽，於是夜醒大喊要食奶，或者身體發育受到影響。今集0-3歲寶寶podcast，我邀請咗註冊營養師Stephanie媽媽，同大家講吓點樣能夠令BB食得健康。
內容：
1) 加固一段時間後，奶量突然下跌，喜歡食大人食物，其實咁樣係唔係可以戒奶？
2) 已經1歲，唔鍾意食嘢，只愛食白飯意粉呢啲澱粉質／甚至唔鍾意食粥，爛飯，就算街外食物都唔食，只鍾意飲奶，咁樣算唔算厭食？ 對生長有冇影響？可以點做？
3) 想知點知夠唔夠營養？營養不良有乜嘢徵兆？點衡量使唔使比supplements ? 如果要食，要食咩？
想得到更多處理偏食問題嘅貼士?
睇埋呢場由Stephanie媽媽主講嘅網上講座啦！
Click下面左邊嘅三角形箭咀，即能收聽（20:39）
文字版本請繼續拉到下面 👇
文字版本
C：Hello Stephanie。
S：Hello Catherine。
C：好多謝你同我一齊錄呢集podcast呀，你係一位營養師，喺醫院度做，我知道你都幫好多家庭解決佢哋小朋友食嘢上面嘅問題，所以今日我都收集咗一啲問題，好想請你同大家講解一下。
S：我都好開心有呢個機會可以同媽媽喺呢個平台上面分享一啲我自己見過嘅問題，一啲自己嘅心得，同埋以營養角度去睇，有咩方法可能可以幫助去調整或者解決呢啲問題，多謝你嘅邀請。
C：多謝你，事不宜遲，第一條問題媽咪就話：BB開始加固咗一段時間、幾個月，奶量突然就食少咗好多，但係佢好鐘意食嘢。咁其實係咪已經可以早啲戒奶，就唔使再餵奶，就可以專心食三餐呢？會唔會驚唔夠營養或者點樣呢？
S：其實只要個月齡已經去到可以進行加固嘅月齡，即係大概講緊六個月左右或者以上，每個BB都會有自己嘅時間表，有啲可能一開始就已經可以食到好多固體，有啲就會遲啲，可能去到差唔多十二個月先食到多啲固體。但係只要你見到佢加固嘅時候，食固體食物食得好，有一個理想嘅程度，咁佢自動唔係想食咁多奶都係一個正常嘅發展嚟嘅。
唯獨是一點可能要注意就係，因為本身奶係入面有比較多蛋白質同埋鈣質嘅主要食物源，如果小朋友食固體嘅時候食好多，但係嗰啲唔係有豐富蛋白質或者鈣質嘅話，咁樣你就要諗吓會唔會多啲添加呢類嘅食物；又或者如果你自己加固，幫佢安排嘅進度未去到有高鈣或者高蛋白質嘅食物，咁就要考慮吓係咪要搵返啲時間畀佢去食返奶。
咁但係本身呢個唔係問題嚟嘅，只係喺營養嘅平衡上要注意返少少。
C：明白。好多時候所謂港式加固法，唔計BLW，餵嘅話好多時候都係餵粥仔嘅，即係粥啦、有啲肉碎嘅菜，其實蛋白質係咪可能會唔係咁足夠呢？或者點樣先知道個蛋白質為之夠呢？
S：如果一歲之前，其實本身嗰個食物唔同類型嗰個比例，唔係話我哋睇嘅最重要嘅嘢，一歲之前一般我哋嘅目標都只係希望小朋友去認識進食呢樣嘢，進食固體，最理想可以畀佢學習到唔同質感、唔同形狀、唔同食物嘅組別(food groups)嘅食物啦。如果佢本身飲奶嘅狀況係OK，單從營養嘅角度嚟睇，粥仔入面肉類嘅蛋白質夠唔夠豐富呢，本身營養嘅比例上唔係一個問題。
但係當然好似我頭先講咁樣，因為我哋希望利用一歲之前呢個階段去maximize令佢可以有最大機會接觸到唔同嘅食物類型、唔同質感，咁如果淨係成日都畀同一類嘅粥仔、同一種質感嘅食物，咁可能又會喺另一個範疇上錯過咗一啲嘢。
C：即係加固主要嘅目的係俾BB去習慣唔同嘅食物、質感，除咗奶以外；所以唔係為咗畀一碗粥佢、食飽晒，可以代咗個奶，如果一歲之前。因為我睇過資料都話一歲之前好似你所講，蛋白質好重要，奶應該係主要食糧。
有啲媽咪個情況其實相反，可能一歲都仲係唔鍾意食嘢，淨係鍾意飲奶，又或者可能佢淨係肯食啲爛飯、粥嗰啲澱粉質，就唔肯食頭先你講嗰啲蛋白質同蔬菜，咁嘅情況算唔算厭食呢？應該點處理呢？
S：明白，呢個問題好臨床clinical，算唔算厭食因為牽涉到一個斷症嘅問題，通常如果我哋要睇吓有冇一個臨床嘅clinical condition，咁都真係要比較多嘅資料，case by case每個個案唔同咁樣去睇。
但係的確你講嘅呢個情況都好常見嘅，可能有啲小朋友，尤其是去到一歲之後，佢就淨係會喜愛食某一類型食物，又唔係好願意接受其他類型嘅食物、食物組別。首先作為父母我哋有一點要去理解同埋嘗試接受，人有偏好某啲食物同埋食物組別實屬正常。好似我哋大人可能喺唔同嘅階段都會，例如嗰排你可能好鐘意做運動，咁你可能會想食肉多啲；另一排你可能壓力大，你就會想食有澱粉質、碳水化合物，甚至有糖嘅嘢多啲，咁係好正常嘅一件事。小朋友都一樣，佢有唔同嘅發展階段，可能佢嗰排好動啲，另一排可能情緒發展，佢唔同嘅情況或者發展階段下，佢會有偏好某一啲食物，其實係一件正常嘅事，代表緊佢係正常咁發展緊。
但係當然佢發展緊就唔代表你營養上都唔係唔使理佢，由得佢自由奔放咁樣，有好多時其實大人都喺最終長大成人之後會唔會有好嚴重嘅偏食情況，呢個問題上都扮演咗一個重要嘅角色。
短期嚟講，就算小朋友有一個偏好，鍾意某啲特定嘅食物，但係你都可以嘗試用一啲方法，去令佢無形中都食咗一啲佢嗰排唔偏好嘅食物。舉個例，好多小朋友唔係好鍾意食蔬菜，但係佢可能鍾意食蛋白質，佢唔介意食肉同埋食雞蛋，咁你可能可以諗啲方法將蔬菜混喺炒蛋入面又好，或者將佢整成一啲漢堡扒形嘅肉餅都好，咁佢就會起碼攝取到蔬菜入面部分嘅營養。
但係當然呢個只係一個短期嘅解決方法，你亦都冇令到佢自己有主動嘅興趣去食蔬菜，我哋都要睇吓長期嚟講點樣做。
我覺得以我以前見過好多家庭嚟講，有個誤解就係：小朋友拒絕咗一兩次嗰樣嘢，耍手擰頭、唔食，佢就係唔鍾意嗰種食物；其實就唔一定係嘅。小朋友一嚟好善變，同埋其實個實情就係，對佢嚟講呢啲你畀佢嘅食物，可能佢以前見過一次兩次，但佢個記憶未必有咁好，對佢嚟講再見到都可能係一個新嘅食物，嗰一刻佢要好多嘅精神去接受，佢可能見過呢樣嘢幾次，跟住要摸過、聞過佢，甚至要見到佢嘅屋企人開心地進食呢樣食物，咁佢最終先會覺得：「原來呢樣嘢係可以食㗎喎」，咁佢有一日突然間就會食。
所以就算有個小朋友，對某啲食物好抗拒，但係你唔好諗住淨係畀一次兩次三次佢就算，我哋係講緊起碼要嘗試至少十次，甚至讀書嘅時候其實係建議起碼畀二十次，先可以斷定個小朋友可能真係唔鐘意食嗰樣嘢。講到尾個意思就係，佢可能呢排唔食蔬菜，但你都唔好放棄，要再繼續嘗試。當然你可以花啲心思嘅，可能將食物切成佢鍾意嘅形狀，又或者如果有啲更加有時間同心思嘅媽媽，可能可以將佢搓成一啲動物形狀嘅飯團呀，跟住擺啲蔬菜做眼耳口鼻之類，都可以用一啲唔同嘅方法，令到佢經常接觸到嗰樣佢唔食嘅食物，再增加佢對呢樣食物嘅熟悉感嘅機會，長久落去，可能呢刻佢唔食，短期內佢唔食，但係以長線嚟睇，咁樣先係真正幫助到佢將來唔會有偏食問題，或者減低佢對食物偏食嘅機會。
C：明白明白，我係絕對冇心情同時間去搞咁多嘢嘅媽咪。呢個位我都想分享一下，我喺意大利呢度，因為我住喺意大利，我其實都有餵粥仔畀佢哋食，但係都有其他variety嘅食物，譬如呢度通常佢哋加固一開始會食啲細細粒嘅意粉粒嗰類嘅嘢，或者我可能用焗爐整肉餅等等，變咗嗰陣時我記得如果佢哋唔係咁願意食，我就會落唔同嘅香草落去，我唔會係有心機去搓好多唔同形狀、整到好靚咁樣，同埋我都唔想開始做呢件事；咁當然有啲有啲媽咪佢哋係本身好鍾意煮嘢食嘅，咁呢個方法就會好work。我自己本身就會畀好多唔同嘅variety，落唔同嘅香草呀，或者可能唔同類型嘅芝士呀，咁樣畀佢去食。
趁呢個位我又分享吓，頭先你講到有啲小朋友可能同一樣食物佢需要見到好多次先至會去食，呢個我係諗起，因為我係孖仔兩個，就好明顯見到孖仔F佢係所有嘢喺佢面前，佢一眼就成個塞入口，就會食，佢係完全唔會有猶豫；但係孖仔A就唔同，佢會拎住嗰舊嘢，左望右望，篤吓佢，望吓，跟住又望住孖仔F喺度食，搞一大輪跟住先細細啖咁樣試吓。我真係覺得呢個有陣時都幾關乎小朋友個性格，因為我兩個都係一樣咁樣做，但呢個都可能會有一個影響。
S：係呀，完全係，其實任何事都係，可能你話小朋友去同其他人玩，或者要唔要接觸一件新嘅玩具，都係一樣道理，有啲小朋友天生嘅性格就係「我做咗先算」，有啲就會覺得「唔得，我要謹慎啲」。好似你平時成日同其他爸爸媽媽分享，我諗作為父母其中一個好重要要做嘅嘢，就係觀察你嘅小朋友，睇佢係邊種性格，但係我哋作為父母其實有個控制嘅權利，去畀一啲對佢嚟講有營養嘅食物佢，跟住經常畀佢有機會去接觸到。好似你講咁樣，其實我都唔算係一啲非常有心機去搓到啲食物形狀好靚嘅媽媽，但係最低限度你唔好因為「佢好鐘意食零食呀？咁好啦，佢唔食正餐就算啦，我淨係畀零食佢」。
我覺得作為父母嘅責任，有一樣嘢好重要嘅，係你要提供一啲佢應該要去嘗試嘅食物畀佢去嘗試，唔係因為佢鍾意偏好一樣嘢，咁你就無限咁樣提供：「算啦，算啦，你鍾意食精製碳水化合物，咁我就畀晒啲餅乾、蛋糕你食」。
C：有啲媽咪、甚至有啲長輩會覺得：「佢唔食嗰啲就算啦，畀啲嘢等佢唔好肚餓就ok啦」 ，結果小朋友就淨係掛住食零食，正餐更加就唔食喇。呢個亦都係飲食習慣上面嗰樣嘢，你講得好好，呢個係我哋大人嘅責任嚟，RIE育兒法都講，我哋係小朋友嘅領導leader，我哋會俾小朋友有個選擇權，喺某一個程度上，佢可以選擇我哋offer畀佢嗰樣嘢，呢一個位係我哋嘅責任，確保小朋友真係食得夠。
講到營養呢一個位，可能好多媽咪都想知道，究竟點樣知道佢夠唔夠營養，或者營養不良有乜嘢徵兆呢？使唔使畀啲咩supplements呀嗰啲，如果要食又食啲乜嘢好呢？
S：通常如果你話營養不良，睇吓係一個好嚴重，定係普通嘅營養不良。咁有分，如果叫做嚴重營養不良，一般會影響到佢嘅成長發展，體重上同高度增長上都會有影響。通常健康院嗰本書仔嗰個生長線plot出嚟就會見到，如果真係有影響，咁就會再做跟進。呢樣嘢我哋今日就唔深究，但係總之嗰條線如果唔係隨住同一條線發展，咁會係一個徵兆。
但係講真唔係好多小朋友會有呢個問題，因為我記得你之前都share過類似嘅post，小朋友自己係會識得去控制佢要食幾多卡路里，去幫助滿足到佢生理嘅發展，起碼去到五歲都係，只不過大人有時唔相信呢件事嘅啫。但係無論如何，呢個係相對比較嚴重啲嘅營養不良嘅情況。
如果你話其他營養不良，其實唔單止小朋友，大人都會有，例如你可能食唔夠某一啲礦物質，你可能指甲會容易啲磨蝕，或者可能刷牙容易出血就同維他命C有啲關係。但係因為好多唔同嘅礦物質同埋唔同營養素、維他命等等，咁會有唔同嘅徵兆，呢啲通常如果個問題唔係好嚴重嘅話，咁一般繁忙嘅香港人就唔會好在意；當然我唔係話唔好理啦，只不過去到一個真係比較你覺得係一個問題嘅位，因為太多唔同嘅營養素喇，今日好難一一細講，但係可能可以有機會再分享一啲主要嘅營養素有啲乜嘢徵兆。如果你真係好concern，咁當然可以睇返兒科醫生同埋營養師，睇吓有啲咩營養上需要調整。呢個就係關於營養不良嘅徵兆。
C：頭先話使唔使畀啲supplements，有啲一粒就已經包晒十幾廿樣嘢，嗰啲其實需唔需要畀呢？或者有冇用呢？
S：有關supplements呢個疑問，如果真係單純從營養學嘅角度，或者營養師一般嘅角度去講，咁梗係最理想就係從天然嘅食物入面去攝取營養啦。但係理想同現實就有啲差距嘅，知道作為父母生活一定好繁忙，尤其是香港嘅父母好多都雙職、更加繁忙，咁你未必一定可以幫佢調整到佢嘅飲食，真係全部嘅嘢都可以從天然中攝取。
有時亦都係環境嘅因素，講緊我自己住喺英國，英國呢度成日都好陰天、冇乜太陽，維他命D係要透過我哋皮膚曬太陽先製造到出嚟嘅，呢個係我哋主要攞到維他命D嘅source、來源，但係呢度好明顯成日都陰天，我哋就造唔到維他命D，咁所以喺呢度政府嘅機構都係建議我哋要食維他命D嘅supplement，小朋友亦都係。
同樣嘅道理放喺香港嘅情況，如果你話，舉例而家有疫情，小朋友出唔到去玩、曬唔到太陽，咁我覺得喺呢個情況，你係可以畀維他命D嘅supplement佢食嘅，當然要留意返個劑量啦，唔同年紀有唔同嘅建議嘅食用分量嘅。而multi-vitamins嗰啲，我覺得其實冇咁嘅必要性，一般嚟講如果小朋友食嘢上會食唔同嘅食物組別food groups，佢理論上都會攞到足夠嘅營養，唔使特登話去補充啲multi-vitamins嘅。但係假設佢好似你頭先講咁樣，可能有某一特定嘅營養不良嘅特徵，可能有啲小朋友真係唔鐘意食肉嘅，去驗血咁啱見到佢貧血，即係鐵質唔夠啦，咁可能呢啲情況，或者如果真係好難令佢食肉，可能你就可以考慮用鐵質嘅補充品。咁但係我都建議如果用呢啲specific嘅補充品supplement嘅時候，最好都係有醫生或者營養師嘅建議會比較理想。
C：係呀，呢個其實關於餵奶同埋加固其實都係好大嘅學問，其實同睡眠一樣，睡眠同餵奶加固都係相輔相成。
其實有好多其他問題，我知道好多媽咪都仲有其他問題，今日時間有限，所以希望可以遲啲再約你第二集podcast我哋再傾過啦，或者睇吓會唔會有啲其他合作方式，希望可以幫到其他媽咪認識多啲有關餵奶加固呢一方面嘅情況啦。
S：多謝你呀Catherine，希望再有機會同大家分享啦。
C：多謝你呀，拜拜！
