要到幾多歲，至唔會再有睡眠問題？
「過左清醒時間，會令bb較難入睡或者瞓得唔好，呢樣嘢其實到幾大先至會無咁明顯？」
如果你follow咗Dolce Sleepers 嬰幼兒睡眠資訊一段時間，或者曾經PM我詢問睡眠問題，應該會知道我成日都會提到「清醒時間」呢樣嘢。
要注意一點，清醒時間係指由BB瞓醒，去到合埋眼瞓返之間嘅時間，年紀越細能支撐嘅清醒時間就越短，初生BB甚至只有45-60分鐘！
如果過咗清醒時間，BB應該要瞓但冇得瞓，大腦就會分泌皮質醇（Cortisol）呢種壓力荷爾蒙，令身體能夠繼續撐落去。喺呢個時候就算你畀BB瞓，佢都唔會咁易瞓得到，甚至要等1個鐘後，壓力荷爾蒙水平下降至會瞓得著。
所以，如果你次次要氹成個鐘至瞓到，清醒時間遠遠超過標準長度，咁你BB唔係唔夠攰，而係攰得滯嘞！（尤其是當你發現囝囝囡囡黃昏時進入精神亢奮嘅狀態，大叫大笑跑嚟跑去，佢唔係未攰，係攰得滯啦！）
當BB進入疲勞過度嘅狀態，就會好難連接睡眠周期，最常見嘅情況係日間小睡會30分鐘就醒，夜晚會每2個鐘醒一次。
只不過，銜接睡眠周期嘅能力，係發展性嘅，即係年紀越大，越容易銜接得到。
答返呢位媽咪嘅問題，一般嚟講，去到2歲左右，日間小睡會自然延長，就算過咗清醒時間，都一樣可以瞓到2個鐘或更長。不過，夜晚就仍然會因為攰得滯，或者午睡時間太接近就寢時間而出現夜醒早醒（係呀，清醒時間太短都一樣有問題㗎！）
去到3歲，有啲小朋友已經唔再需要瞓晏覺，清醒時間對睡眠嘅影響就會相應下降。
注意我講嘅只係對睡眠嘅影響，3歲嘅小朋友仍然要瞓11-12小時至足夠。如果長期睡眠不足，對小朋友嘅情緒、抵抗力、甚至學習能力、專注力同記憶力都會有負面影響。
清醒時間真係極為重要嘅一個因素，但好多人都唔知道，仲以為日頭瞓少啲夜晚就會瞓得好
請幫手share呢篇文章，等多啲父母能夠知道幫BB瞓得好啲嘅秘訣啦！
唔知道你囝囝囡囡嘅清醒時間係幾多？呢篇文章幫到你
伸延閱讀：《最重要的睡眠貼士 - 清醒時間》
