睡眠調整第一步，由邊度開始好呢？
好多初次接觸健康睡眠嘅家庭，開頭都會覺得有啲茫然不知所措，唔知應該由邊度開始作出調整好。今集0-3歲寶寶podcast，我邀請咗 Dolce Sleepers健康睡眠大使 Xenia 媽媽，同大家分享，佢點樣成功幫到好多家庭慢慢走上軌道。
“半夜紮醒嘅時候點處理呢？要睇返佢個情況去解決。唔係每日跟返同一個schedule就可以解決嘅事。”
Click下面左邊嘅三角形箭咀，即能收聽（26:22
文字版本請繼續拉到下面 👇
文字版本
C：Hello Xenia，可以同大家分享，你點認識到Dolce Sleepers嗎？
X：Hello，其實我八個月嘅時候見到有人share Catherine嗰個page，本身就係講一啲瞓覺時間嘅，開頭我覺得：「吓，BB瞓覺，攰咪瞓囉」。後尾就睇咗佢個page入面有一個post，就係講想有親子時間，咁通常佢哋返到屋企最早六點半，有時可能九、十點先至會沖涼，跟住之後就會好難配合到早瞓嗰啲。後尾睇晒成篇文章，我就覺得有一樣嘢係我好想做到嘅：想佢早瞓係因為咩原因，通常都係你好想佢可以有精神，同埋唔好發咁多脾氣，或者係可以食得好、瞓得好。呢啲其實喺篇文入面講咗好多，所以到最後我就跟咗。
我可能跟咗一個星期，發現佢真係完全唔同晒，可能本身頭一兩日都比較辛苦，用一個鐘時間左右先至會陪到佢瞓覺。咁慢慢一個禮拜，其實佢十五分鐘內，就係篇文章入面講嗰啲時間，真係十五分鐘內瞓得著。
之後keep住去到依家我哋都兩歲半多啲，都係跟返Catherine平時講嗰個時間去瞓覺同埋起身，我哋係八點幾瞓覺，跟住八點鐘起身，因為我哋已經大個咗，就唔使夜晚瞓咁耐。
C：好呀，即係呢個情況，其實你係接觸咗dolce sleepers之後先至認識到：原來小朋友真係需要早啲瞓。其實喺香港夜瞓都係一個好常見嘅情況，甚至九點十點瞓都已經覺得係好早，點知原來其實最好係再早啲、六至八點。我相信好多家長、媽咪、爹哋聽到會話：「吓，六至八點要瞓，呢個時間咁早，邊可能呀。」
喺呢個情況、呢一個咁嘅諗法之下，其實你點樣去做一個調整呢？成件事嚟講。
X：其實開頭可能都係十一點幾先至瞓，同埋有時佢係一點先至瞓得著，即係你十一點幾見到佢喺嗰張BB床嗰度彈跳，跟住你就會覺得：「唉，佢都唔想瞓㗎啦。」但係去到佢真係可以再瞓返嘅時間，係差唔多一點鐘，佢就突然間好似暈咗咁樣，就瞓著咗，唔使氹佢就已經瞓著。咁你就會覺得：「希望佢唔好咁快起身啦。」
其實之前我第一次睇嗰篇就係關於難以入睡、夜醒、過早醒，同埋長期睡眠不足嗰啲。我睇到嘅就係，可能佢入面有我個小朋友發生緊嘅嘢，可能佢過咗嗰個時間，佢真係好興奮。咁跟住之後就好似我頭先講咁，十一點鐘其實佢已經好攰，佢一定唔會瞓，因為佢嗰啲壓力荷爾蒙好多(C：攰得滯反而會精神亢奮嘅一個狀態)。跟住可能去到夜晚佢又會突然間扎醒。早醒又係，你所講嗰幾樣嘢，其實都同時發生係佢身上。
試咗呢一樣嘢，跟住就覺得都真係work喎，咁因為第一日試已經好OK，我哋本身係十一點瞓，但係嗰一日我哋係九點零鐘，因為我冇特登推到好早、七八點就瞓，因為嗰個時間太長、太早，咁我就試咗九點先，跟住佢十點零鐘就瞓咗，比起佢一點先瞓就已經爭好遠。跟住慢慢再推前囉。
C：即係你嘅經驗就係，其實夜晚早啲瞓已經有好大嘅幫助、好大嘅影響，係咪？
X：因為嗰日我哋係瞓到朝早嘅，瞓到八點先至起身，佢冇話突然之間凌晨三個鐘扎醒。
舊時開頭未試呢個方法之前，就十一點瞓，四點鐘一定就會起身(C：我哋稱為早醒嘅情況)，我哋可能就要再暗佢瞓，因為佢喊醒嘅嗰陣，因為我哋嗰陣都有用奶嘴，咁就幫佢執返個奶嘴畀佢，之後直頭係揞住個嘴，即係等佢啜到瞓著，跟住我哋先可以繼續瞓。
但係之後可能一個禮拜左右，佢已經係完全改善咗好多。當然之後都有啲其他情況發生，但係so far去到今時今日我哋都係呢個時間瞓覺，都係可以朝早先至醒。
C：都好理想，因為始終我哋想小朋友瞓得好，我哋唔係淨係睇個時數。就算佢好夜瞓，好晏起身，可能時數嚟講都足夠，但係睡眠質素其實都唔同，因為好多時候如果有睇開我寫文章嗰啲媽咪爹哋都會見到，好多時我都提到生理時鐘，小朋友嚟講係早啲瞓比較配合到生理時鐘，係會瞓得好啲嘅。唔好諗住早啲瞓就會早啲醒，其實好多時候反而你早啲畀佢瞓，佢冇咁攰嘅時候，佢夜晚會醒少啲，早醒個情況亦都有機會得到改善。
我知道你除咗幫到你自己，即係你自己小朋友有覺好瞓之外，亦都幫到好多媽咪，令到佢哋相信呢一件事。好多媽咪其實都係，第一樣都會諗：「吓，咁早瞓一定會早啲醒啦」。
咁以你嘅經驗嚟講，你有咩想同呢啲媽咪講呢？
X：通常其實開頭唔知嘅時候，你就會覺得總之越眼瞓就越好，因為感覺佢越眼瞓就會越晏起身，因為喺好耐好耐好耐，我哋嘅父母都係咁樣教育啲小朋友，所以我哋都會咁樣諗，同埋通常老人家就會比較多呢啲諗法。
C：「日頭瞓少啲，玩耐啲，攰啲，咁夜晚就瞓得好啲㗎喇。」
X：係，但係可能你見到好多人都係有咁嘅情況，跟住你可能問佢：「喂，你去到幾多點，可能去到十點鐘，你有冇發覺佢突然之間好興奮，跳晒舞咁樣，或者佢會喺張床度un，或者佢自己突然間尖叫？」即係問佢呢啲問題，佢哋就會話「有呀」，跟住當然開頭就唔會好harsh咁樣話：「咁不如你試吓上堂啦，跟Catherine個方法咁咁咁啦」，通常會同佢講話：「之前我哋係幾多點瞓㗎喎，之後我跟咗Catherine之後，我跟咗好耐……」，其實我嗰陣同佢哋分享嘅時候，嗰陣係成年前，上年一月，跟住同佢哋講呢啲嘅時候，我就講返我當時都係跟咗幾個月，咁樣我都已經好好喇喎。因為我當時我係搬屋，要交畀姐姐去follow-up佢瞓覺嗰啲嘢，所以我就冇辦法每日都咁樣氹佢瞓，即係我一點鐘又返返嚟，因為我搬屋嗰度要搞好多嘢，我冇可能凌晨突然撲返嚟同佢瞓覺。所以我就要處理好呢樣嘢，我先可以離開屋企。所以同佢哋講完之後，有啲當然未必會跟到，可能因為老人家或者其他嘢，但係佢都會有初步改善，但你話好完全、跟得好足，佢又未必做得到住。
C：好多時都係盡量做啦。
X：係呀，可能同佢哋傾多啲計，或者幫佢哋睇吓究竟小朋友係邊一方面嘅問題，先至慢慢開始研究吓喺邊度入手會好啲。可能係唔好奶睡先，有時可能佢哋係食完奶就即刻喺床度瞓，或者夜晚瞓醒就食奶，對佢哋再瞓返又會有某程度上嘅影響。你可能都要問吓佢哋有冇呢啲問題先，再慢慢話畀佢聽，可能有啲咩方法可以幫到佢。
或者其實你係有唔同嘅文章去講解畀佢哋聽，因為我之前係刨晒你成個page咁滯，所以可能佢哋一問我「小朋友最近咁咁咁喎」，跟住之後我就話：「你睇呢一篇吖，你到時睇吓可以點樣解決，如果真係唔得，你先再睇吓會唔會考慮問吓Catherine可以點樣幫你，或者可能你都真係想好啲嘅，咁咪上堂囉」。
當然有啲媽咪未必真係會上，但係so far都見到有幾個係真係想自己上埋堂，因為佢哋本身未必係小朋友瞓得好好，好影響佢哋，因為佢哋可能爸爸要返工，又嘈到佢，夜晚紮醒一定一齊醒㗎啦，佢就會想改善多啲夜醒嗰啲情況。
有啲嘢係佢哋如果唔係自己去follow up，因為你係第三者嚟，你咁樣同佢講講講，其實佢都未必可以完全跟到晒；最重要其實係自己要識呢樣嘢。因為夜晚嘅情況，你一起身個BB係因為啲咩嘢原因，可能係因為原來佢瞓著咗之後你開咗盞燈喎，咁佢就一定唔會再瞓返，因為你開咗盞燈，就算係小夜燈又好，或者係多咗啲嘢都好，係佢哋自己本人先會知，你唔會可以佢問你嘅時候，你就話到畀佢聽：「喂，你屋企嗰盞燈開咗，所以佢唔瞓喎」，因為呢啲嘢佢自己先知㗎嘛。
C：係呀，好多細節嘅嘢，其實你講得好好呢一點，就係當然健康睡眠其實對香港家庭都算新，因為呢樣嘢其實係大概兩年半之前我開個專頁，先至真係有人去講睡眠需要呢一樣嘢，發現BB應該呢個年紀應該要瞓幾多呀，應該要點樣瞓等等，始終好多concept嚟講對好多媽咪爹哋嚟講都係好新，可能未必咁容易接受。
當佢哋剛剛開始接觸嘅時候，基本嘢知道咗，但係好多時候都係，啲媽咪可能send message畀我、問我啲問題，我大概可以略略講，例如時間表嘅情況唔係咁理想，但係有好多情況都會話：其實可能真係需要電話去傾，慢慢問吓問吓先有多啲資料。例如好似頭先你講原來半夜開咗盞燈，無端端我唔會去問你會唔會半夜開咗盞燈，好多時候都真係傾吓傾吓，慢慢去幫佢發現到個問題所在。
呢啲位其實係知道基本嘅嬰幼兒睡眠知識之外，跟住細心了解；呢個都去返我好多時候提到嗰樣嘢，就係我哋真係細心去觀察、去了解究竟係自己做咗啲乜嘢，或者小朋友、BB個反應係點樣，再去諗點樣處理。
同埋另一樣嘢頭先你提到都好好，就係我搞呢個podcast，其實我都好希望可以咁多位媽咪接觸健康睡眠得到嘅好處，佢哋用親身經驗同大家分享佢曾經遇到啲咩問題，點樣去做啲乜嘢改善，就得到而家呢個成果。我好希望咁多位媽咪嘅訪問，令到多啲媽咪可以有多啲信心，知道呢樣嘢其實可能真係改變一樣嘢先，得到一個階段性勝利。
好多時我都講就係，大家都希望BB可以一覺瞓到天光，自己瞓、唔使氹，呢個係最終嘅目標，個個都係㗎喇。但係其實有好多階段性，例如頭先你講只係提早咗夜晚瞓覺個時間，已經改善咗，可能未至於一次過就即刻瞓到天光，但係起碼半夜冇醒得咁密先，可能早醒嘅情況都理想啲先，逐步慢慢去做一個改善。
呢個亦都係我一直好注重嗰一樣嘢，長期可以幫到BB瞓得好，instead of而家呢一下用咩方法令佢即刻可以瞓到。但我係會點樣令佢長期，因為睡眠問題唔係話你而家搞掂咗就一勞永逸，之後可能隨住BB發展等等，好多情況都會有影響。
所以點解頭先Xenia都有提到，我原本喺專頁寫咗好多篇文章，咁我而家就方便大家，我其實有個甜睡寶寶網誌，就係 blog.dolcesleepers.com，上面有四百篇文章，不斷update嘅，好歡迎大家上去爬吓文，或者有啲咩問題嘅時候，可以search keyword睇吓相關嘅資料咁樣。
好多謝Xenia今日同我傾計，同大家分享你嘅經驗。
最後一個問題，對於受其他睡眠問題困擾嘅媽咪嚟講，你有冇啲乜嘢想同佢哋講呢？
X：其實我覺得如果本身係有睡眠問題，唔理你係夜醒、早醒，或者你話：「呀，我個BB唔肯瞓覺」，其實冇BB係唔肯瞓覺。我見過咁多人裡面，可能我自己啲朋友，我會過去搵佢，會留意到佢哋點解會有呢啲情況。
有時可能佢哋食嘢方面，有個朋友就係，我之前去佢屋企，咁佢晏晝嘅時候食飯話小朋友唔肯食，跟住就發現到原來佢夜晚瞓覺時間唔係咁OK，可能佢係好夜先至瞓嘅，同埋仲有夜醒。因為佢嘅問題係冇咗深層睡眠，朝早精神狀態唔好，佢晏晝nap嘅時候都會好差，所有嘢影響到，其實佢個小朋友就食好少囉，少到可能係得半碗小朋友碗嘅食量就話飽咁樣。
但係個問題就係，我嘅小朋友其實係食好多嘢，但佢係早產小朋友，出世嘅時候得1.98 kg，但係依家keep住佢嗰個，可能由細細個嘅時候低過三，去到而家係十以上，或者係已經去到廿五，我哋呢段時間疫情就冇去健康院再度過嗰啲資料。但係佢keep住一路都係食好、瞓好，同埋精神係好好。呢啲嘢全部都唔係因為佢本身係咁樣，即係唔係話佢好乖。有時可能佢突然之間好黐身，死都唔肯畀你走，其實呢啲全部都係因為佢哋本身唔夠瞓。所以其實如果可能解決咗瞓覺嗰樣嘢，佢就會食好多嘢，同埋佢就唔會再係咁黐住你，佢一定會自己去玩、或者乜嘢。
有時可能佢哋話：佢已經三歲幾、四歲幾喇喎，唔使擔心，其實我有朋友都係三四歲小朋友，佢哋都係十一二點先至瞓，一點先瞓得著，但係到我同佢哋傾完計，或者陪佢哋搵吓page嗰啲資料，之後佢哋慢慢解決到。其實我個朋友有兩個小朋友本身呢個時間瞓，去到依家其實九點前已經瞓著。
同埋佢哋最重要係有自己時間，你其實做咁多嘢就係為咗自己夜晚可以有啲me time。所以其實根本如果你解決咗呢樣嘢，同埋可能你又可以陪吓自己屋企人，老公或者爸爸媽媽，或者有自己時間做自己想做嘅嘢，都係一件好事囉。
我咁耐以嚟點解去同啲friend講話：「不如你試吓」，其實我就係想話畀你聽，晚晚我個女八點鐘就瞓，夜晚姐姐喺度睇住佢，我就可以出街，同我老公食吓飯，或者出去睇齣戲又得。朝早佢都一定係八點起身，姐姐基本上都唔使入去睇佢，佢根本就唔會起身。除非可能佢病咗，或者嗰段時間出牙或者唔舒服，咁當然我自己本身已經知道，我一定會喺屋企陪住佢。但係其餘嘅時間，佢好地地，或者佢已經兩歲幾，其實佢每日都好穩定，冇咗之前講嗰啲情況，唔會再打針，唔會再有出牙嗰啲情況；所以其實如果冇呢啲情況嘅時候，基本上佢瞓咗覺，就已經可以係我哋嘅自由時間，我鍾意喺出面睇吓電視又得，做啲咩都可以囉。
所以冇嘢係冇可能，除非你話：「我冇乜所謂呀，願意畀佢纏住我全日24小時，我冇晒自己時間都可以」。但其實根本呢樣嘢係冇可能，因為你都會覺得好攰，或者好頹廢，因為你可能夜晚冇得好瞓，佢瞓覺之前你又冇得做自己嘢，又冇得瞓，冇得休息，所以呢啲嘢全部都係相連。
C：係呀，你講得好好，真係點出咗睡眠嗰個重點唔係淨係話瞓覺瞓得夠唔夠嗰樣嘢，而係瞓覺真係會影響到小朋友個胃口、心情；當然小朋友瞓得唔好，大人都自然瞓得唔好，一樣都會影響心情，甚至影響到親子關係等等。
X：有一樣嘢好重要我覺得，就係如果可能而家係好咗，我跟咗Catherine一段時間喇喎，八點鐘起身、八點鐘瞓覺，冇乜問題喎。但係其實有時去到中段嘅時候，佢一路都瞓得好好喎，突然之間又扎醒咗喎，咁你就會覺得係咪呢個方法唔work？唔係囉，係因為佢每一個階段都有一啲瞓覺時間、同埋一啲嘢要你幫佢調整，唔係一步登天，去到以後都唔使再搞。
但係點樣可以做呢樣嘢，就係當你學識咗呢度入面嘅方法之後，其實佢就算有任何問題，你都唔使擔心，因為我就係呢一個情況。佢有時可能夜晚瞓醒嘅時候，佢就扎醒咗，我點樣去解決，就係睇返佢個情況去解決，唔係話佢每一日都係跟返同一個schedule就可以解決到。呢樣嘢係好緊要，我相信有好多人都唔知。
C：係，你真係點出咗一個好重要好重要嘅一點，就係瞓覺唔係而家搞掂咗一勞永逸，真係一定會有ups and downs，最重要係你知道點樣去做嗰件事、點樣去回應。所有點解好多時候我會同啲媽咪講，好希望佢哋知道點樣去處理個情況，成為佢哋自己仔仔女女嘅睡眠顧問、睡眠專家，instead of依靠一個人話畀你聽咁嘅情況點樣處理，因為始終唔問得咁多，有陣時跟唔到咁多，或者小朋友半夜發生呢件事嘅時候，嗰一下你問唔到人。
所以如果你自己睇過資料，或者由經驗，或者由觀察，用嗰個方法，dolce sleepers我好建議嗰個方法就係，我會覺得最好嘅導師係你嘅仔仔女女，其實你觀察住佢嘅反應，你會知道有啲咩係幫到佢，有啲咩係唔做好過做。
所以你真係講咗一個非常非常重要嘅一點，就係自己知道嗰件事點樣去解決，唔好諗住話抌嚿錢出嚟，搵個睡眠顧問幫你搞掂咗佢就一勞永逸，無奈地唔係咁樣。
X：一定會有啲特別嘢發生，要自己識解決。
C：係呀，自己知道點樣去處理嗰件事，所以唔係想hard sell，但係所以我去做嗰個online course我都係用呢個心態去諗嘅，一個長期嘅睡眠調整嘅方式，就係由六個月去到三歲，變咗會講解唔同年紀隨住佢嘅發展都可能會出現嘅睡眠問題，應該點樣處理等等，等大家有個心理準備，知道：發生呢件事好似之前聽過喎，check返點樣處理呢，原來係咁樣做。呢個就可以等你嗰吓唔需要茫然、不知所措、唔知點算，跟住就做咗啲之後會後悔嘅嘢出嚟，呢個好多時候都聽到。我好希望呢個course可以幫到大家做到呢一件事。
好多謝Xenia同大家分享，接受我今次呢個訪問，希望下次可以再邀請你同大家分享更加多。咁今日時間差唔多去到呢度先啦，多謝晒你，bye bye！
