你嘅存在，可能會令BB瞓唔著?
我哋總會將令BB入睡視為自己嘅責任，但你有冇諗過，你嘅存在，可能反而會令BB瞓唔著呢？今集0-3歲寶寶podcast，我邀請咗Pam媽媽，同大家分享，佢意外地一日就令囡囡可可自行入睡嘅經歷。
“每個BB都唔同嘅，有啲BB可能係要有人陪住至安心，我嗰個係越少distraction（越好），因為佢對聲音對光都好敏感，所以有個人喺度，係令佢更加清醒。”
Click下面左邊嘅三角形箭咀，即能收聽（19:19）
文字版本請繼續拉到下面 👇
文字版本
C：Hello Pam！好耐冇傾喇，你幫可可搵我做睡眠諮詢嗰時差唔多兩年前嘅事喇，不過間中你都有message我，update吓佢嘅情況。我聽講可可都係一個好鍾意瞓覺嘅BB，到而家呢個小朋友都好鍾意瞓覺。
P：係呀，佢嘅技能就係瞓覺，係一件好事嚟。
C：多謝你接受我呢個訪問，同大家分享兩年以來可可一直都可以瞓得咁好，究竟你做咗啲乜嘢呢？同大家分享吓你嘅經驗、心得。你可唔可以先講一講，最初頭嗰幾個月嘅情況係點樣？
P：可可其實一出世嗰陣係OK嘅，即係頭嗰兩三個月可能都係好嘅，但係去到第三四個月就開始有嗰啲睡眠倒退，佢倒退嘅時候，因為我係餵人奶，嗰陣又唔識，變咗可能十點幾十一點先同佢去瞓。
以前就算我頭先話開頭嗰隻「好」呢，都係我覺得好嘅啫，但係而家諗返其實都唔算係好啱嘅方法，因為佢一開始不嬲都係奶睡，咁可能開頭BB初生嗰陣好啲，佢成日都瞓㗎嘛，但係去到三四個月開始，佢都係奶睡，但係佢可能每晚一兩個鐘就要醒一次，又要埋身啜一啜先至再瞓(C：呢個係好常見嘅情況)。
嗰陣都想佢瞓BB床嘅，但係因為佢成日奶睡，你知我哋半夜好攰嘅時候，就會抱埋佢喺個大床度一齊瞓，一齊埋身，因為對媽咪嚟講感覺係最舒服，唔使抱你抱去，然後夜晚又凍，佢又攰咁樣。但係嗰段時間好迷失，因為有時我瞓到半夜起身，「咦，原來個BB抱咗喺BB床喇？」 原來迷迷糊糊之間我抱咗佢喺床我都唔知，即係好攰同埋榨乾榨淨嘅感覺。日頭就有姐姐幫我湊，但佢可能都係抱睡；有時我湊，就都係奶睡。
去到佢六七個月大，我就真係好辛苦，咁嗰陣有個朋友同我講，原來有sleep training呢樣嘢。咁樣我就search，就搵到Catherine。
C：咁嗰陣時認識到dolce sleepers，但係有冇啲乜嘢疑慮或者，因為我相信始終嬰幼兒睡眠喺香港嚟講係好新嘅一件事，你搵我嗰時我我都係啱啱開始咗幾個月，你係好早期搵我幫手嘅一個媽咪。嗰陣時你聽到呢一樣嘢，你真心講，你信唔信呢？
P：其實我搵你之前我係睇咗本同sleep training有關嘅書嘅，係一個台灣嘅作者嘅書，咁我睇咗啲好basic嘅資料，其實幫到啲啲啦，但係就未完全解決到個問題，所以我有少少background，我知道呢樣嘢係咩嚟。
但係搵你之前，其實老實講我都有疑惑。咁但係好在我老公支持，因為佢見我已經得返半條人命，佢就話：「咪試吓囉，唔得嘅話唔會差咗吖嘛，咪一樣，咁你咪試吓囉」。咁我就抱住呢個「試吓囉」嘅心態嘅。
C：好多時候都真係去到最底，都冇得再跌嗰個位，就知道真係要做啲嘢。嗰陣時我同你係做一對一電話諮詢嘅，咁你覺得有啲乜嘢可以幫到你，同你睇本書上面有啲咩分別呢？你對成個過程嘅感受又點樣呢？
P：因為我覺得睇書係好theory嘅，即係佢寫咗好general嘅一啲concept，例如一個BB睡眠嘅清醒嘅週期有幾長，唔應該做啲咩，佢講咗一啲好basic嘅嘢。
但係同你傾計嗰陣，我覺得就係會個人化啲，同埋你會了解吓，嗰陣可能你會問我可可喊咗幾耐，咁我覺得有一個人guide住你去做係唔同啲嘅，因為就等於你做運動，你自己可以做運動，但係你請一個personal trainer，佢又係會guide住你，畀到啲motivation你，畀到啲信心你。
因為嗰陣我記得開頭可可training嗰陣都有喊，然後我會同你講：「佢喊緊呀，我好想入去抱佢呀，我老公又好想抱呀」，我同你講呢啲忐忑。但係你會同我講話：「你試吓等多十分鐘先啦」，同埋我哋會用嗰個CCTV睇住佢啦，安全情況底下做呢件事成功嘅機會大啲。
C：係呀，有一點好重要就係，通常我哋好多時候RIE育兒法都係嘅，就係任何情況我哋可能都先等一等。不過有一個位就係我哋等嘅原因，唔係話要等exactly幾多分鐘，呢一個位需要澄清返少少，因為每一個其實都情況都唔同，頭先你都有提到，就係睇返CCTV嗰樣嘢，即係睇返個監視器，睇返個BB嘅情況，去決定究竟嗰個位入定唔入。
當然如果BB已經喊到想嘔，甚至想爬出嚟，當然我哋就即刻入去啦。但係如果你睇個BB嘅喊聲，因為好多時候我做一對一諮詢嘅時候，我就會同啲媽咪傾，或者佢會send條片畀我睇吓，我哋決定睇吓個BB喊嘅情況係點樣，究竟佢係掙扎性咁樣喺度喊，即係可能咿咿哦哦咿咿哦哦，喺度喊吓停吓喊吓停吓，「睇吓有冇反應先」嗰隻？定係一直係情緒性尖叫嗰隻大喊？變咗我哋嘅處理方式其實會唔同。
所以所有數字其實只係一個參考，如果你等，你覺得唔對路，梗係入去啦，唔會話一定要等足咁耐先至入去，但係會大概有一個maximum嘅時間。因為好多時候，每一個人對於哭泣嗰個
接受度唔同，有啲媽咪可能真係覺得BB喊就覺得好辛苦，好想入去抱佢，正常嘅；但係有啲媽咪會覺得，我真係要去做一個改變，我有決心嘅，所謂忍得嘅，當然佢都好想入去，但係佢會忍嘅。但係有陣時個情況就係，如果BB真係physically有啲嘢令到佢唔舒服、瞓唔到嘅時候，我哋等其實冇意義。所以定個時間嗰樣嘢，就係話最終去到呢個時間如果都仲係爆喊得好犀利嘅話，你真係要去睇吓佢有冇啲咩需要幫忙。例如最常見嘅情況，可能條片污糟咗要換，佢真係唔舒服、瞓唔到，你等一個鐘頭佢瞓著咗，但係可能過一陣間佢又會再醒，或者令到皮膚唔好呀，咁當然都唔好啦。
所以你講得好好嗰樣嘢就係，提到個CCTV，睇住個監視器，我都好建議好建議，無論係咪做sleep training都好，其實都可以裝一部監視器。就算BB同你同房都好，但係日頭小睡佢可能佢都係自己喺房、喺床仔度瞓嘅，咁樣你裝監視器你都可以睇到：「咦，有啲聲喎，究竟佢真係醒咗定係未醒？」呢個都好重要。
嗰陣時可可有一個好特別嘅情況係，我喺兩年以來第一次遇到咁嘅情況，亦都係唯一一次。你又可唔可以分享一下呢？
P：嗰陣我搵你之前個情況係好差，但係第一晚做sleep training呢，Catherine係叫我有張凳仔喺佢隔離陪住佢瞓，但係就唔抱佢。佢都係喺度喊咁樣，因為嗰陣七個月大，佢未識企起身就好啲。咁然後喊吓喊吓，我唔記得喊咗幾耐啦，可能十分鐘定係二十分鐘，喊到咁上下突然間我要去洗手間，咁我就出咗去。
點知返返嚟神奇嘅事就發生咗喇，佢就瞓著咗。咁然後我就message Catherine去講呢件事，大家都覺得好神奇。所以嗰日係第一晚定係第二晚嚟㗎，應該係第一晚，Catherine好似連嗰份類似manual嘅嘢都未畀我(C：安睡寶寶都未出畀你)，然後已經有呢個好大嘅progress，咁係畀咗個信心我嘅，我覺得畀我知原來BB係有能力自己瞓著。
同埋我發現一樣嘢，其實我喺度係阻住佢瞓覺。每個BB都唔同嘅，有啲BB可能有人陪住先安心，我嗰個係越少distraction，因為佢原來對聲音、光、所有有嘢都好敏感，所以有個人喺度係令佢更加醒。
C：其實反而係有個騷擾喺度。因為當然BB好細個嘅時候，佢喊我哋都會想陪佢、安撫住佢、幫佢，但好多時我都會講，究竟我哋去做緊嗰樣嘢真係幫到BB，定係可能騷擾到佢呢？有時候有啲BB可能真係好似可可咁樣嘅情況，佢係對於好多嘢好敏感嘅，咁變咗我哋有時坐喺度望住佢嘅情況之下，可能對佢都有個刺激、騷擾。當然重申呢個係每一個BB都唔同，有啲BB可能你行開少少或者移遠少少，佢都已經係唔得嘅。所以好重要就係RIE育兒法我哋經常都講，我哋真係要觀察BB，去了解佢個情況係點樣，再去諗我哋一個點樣嘅回應方式係最好嘅。
P：係呀，我覺得學識觀察個BB都好緊要。
C：係呀，呢個係最重要最重要嘅一點。
好啦，一開始就搞掂咗啦，但係當然睡眠嗰樣嘢好多時候有ups and downs嘅。可能可可一直都算瞓得唔錯，咁你可唔可以乜嘢分享吓，之後呢年幾兩年中間嘅情況又係點？
P：開頭瞓得好，但係去到佢識企，佢識扶起身，攀住個BB床邊識得企。嗰陣佢一識企，我有message Catherine求救，因為佢one night stand咗好多晚，咁但係都係等佢過囉。其實係大約一兩個禮拜，嗰段時間過咗就好啲。
然後中間都會，例如drop啲nap，一開頭三個nap，變做兩個nap，到而家一個nap，每次drop嗰啲nap都會有少少challenge；但係我覺得慢慢慢慢，你同個BB相處得耐咗，你觀察佢，你識得睇佢瞓覺嗰個signal，你了解咗佢，其實去調節係易啲嘅。
C：係，絕對係。你講咗重點所在，就係我哋如果想BB瞓得好，第一，唔係話一下搞掂咗sleep training就搞掂，唔係話畀錢人，搞掂咗個sleep training就完成；重要嗰樣嘢係媽咪你真係細心去觀察、去了解、去明白你嘅BB。所以點解我成日好強調嗰樣嘢就係，我好希望可以幫到咁多位媽咪爹哋成為你BB嘅睡眠專家，因為你係最熟悉你BB嗰個情況、嗰啲signal等等，你係最清楚。
所以作為一個睡眠顧問，我可以做嗰樣嘢就係，我可能會畀個guidance你，問好多問題，畀你諗吓：「咦，如果咁嘅情況，其實點解呢？點樣處理呢？」等等。我越嚟越覺得我而家個責任係喺呢一個位，我係想guide住大家去觀察、去了解BB，知道自己會去諗，呢個位應該點樣去做呢。
頭先你講過嗰幾個波折嘅位都係好常見，我都收過好多媽咪嘅嘅SOS，就係BB本來可以自己喺張床仔瞓到，但係佢一去到識企，通常呢個年紀係大概八九十個月，我哋就叫做八個月睡眠倒退期，係八至十個月嘅時候會出現嘅，好多時候就係：「佢唔瞓覺，大鑊」，跟住就抱返喇，跟住從此就咁樣嘅情況；跟住之後轉覺都係，三轉二、二轉一，甚至去到兩歲幾三歲唔需要再瞓晏覺等等，成個轉變都係嘅。
好多時候我好建議嗰樣嘢就係，咁多位如果知道即將會發生呢件事嘅時候，因為其實係有個age range，大概咁上下嗰個月齡，例如大概六至八個月去到九個月最盡，佢就要轉兩覺喇；跟住去到十五個月開始去到十八個月呢個期間，亦都係二轉一嘅轉覺期。當你知道呢件事即將會發生，你睇過啲資料，你知道點樣去處理嘅時候，變咗當你真係發生呢件事嘅時候，你會安心好多，唔會即刻騰晒：「點算，發生咁嘅情況，點做好呢？」
所以我好建議就係，預先知道嗰件事發生，唔好等件事發生先，好多時候就係我而家做緊呢樣嘢，work呀繼續去做啦，咁但係到你發生呢件事嘅時候，唔預先諗定點樣去處理或者知道點樣處理好啲嘅時候，就會做咗一啲你之後會好後悔嘅事，例如可能抱返瞓等等。
P：係呀，因為佢哋好識試底線。
C：係，測試我哋嘅底線係BB嘅責任、小朋友嘅責任，呢個唔係關佢哋係唔係特別曳，或者佢嘅性格，純粹小朋友係需要你畀好清楚嘅一條線佢，話畀佢知：呢樣嘢可以做，呢樣唔可以做，咁佢先至可以安心，無論係睡眠上，或者係其他嘅行為上，其實都係，呢個係完全正常嘅一個發展。如果你嘅BB係從來都係yes，乜嘢都唔試，乜嘢都唔去做吓嘅話，反而先至擔心。正如個BB如果唔喊，可能先至係擔心都唔定。
咁對於其他受睡眠困擾嘅媽咪，你有冇啲乜嘢想同佢哋講呢？
P：我覺得就係盡量解決個問題，因為其實做媽咪係唔容易㗎。我個女而家兩歲幾，其實我開頭嗰段時間，我有一段時間覺得：嘩，冇人同我講原來生BB咁辛苦嘅？生BB唔辛苦，giving birth嗰樣嘢唔辛苦，而係湊小朋友係好攰嘅，你要做嘢啦，同埋你都希望有自己嘅生活。咁我覺得當個BB瞓得好嘅時候，我都好believe一樣嘢就係，一個健康嘅媽咪，即係心理、生理健康嘅媽咪，先至可以bring up一個健康嘅BB。
所以我覺得佢瞓得好，我有me time，我去做我鍾意做嘅嘢，我去做我嘅工作，長遠嚟講對我、對小朋友，對個家庭同埋老公，都係最健康嘅嘢。瞓唔到嗰排係好辛苦㗎，瞓得唔好嗰排你係夜晚起身覺得：「唉，又得我一個喇。」通常老公第日都要返工，女人又會抵得諗湊埋佢嗰晚。但咁樣其實唔捱得好耐… 我見到有啲媽咪可能捱到身體唔好，身體差咗，又得不償失。
C：真係，的確係，夜晚黑半夜醒已經好辛苦，跟住日頭瞓得唔夠嘅時候，情緒都會好大影響，尤其是大個啲嘅小朋友，頭先講嘅測試行為，當你瞓得唔夠嘅時候，你係比較容易忟憎，好容易就會爆，instead of你可以好冷靜去處理；因為處理小朋友嘅情況，你越冷靜其實越容易，但係根本你控制唔到自己。
因為我自己都曾經嘗試過呢個經歷，就係孖仔佢哋兩歲幾嘅時候，開始出現drop nap嘅跡象，佢半夜醒咗開party，曾經有段時期都係日頭容易忟。我明知㗎喇，你見我寫咁多文章，講要保持冷靜，老實講你真係保持到50%嘅時候可以冷靜到、唔會爆，都已經算係咁。
所以瞓得好唔好絕對有直接嘅影響，對於點樣處理小朋友日頭嘅情況，即係你自己嘅情況，親子關係，或者家庭關係等等，都好重要。唔係淨係講瞓得夠，健康呢個已經係基本，生理健康、心理健康都非常非常之重要。
好多謝Pam你今日同我傾計，我都仲有好多嘢其實都仲想搵你分享吓，例如可可啲趣事或者嗰啲關於瞓覺嘅事，有機會可能再邀請你錄第二集啦，拜拜。
