小睡系列 - 常被遺忘的心理因素

之前兩日，我同各位媽咪爹哋分享咗，改善日間小睡嘅兩個要訣 -- 時間同環境因素。呢兩方面嘅建議，都係建基於科學研究而得出嚟嘅結果。

今日同大家講吓，心理上又可以點樣令囝囝囡囡更合作啦！

好多父母都會喺夜晚囝囝囡囡瞓覺前，一齊睇書講故仔，作為睡前儀式嘅一部分。

進行睡前儀式嘅主要目的，係幫BB同小朋友做好心理準備，知道即將要瞓覺。

咁日間小睡，又駛唔駛有睡前儀式呢？係咪都要一齊睇本書？

要有，但唔駛諗到咁複雜嘅！

所謂睡前儀式，除咗沖涼、刷牙、睇書之外，其實仲包括埋其他你冇特別留意嘅部份，包括入房、換尿片、換睡衣、著睡袋、放囝囝囡囡落床、講早抖、熄燈閂門等等…

日頭瞓覺之前，都一樣需要完成以上幾個動作，咁其實咪就係一套睡前儀式嚟囉！

所以，所謂嘅日間睡前儀式，好多時其實就係晚間睡前儀式嘅最後5分鐘（整套儀式大概係15-20分鐘）。

請睇睇以下例子：

• -晚間- -日間-

• 餵奶

• 刷牙

• 入房 入房

• 睇書

• 換片換睡衣 換片換睡衣

• 著睡袋 著睡袋

• 熄燈 熄燈

• 唱歌 唱歌

• 落床 落床

• 講早抖 講早抖

• 閂門 閂門

嬰幼兒對任何變化都非常敏感，容易受刺激過度、產生不安或抗拒感。當你每日以同一個次序進行準備入睡嘅動作，就會成為一套佢哋能夠預料得到嘅模式，令佢哋感到安心，更有安全感，自然更容易放鬆瞓得著。

當你囝囝囡囡大個啲，開始有主見嘅時候，睡前儀式就更加重要。每日定時定候同一地點做同一件事，會成為習慣，令佢更願意合作，甚至開開心心落床休息（真係可以㗎，真係唔駛次次瞓覺都開作戰mode㗎！）

咁有媽咪又問嘞...

「一開始氹BB瞓佢就喊，佢係咪怕咗瞓覺呢？」

頭先都有講，BB對任何轉變都非常敏感。

原本玩得興高采烈，突然畀人抱起咗，帶入去黑蚊蚊嘅房入面，然後唔知咩事被左抱右抱，又打橫又打直，行嚟行去，patpat仲猛咁畀人拍拍拍...

試吓代入BB嘅角度，你專心做緊一樣嘢時被打擾中斷咗，你都唔高興啦，係咪？跟住仲要唔知會發生乜嘢事，又點放鬆得到去瞓覺呢？

應該點做？就係同佢預告即將會發生嘅事，畀BB一個過渡期，幫佢做好心理準備嘞！

聽日，我會同大家講吓一個好多人諗極唔明嘅問題 -- 點解抱住孭住可以瞓2個鐘，放床會30分鐘就醒？

***