媽媽分享 - 睡前儀式

睡前儀式非常重要

係令BB安心入睡嘅重點

「追開Dolce Sleeper嘅都知我成日提到唔好畀BB/小朋友疲勞過度，呢點係生理上嘅需要。

而喺心理上，亦都需要幫BB/小朋友做好入睡準備，令佢哋能夠懷住愉快嘅心情入睡。」

睡前儀式嘅重點，係要每晚都以同一個次序去做一系列準備入睡嘅活動，包括入房、換片、餵奶、熄燈、開白噪音等等。一步一步慢慢去做，至能夠令BB明白到做完A做B，做埋C跟住就會瞓覺，成為習慣就自然會安心，願意合作去準備入睡嘞！

睡前儀式更加係培養親子關係嘅好機會，所以同你囝囝囡囡保持住connection非常重要，如果你只係抱住「快手攪掂掉佢落床」嘅心態，其實可能會引致反效果...

以下係「 睡眠調整全面睇」網上課程一位媽媽嘅分享（BB13個月大）：

好多謝 Catherine 一直細心解答問題，由follow page 到workshop, 我學到好多嘢，同埋了解多咗小朋友心理，減少咗哄睡方面嘅壓力。

喺呢個兩星期小朋友晚間睡眠有好大進步，由奶睡＋夜瞓＋夜醒，進步到而家可以放床仔拖手入睡，喺床仔15分鐘度就已經瞓著，同埋少咗夜醒（只有一兩晚接唔到覺喺半夜12點幾喊，輕輕講「媽媽喺度」，就可以瞓返，以前要輕拍一陣），簡直係媽媽嘅救星

本身係所有所謂睡前儀式同時做（包括著睡袋+刷牙+睇書）之後熄燈食奶，而家仔細分開做：

換片順便換睡衣

去廁所刷牙

入睡房爸爸幫手著睡袋

爸爸攬攬抱抱say goodnight之後離開房

叫佢自己埋嚟媽咪度食奶

食完自己㨂書睇

睇完自己熄燈

抱起輕聲講今日做咗咩（主要講佢知咁咁咁做晒啦，下一步就瞓覺）

然後話佢知放床仔瞓，媽媽會陪佢

say goodnight + kiss

拖住瞓

頭一兩日用多啲時間會抱佢同佢喺床仔都會扭抱，但第三日神奇地一放床仔就自己攤喺度啜手指幫自己瞓，我一直輕輕咁拖/掂住佢。尋晚試到佢未瞓著同佢講我會坐喺度陪佢，就唔洗掂住瞓。