小睡系列 - 可預測到的習慣因素

你囝囝囡囡係咪成日瞓得30-40分鐘就會醒呢？

抱住孭住可以瞓得耐啲，但放落床嘅話就好難瞓得長？

今日同各位媽咪爹哋講解習慣因素啦！

解釋少少背景資料先，無論大人小朋友定BB，喺睡眠周期轉換時，都可能會略為醒一醒，呢個係好常見而且正常嘅事。

當你抱住囝囝囡囡氹到佢瞓著，之後放低佢喺床上繼續瞓，就算轉換成功（你明我咩意思 ），佢都可能好快會醒，點解呢？

嬰幼兒嘅睡眠周期大概係40分鐘，每個睡眠周期尾段都係淺眠期，佢感覺到自己唔再喺媽咪溫暖嘅懷抱之內，跟住擘大眼發現自己喺一個陌生嘅地方，唔見咗媽咪，即刻嚇到大喊，又點會能夠再瞓得返呢？

同樣道理，當你放囝囝囡囡喺孭帶度，因為睡眠環境冇改變，所以佢就可以安心繼續瞓落去嘞...

咁即係日日都要抱住孭住，唔可以放低佢？

當然唔係啦！我相信BB天生就擁有自行入睡嘅能力，其實只要時間掌握得好，係可以無須奶睡抱睡搖睡都可以瞓得著㗎！

如果你囝囝囡囡只得0-5個月*，你可以由朝早第一覺開始，喺清醒時間完結前15分鐘放佢落床，等佢習慣咗之後就做埋第二覺，之後第三、第四覺... 記得要留意返環境因素呀！

如果你囝囝囡囡已經滿6個月，由於佢哋對一向嘅入睡方式已形成依賴，所以需要由夜晚開始改變，等佢習慣後至改埋日頭。喺呢個年紀，一個穩定嘅作息時間表係成功嘅關鍵。

補充返一句：日間小睡長度一般要去到5個月左右至開始穩定，所以如果你已經做晒呢幾日小睡系列文章所講嘅幾點，囝囝囡囡仍然瞓得半個鐘就醒，呢個並唔係你嘅問題，純粹係BB需要多啲時間，至能夠銜接到睡眠周期嗟！