用錯哄睡方式，可能係train緊佢喊
你知唔知道，好多時BB氹極都唔肯瞓，係由於不利睡眠嘅哄睡方式所致？
例如：哄睡時開燈同播音樂、不斷轉換抱嘅方法、又抱又行又拍又唱歌...
呢啲做法，對BB其實刺激多於安撫，開燈仲會抑制大腦分泌睡眠荷爾蒙，咁又點會瞓得著呢？
我相信，好多哄睡習慣，都係日積月累慢慢加上去嘅。但呢個其實正正係問題所在...
當你set咗咁多條件，決一不可，咁你係喺度整蠱你自己…
之不過，其實咁做都未算係最難攪！
令BB最不知所措嘅，係「哄睡方式不一致」，即係一時抱睡、一時奶睡、一時抱去大人床、一時就唔理佢由佢喊...
咁樣做，會令BB覺得好混亂，唔知即將會發生啲乜嘢事，亦都未能習慣一個入睡方式。氹極都唔瞓，唔係BB唔想瞓，而係頭都暈唔知你想點呀！
除此之外，有啲媽咪想畀BB練習自己瞓，於是放床畀佢先試吓，唔得再抱返。
呢個方式，對於初生BB係work嘅，但對於6個月以上嘅BB嚟講，咁做等如train緊佢哋喊。因為佢哋知道只要一直喊，媽咪/爹哋/或其他照顧者最後都會抱佢，咁BB學到嘅係只要喊得耐啲大聲啲就會有人抱…
所以，如果你最後都係會放棄嘅話，咁我會建議你不如唔好開始。
想BB瞓得好，並非單獨改變入睡方式就得，係需要同時調整好各項安睡因素，例如掌握好開始哄睡時間，營造好安睡環境等。
未全套做好嘅話，就算BB喊到瞓著，都一樣解決唔到夜醒爆喊嘅問題…
