個案分享 - Mia
媽咪blogger分享
照顧媽咪嘅情緒亦非常重要
更正：Yelly媽媽同我講返，其實Mia好早已經能夠自行入睡，只係12個月睡眠倒退期時，有一段時間冇咁順利，而家已經回復正常
BB：Mia（諮詢時8個月大）
「睡眠問題：作息時間不穩定，需依賴抱睡，一晚醒幾次」
Mia係我一個比較早期接嘅case，喺做完諮詢後4日已經能夠一覺睡到天光，亦能夠安然喺床上入睡，無須再依賴抱睡
Yelly媽咪間唔時都會message我問吓意見，早幾日佢話我知，Mia終於都能夠自行入睡，連陪都唔駛人陪嘞！
有人可能會覺得... 吓？要用幾個月*至做到自行入睡？人哋3日就攪掂㗎嘞喎！
我認為，想BB或小朋友能夠安然入睡，顧及媽咪（或其他主要照顧者）嘅情緒健康非常重要。
所以，我唔會要求做諮詢嘅媽咪爹哋，做佢哋唔願意做嘅事。例如放低BB自己一個喺床度，大人喺出面聽住BB喊，但唔准入去，一定要等到夠鐘至可以入房安撫...
呢個方法唔係唔work，但如果媽咪因為咁而攪到自己好大壓力，甚至覺得好內疚嘅話，呢啲情緒最終都會去到BB身上，令佢無法安心瞓覺。
喺做諮詢時，我好多時都會做埋媽咪嘅啦啦隊，同埋心理輔導員，令佢哋有力量繼續堅持落去。
而且，我有時亦會畀媽咪自己決定進度，喺佢覺得ready嘅時候，先至行多一步（當然都要視乎BB/小朋友嘅情況，但一般嚟講做到床上入睡，睡眠質素已經會有好大改善）。
*咁其實又唔真係一定要好耐至做到自行入睡嘅，呢個case係即日得咗
《未開始訓練就已經成功自行入睡》
順便講一講：
自行入睡嘅定義，係你放咗BB落床後，就可以離開間房，佢會自己由清醒，慢慢感到有睡意，然後喺床上瞓著覺。
所以，如果你陪住佢，仍未算係自行入睡㗎！ 而床上入睡嘅意思，即係唔再奶睡抱睡搖睡孭睡咁解。
兩者嘅分別，在於自行入睡係完全冇你嘅存在，都可以瞓得著。而床上入睡，其實只係自行入睡嘅第一步，當BB習慣喺床上入睡，你就要慢慢抽身，令BB唔再需要依賴你至瞓得著。
