點樣幫BB從小打好睡眠基礎？
BB天生就擁有自行入睡嘅能力，只要移除干擾睡眠嘅因素，任何BB都能夠成為甜睡寶寶！今集0-3歲寶寶podcast，我邀請咗Mandy媽媽，同大家分享佢點樣同囡囡Amanda從小打好睡眠基礎，到而家21個月都仍然瞓得好好。
“上完course後，我信心大咗好多，因為知道小朋友發生乜嘢事，而唔係所有嘢都估估吓。好多坊間嘅迷信，都一一解開，而且覺得自己對小朋友瞭解深咗。”
Click下面左邊嘅三角形箭咀，即能收聽（21:04）
文字版本請繼續拉到下面 👇
文字版本
C：Hello Mandy。
M：Hello 大家好。
C：好多謝你接受我嘅訪問，你囡囡Amanda而家廿一個月喇，係咪？
M：係呀，而家廿一個月。
C：你係算你好早期認識dolce sleepers嘅一位媽咪嚟㗎，嗰陣時Amanda得兩個月。
M：係呀，嗰陣時囡囡兩個半月左右，本身佢夜間睡眠都OK，但係可能佢日頭嘅時候成日都有三十分鐘魔咒，瞓得唔係咁穩定，有陣時都會有啲疲勞過度嘅跡象，日間小睡非常之唔穩定。我嗰陣時都有陪月姨姨嘅幫手，但係都唔係好能夠解決到呢件事，所以當初因為呢個問題就驅使我上網去搵更多關於嬰幼兒睡眠嘅知識，好好彩嗰陣時就搵到你個page，所以我就報咗你嗰個零至五個月嘅「健康睡眠工作坊」。
C：咁你喺呢個工作坊入面得到啲乜嘢資訊，你覺得係最有用、最幫到你呢？
M：因為我一開始就零至五個月，我覺得呢個工作坊真係一個非常之好嘅foundation，for一啲新手爸爸媽媽，因為嬰幼兒睡眠知識係比我想像中，或者比身邊嘅朋友，或者陪月，或者四大長老話畀我知嘅內容更加多、個area(更加闊)。
例如關於疲勞跡象，點樣去觀察、去了解小朋友有關於睡眠各方面嘅需要，睡眠環境，清醒時間，睡眠週期等等，其實都係畀咗一個好豐富好豐富嘅內容畀爹哋媽咪去知道、了解，從而去觀察小朋友。基本上上完呢個course之後，我自己信心大咗好多，會知道小朋友究竟發生緊乜嘢事，而唔係所有嘢都估估吓，跟住就聽好多坊間嘅迷信，又係要責米袋呀，又話要畀啲被佢咬呀，whatsoever，又話要播好多兒歌呀，或者各樣嘢。會有好多好多坊間嘅迷思都終於一一解破，咁就覺得自己真係了解咗小朋友。
同埋我覺得上完呢個course，有咗呢個foundation之後，真係會幫助我點樣幫小朋友去build up一個比較好嘅睡眠routine。當遇到一啲，譬如四個月呀、八個月呀、轉覺呀、歲零呀，每個階段嘅睡眠倒退期嘅時候，就係因為你本身嗰個knowledge好夠，其實會比較有信心去幫小朋友去渡過每一個唔同階段嘅睡眠倒退嘅時間。我覺得當爹哋媽咪如果係有信心嘅時候，小朋友都會feel到。所以其實基本上touchwood，so far由兩個半月至到而家廿一個月，呢一年幾期間，佢嘅睡眠質素都算非常之好，中間都有倒退期，但係都喺一個正常嘅週期佢過完之後，咁其實佢都已經可以去back to normal，就再繼續瞓得好好。
同埋我覺得最開心嘅事係，真係成家人都好開心嘅事，佢基本上到而家識講嘢，可能佢比較早去識得表達自己，語言嗰方面，可能佢基本上由十四、五個月開始，佢就開始識同我講拜拜。佢由細到大都係自己一間房瞓，每次我哋做完睡前儀式，佢就會好開心咁同我講拜拜，佢嗰陣時係醒㗎喎，咁我就會離開佢嘅房；見到小朋友係好安心見住爸爸媽媽離開，佢就可能喺十分鐘、十五分鐘之內就會自行入睡。
而家再到大個少少，因為佢廿一個月喇，佢真係識得去用一啲好簡單嘅字去組成一啲比較短嘅句子，有陣時我會問佢：「就嚟瞓覺喇喎，你開唔開心呀？」，跟住佢就會講「開心」， 然後你問佢「鍾唔鍾意瞓覺」，咁佢就「鍾意」咁樣，有陣時佢仲會喺度扮瞓覺，喺度扮打鼻鼾，跟住佢就會自己喺度笑。所以我就覺得好appreciate，覺得囡囡對於睡眠嘅sentiment係非常之positive，我覺得係一件好好，同埋爹哋媽咪都好開心嘅事。
C：係呀，呢個其實都係我好想好想做到一個目標，我唔係話想話畀你聽，呢一個方法，你咁樣做，呢個時間表令到你個BB瞓覺，其實我會係諗長遠少少，我真係希望能夠長期可以解決或者避免一啲睡眠問題，就真係令到BB、小朋友覺得瞓覺係一件開心嘅事。佢冇抗拒嘅時候，就算你頭先講可能倒退期、whatever，呢啲情況發生嘅時候，其實都比較容易去處理，好多時候都係。
當然好重要嗰一點就係，因為我知道你一直都係好用心去吸收好多知識，呢個真係好重要，因為嬰幼兒睡眠如你所講，其實真係好闊，真係有好多嘢可以講。所以點解我喺專頁，兩年每一日都可以出一個post，真係有好多好多嘢可以去講。所以變咗有好多位，你可能真係冇諗到會影響嘅，例如你同我分享過，個溫度原來凍少少真係可能會令佢醒咗好耐(M：就係爭一度嘅啫)，原來好多時候睡眠環境呢個位係大家都會輕視咗，真係唔會覺得嗰個係安睡因素，覺得唔係好重要，重要梗係要時間表，梗係要佢自行入睡，做到呢樣就work㗎喇，但其實唔係。好多時候睡眠環境其實係最首先我哋要做好，我哋最容易、最能夠control得到。亦都好多時候，最近都有幾個case媽咪同我講話：小朋友nap 2成日都瞓得唔好，但係後來佢真係：「唉，算啦，好啦，我試吓啦」，佢真係整黑咗間房，個nap 2已經自然延長咗，根本佢都唔需要調整個時間表或者乜嘢，睡眠環境呢一點真係好重要。
所以點解我好hard sell好多嬰幼兒資訊，覺得好想同大家分享，就真係當你知道嗰個問題真正嘅原因，你先至可以去解決。因為正如你頭先所講，坊間會有好多方法，(inaudible)我唔可以咁樣講因為唔可以一概而論，但係坊間會有好多方法點樣令BB瞓得好，但其實佢哋可能會係所謂嘅頭痛醫頭、腳痛醫腳咁樣嘅情況，冇真係佢退後一步去諗成件事個做法。甚至可能其實嗰個情況，可能佢個成因唔係得一個都唔定，可能有幾個成因。
例如最常見嘅，BB好細個瞓唔到，畀佢飲七星茶、保嬰丹嗰啲，咁嗰啲可能話幫助消化，中醫話可能有幫助，但係你BB可能除咗消化問題仲有其他原因影響令到佢醒。所以你淨係針對一點，姑勿論佢有冇用都好，雖然我哋作為睡眠顧問我哋就唔建議畀BB食任何呢啲中成藥等等嘅嘢，但係姑勿論佢有冇用都好，但係如果佢根本唔係BB睡眠問題嘅成因嘅話，你淨係聽返嚟，呢個方法又試吓，嗰個方法又試吓，好多時候好多媽咪不斷試好多唔同嘅方法，因為個個都想個BB瞓得好、自己都可以瞓得好㗎嘛，但好多方法都唔work嘅時候，就覺得「無計啦」，就放棄，覺得唔work喇。
所以我好堅持嗰樣嘢就係，健康睡眠其實我哋真係講科學化、科學睡眠嗰樣嘢，同埋個小朋友個心理都真係好重要好重要，就係好多時候我都會話，RIE育兒法我哋好建議觀察BB個情況，頭先話如果佢有個睡眠問題，我哋點樣知道係咩原因呢？觀察係好重要嘅一點嚟嘅。
不如你同大家分享吓你有冇啲咩經驗，憑觀察或者了解Amanda去搵出一個睡眠問題，可以得到解決呢？
M：可能因為呢個就go back to比較初期啲，一睇完個course嘅時候，例如有啲疲勞跡象嗰啲，我都會多咗了解，因為之前可能大家都會覺得喊嘅時候，BB就係攰。但係當其實BB喊、哭泣嘅時候，已經握住拳頭、各樣嘢，呢個時候其實已經係疲勞過度。所以當初唔知就覺得呢個時候先氹BB瞓，當然一係就氹好耐，一係就三十分鐘魔咒，因為佢個睡眠週期，佢太攰嘅時候瞓，所以佢都唔會瞓得耐。
但係透過呢個course我就了解原來疲勞跡象，第一我哋要留意返佢嘅清醒時間，每個月齡嘅BB清醒時間都唔一樣，咁當然個數字就死嘅，但係我哋都要觀察返本身個BB佢自己個別嘅狀態，可能有陣時個運動量唔同，有陣時可能刺激會多咗啲，或者可能嗰日樓上裝修嘈啲，等等。每個BB都唔同，每一日可能都有少少唔同，尤其是佢比較細嘅時候，佢受刺激嘅程度可能會敏感啲、高啲。但係可能你會見到佢眼附近已經開始紅紅哋，跟住又開始唔望你、避開你眼神，或者喺度發吽哣咁樣。其實跟住你再留意返個清醒時間，你就已經可能知道：「咦，差唔多啦，佢開始攰啦」，咁嘅時候其實你已經要開始你嘅睡眠儀式或者可以進行睡眠儀式跟住開始安排小朋友去瞓覺。
咁樣我就發覺哄睡嘅時間，或者當初佢太細個，兩個零月，都仲係要靠抱一抱，或者用啲紗巾、睡袋、綁一綁、著一著，等佢有少少緊，好似畀媽咪包住嘅感覺，開始已經放床，就唔好等佢喊嘅時候先放床。
咁嘅時候其實慢慢慢慢咁，基本上三個半月左右，我憑住呢兩樣嘢：觀察佢睡眠疲勞跡象，同埋了解佢嗰個睡眠需要、清醒時間嘅需要嘅時候，其實一個月左右，BB咁細都好不經意地已經幫到佢好自然地自行入睡，就唔需要我再氹佢瞓。
所以我覺得就係因為個工作坊嘅information，同埋透過自己嘅觀察，去幫小朋友去做到呢一件事。
C：係呀，你講得好好有一句就係，數字係死嘅，呢個都係我同好多媽咪講嘅一樣嘢，好多人都會覺得想BB瞓得好，初次接觸健康睡眠嘅時候，會發現原來BB有時間表㗎，跟住就好想要(?)：「我而家BB六個月大或者十一個月大呀，你有咩時間表畀我呀？」 但係通常我都會答嗰樣嘢就係，當然每一個年紀，正如你所講，佢有嗰個清醒時間其實都有個range。
補充返少少，清醒時間嘅意思就係講緊BB瞓醒擘大眼去到佢合埋眼瞓返中間嗰一段時間，初生BB清醒時間其實好短，可能講緊四十五至六十分鐘，其實佢醒咗，你餵完奶、換完條片，差唔多時間都要瞓返㗎喇。變咗亦都受好多嘢影響，雖然每一個月齡有一個range，但係如你所講可能佢會受好多刺激呀、活動量呀、或者佢上一覺瞓成點等等，其實全部都會影響。
講返時間表嗰樣嘢，我好想強調就係，我唔會話「你呢個月齡呀？咁好啦，跟呢個時間表去做啦」；當然你係需要有一個basic、有個框架，嗰個就係用清醒時間去做一個框架，但係之後你要再觀察返你個BB去知道點樣再調整個時間表，呢一個係好重要嗰一點，因為BB唔係機械人。
M：我都想補充一點就係，我覺得真係幫到BB嘅因素就係，其實全家人所有照顧者都要同心合力，同埋都一齊去，無論睡眠儀式又好，各樣嘢都好，都要consistent，都係好重要嘅一樣嘢。
同埋我覺得更加重要一樣嘢，就係要將睡眠成為小朋友嘅一個priority。
因為真係好多人會覺得：呀，佢可能今餐食晏咗，或者飲奶嘅時候飲耐咗、啜耐咗，或者我都知佢嗰個時候，我已經望到佢攰或者各樣嘢，都已經知佢差唔多要瞓。我會覺得，可能今餐爭幾啖未食完，但係我知道佢已經開始攰，咁我唔會話「食埋先啦，畀多半個鐘去食啦」 ，過晒佢嘅清醒時間，或者你寧願佢捱眼瞓都要食埋啖飯。但我就會可能係調返轉，我就會prioritize佢瞓覺，係緊要過食嘢或者其他活動，我就一定寧願佢瞓咗先。
當然我唔會餓住佢，我嘅前提係我已經預好咗時間，但你知道可能有時小朋友食嘢，或者各樣嘢，你總會可能，可能食食吓要去poo poo，然後可能已經食到一大半但係仲有少少，或者時間爭少少、遲咗嘅時候，我都會prioritize佢瞓覺嘅作息先。最多佢可能瞓醒、休息好、夠喇，然後我就會先至再可能下午茶嘅時候，可能準備返多少少食物，畀多杯奶佢、各樣嘢咁，補充返可能lunch嘅時候食少咗嗰兩啖飯。
因為我覺得其實BB一定要瞓得夠，佢先至會食得好；佢瞓得夠，佢先至會玩得好。所以所有嘢我都覺得係瞓覺要行先，呢個係我哋屋企嘅宗旨，所以全家人都好明白呢件事。所以我哋都唔會勉強小朋友話：可能夜晚有friend、家庭聚會，或者晏晝有啲咩朋友去嗰度，但係如果我知道嗰個時間阿女要瞓，其實我都會寧願佢瞓夠，先至會再出街，就唔會話「瞓少個nap唔緊要啦」，或者「今晚……」， 因為佢到而家二十一個月，都仲係七點半到七點九左右瞓，都仲係好早瞓，咁耐以嚟其實佢都冇變過，佢都係好早瞓。所以我唔會話因為可能自己有啲私心話想帶佢點點點，但係就犧牲咗佢嘅睡眠時間，我都真係好少、都基本上冇咁樣做過，我哋都係以佢睡眠為重。所以我覺得呢個都係好緊要嘅一樣嘢。
C：呢個priority當然每一個家庭都有唔同選擇，不過我想講，頭先你講過如果BB食嘢同埋瞓覺嗰樣嘢，呢個我都非常之同意，就係BB其實瞓覺嗰個情況能夠控制嘅係比食嘢係細好多，我哋真係會控制唔到，你真係過咗嗰15分鐘，入睡已經會好難，同埋會瞓得唔好；但係食嘢真係食多食少嗰兩三啖或者嗰幾十ml嘅奶，其實可能影響係冇咁大。
所以好多媽咪都會話：「我BB而家係一定要每三個鐘頭食一次奶，或者每四個鐘頭食一次奶」，跟住就話：「但係我未夠鐘食奶，但係要瞓覺喎」，或者話「要食奶但係又要瞓覺喎，咁點樣做呢？」 成件事會好混亂。但其實如果你將睡眠擺咗去priority，當然六個月打後比較容易啲去做到，就係你有個穩定嘅作息時間表，咁你就知道：BB瞓覺之前、或者醒咗之後，呢個時間就去餵奶喇，instead of你定死咗一定要三個鐘、四個鐘食一次。
呢個亦都去返BB唔係機械人嗰個位，我哋大人都唔係定死咗每日一定咁多個鐘就食一次嘢，有陣時食多食少都OK，你呢餐食少咗下餐咪食多啲囉，呢一個位亦都係心態上好重要嘅一點。
好啦時間差唔多喇，好多嘢其實都想同你傾嘅，有機會搵你再傾過啦。
最後一個問題，對於其他受到睡眠問題困擾嘅媽咪，你有啲乜嘢想同佢哋講呢？
M：我覺得唔需要灰心，所有問題都有解決辦法，一定要搵Catherine。但我最衷心嘅建議係，希望會invest多少少時間去了解嬰幼兒資訊先，因為你有咗個basic knowledge、有咗個foundation，其實之後好多問題都會迎刃而解，比較有信心去幫小朋友一齊解決，去了解小朋友、觀察小朋友。所以我覺得冇捷徑嘅，作為照顧者，尤其是係爸爸媽媽，係自己小朋友，呢個我覺得更加要親身hands-on去了解咁樣，就會真係最幫到小朋友嘅一個方法。
因為我覺得小朋友嘅睡眠問題，越早處理、或者越早去設立一個健康嘅routine，個頭開得好嘅話，其實之後條路會非常之……唔好話非常之，只係相對嚟講係會容易啲行。
C：係，好多謝你呢個分享，講得好好，知道資訊之後你會有信心好多，因為你知道嚟緊會發生乜嘢事，加上你打好咗個基礎嘅時候，變咗你知道會點樣處理，BB亦都比較容易重新適應或者回復原狀，呢個真係好重要。
好多謝Mandy你今日嘅分享！
