雨僑Ava聲音分享
Hello我係Catherine，我嘅身份除咗係Dolce Sleepers嬰幼兒睡眠顧問之外，亦係一個一打二嘅孖仔媽媽。
喺過去兩年幾以嚟，我一直都係主要用文字，同大家分享有關嬰幼兒睡眠及育兒嘅資訊。
不過有一日同位媽咪傾開計時，突然有個諗法 —— 得我一個講其實好悶，不如邀請啲媽咪爹哋同大家親身分享啦！
冇諗到，我向幾位媽咪提出呢個諗法，佢哋都一口應承一齊玩！
於是，0-3歲寶寶podcast就此誕生。
第一季，我邀請咗10位媽咪分享佢哋嘅經驗同心得，嚟緊3個月，每星期出一集。
另外，我亦邀請咗3位專家媽媽，回答一啲好常見嘅問題，希望能夠幫到大家更有信心，處理囝囝囡囡喺睡眠以外嘅其他育兒挑戰。
今日第一集，我邀請咗雨僑Ava，同大家分享佢點樣喺2星期內，就成功令佢囡囡哈姐由一晚醒幾次，大幅改善為只醒一次，餵完奶就即刻瞓返。希望可以幫到你更有信心，去面對各種育兒難題。多謝你收聽今集0-3歲寶寶podcast，一齊嚟聽吓雨僑媽媽嘅分享啦！
“相比對上兩次打針，雖然都有出現夜醒，但今次我同先生都鎮定好多，因為首先我哋知道，只要我哋堅持咗呢啲原則，最多夜醒我哋要幫佢接覺，但係不至於全日喺個廳度跑嚟跑去，飯都食唔到。因為我哋知道點樣去處理… 心理上有信心咗好多，因為BB總係有啲ups and downs，打針就係最衝激嘅環節。媽媽如果冇呢啲知識，係會好panic… 「會唔會從此以後一晚醒5次!? 😨」”
Click下面左邊嘅三角形箭咀，即能收聽（17:47）
文字版本請繼續拉到下面 👇
文字版本
今日第1集我邀請咗雨僑Ava，同大家分享佢點樣喺兩個星期之內，成功令佢囡囡由一晚醒幾次大幅改善為只醒一次，餵完奶就即刻瞓返，希望可以幫到你更有信心面對各種育兒難題。
C：好多謝你接受呢個訪問，我記得你係上年九月搵我嘅。究竟你係點樣認識dolce sleepers嘅呢？
雨：因為我囡囡係一個好高敏感度嘅小朋友，喺一個facebook嘅高敏group度有好多爸爸媽媽分享，高敏嘅小朋友都特別多睡眠問題，佢哋分享你嘅facebook page post咗好多免費文章，都講得好深入，所以我就會去睇，見到首先就係你會好肯回覆大家，亦都有Q&A同課程，我自己當時因為都面對緊囡囡瞓覺嘅問題，所以就不如message問吓你邊個課程會比較適合。
C：最初你囡囡嘅情況係點樣㗎？
雨：其實我搵你嘅時候，BB係13個月，佢啱啱12個月左右打完針，再加上嗰排係中秋，佢出咗好多晚夜街、出去食飯，入睡時間去到十點半十一點，分分鐘十一點後先去瞓。一瞓瞓到第二朝七八點，中間會醒四五次。每次醒有時就大喊大吵大鬧，有時就最基本款奶睡；當然我都唔會想佢奶睡得太多，但問題係中間佢有時醒咗直程係好清醒、眼仔碌碌、傾計嗰隻。
我太攰喇，我已經成個月都係咁，好多次出去做嘢之前係完全冇瞓過，大人個半鐘頭醒一次，我瞓都瞓唔返，已經去到完全做唔到嘢嘅階段，所以真係把心一橫想搵人幫吓手。
C：嗰陣時你搵我，我就建議你可以睇咗「睡眠調整全面睇」個課程、嗰啲資料先，跟住我哋再去傾。你睇咗資料，覺得邊個部分最有用或者特別呢？可唔可以分享吓成個過程？因為兩個星期成件事已經有好大嘅改善。
雨：係呀，其實我諗好多媽媽都一樣，會上網睇好多唔同嘅文，亦都有最經典嗰篇，即係擺低BB係間房度喊，幾多分鐘入去一次嗰個，開頭亦都有好多心理建設，就係話唔狠心就唔好做。因為我真係一個唔狠心嘅媽媽，姐姐同老公大家作息時間唔同，我亦都好難半夜三更畀佢喊到大大聲咁樣，完全唔去理佢，對其他人好唔負責任，所以根本嗰啲方法都好難。
上網啲資料可能都係一岩一忽，因為始終我覺得睡眠訓練係一個專門嘅科目，所以大家都唔會成個課程幾萬個字擺上網畀你睇。所以變咗你睇啲唔睇啲，睇嘅時候好難有一個全盤嘅概念，你會好想搵一啲quick fix，例如有冇啲sample schedule；但其實apply喺媽媽身上，你都會發現好難，因為個個小朋友都唔同。
但係睇完你嘅課程之後，我其實一路睇，頭幾日已經一路開始做：有睡眠儀式，亦都開始download埋嗰個app去記錄。BB嗰陣時係兩個nap嘅，兩個nap就更加多嘢紀錄，因為兩餐要就住兩nap去調整。
頭一個禮拜好辛苦，因為佢夜晚仍然瞓得未係好好，我又瞓得唔好，但我日頭樣樣嘢都要去記錄，佢食嘢食成點呀，好眼瞓就收曬啲嘢唔好食、去瞓覺，十一點定十點第一nap咁樣。
當時頭兩個禮拜都好辛苦，但慢慢地佢個入睡時間開始早咗。因為我從來都唔相信佢可以六點幾就開始籌備瞓夜晚嗰覺，佢不嬲早極都九點、十點，只會越嚟越遲，我從來都未試過六點幾同佢準備瞓，咁我就試吓，其實一試就成功。佢第一次就已經係八點半瞓，跟住八點，跟住七點半瞓。你講過最好嘅時機應該係六至八點之間入睡，佢就慢慢已經可以早咗入睡。
早咗入睡就意味住嗰段時間我可以食飯！我13個月以嚟都未試過正正常常兩公婆坐喺度食個晚飯，從來都未試過；七點幾八點佢瞓咗，我開始可以食飯喎。
跟住大家都知道佢可能三四個鐘頭一個cycle，佢會搵唔同嘅方法佢接覺，係會有嘅。佢開頭可能有兩次接覺，可能十二點一次，三四點一次。其實我哋都係奶睡嘅啫，但係總算佢由七八點瞓咗落自己張床度之後，到第二朝六七點，佢係唔會離開佢張床。
我從來未見過呢個情況，對我嚟講係「嘩，原來可以咁樣㗎」，雖然中間當時都係醒兩次，但係差唔多堅持咗一個月左右，佢個夜間時間就好穩定，只係去研究點樣去幫助佢接覺。
C：你係一個好勤力嘅媽咪，用個app記低晒所有時間，呢個可以幫到好多，因為我好多時都強調BB唔係機械人，唔會有一條方程式，或者話呢個月齡就要跟呢個時間表就會work，唔係咁樣。
我自己相信嗰樣嘢，當然我哋會有好多清醒時間、好多嘢畀你參考，但你定咗一個時間表之後，好多時候我都會建議你必須要試行幾日之後，睇吓個情況，跟住再做調整，去適合你BB嘅需要。
因為我地唔係應該要將BB揼揼揼，揼到跟到個時間表；而係相反，時間表係做個框架，諗吓點樣將個時間表揼揼揼，tun前tun後去配合BB嘅需要。當你調整咗個時間表，就好似你所講，日頭瞓得好咗，夜晚黑早啲瞓，調整咗時間表之後成件事有改善，已經理想咗好多。
呢個係好重要嘅一點，好多媽咪都會覺得，頭先你都有講，想BB瞓得好，個個都會諗「做睡眠訓練，由佢喊啦，放喺黑房，由佢喊完瞓著就瞓得好」，但其實真係唔係，我都好想強調，事前準備包括我哋時間表要調整好，頭先你都有提到個睡前儀式，就係講緊我哋去幫BB去做好一個心理準備，等佢知道要去瞓覺。
跟住我哋先去再諗，如果需要去改變入睡方式，嗰個係最後一步。睡眠訓練當然係一個選擇，或者其實都唔一定要做睡眠訓練，因為我都知道香港好多家庭可能佢哋屋企嘅情況，例如雙職父母，你頭先都有提到六至八點係比較理想嘅瞓覺時間，因為BB嘅生理時鐘，呢個時間會比較容易瞓著。但係可能唔能夠呢個時間瞓到，又或者可能屋企有其他人例如長輩，都可能比較難去執行去做睡眠訓練呢一件事。其實唔係話唔可以去做改變，都可以嘅，只不過係由其他方法，一啲比較漸進式嘅方法去做。
你可唔可以講一講你喺呢幾個月或者星期，心態上面有啲乜嘢改變呢？
雨：首先其實由九月開始睡眠訓練到而家二月中，其實中間咁多個月真係需要好多人嘅配合。而家疫情關係大家都唔會出去，但係真係需要好多人配合，所有朋友、家庭成員都知道，五點幾BB一定要食飯，因為佢六點幾要呢樣嗰樣、刷牙、上床睇書、熄燈、搽cream，先至可以七八點瞓。
因為喺你個課程入面都有講到，有啲BB可能十個條件要滿足十個先瞓得著，有啲BB可能易話為啲，滿足三個就瞓得著。我好清楚我嗰個真係十項要滿足晒先瞓得著，所以我要嘅安靜時間就好長，五點後完全唔會有任何食飯嘅安排，呢啲係一啲生活上嘅轉變，都需要其他人配合。好在我工作上都會配合到。
而另外心態上就係比較返兩次打針，一歲針12個月，同埋啱啱經歷咗18個月嘅打針，其實會定當好多，雖然都有一額汗嘅時候，但今次18個月打完針，我哋就根據Catherine嘅建議，都係晏晝同樣時間nap，會有早醒嘅情況出現，但然後夜晚我哋都係保持六點九開始準備入睡，都穩守八點前或者八點左右瞓著。
問題係都會出現夜醒，但係今次我同我先生都鎮定好多，因為首先我哋知道如果我哋堅持做呢啲原則，最多夜醒我哋要諗辦法幫佢接覺，但係不至於我全日喺個廳度跑嚟跑去飯都食唔到，我哋仍然會知道點樣去處理，同埋會過去；同埋觀察到佢個sleep cycle，開頭好驚㗎喎，見到佢兩個幾鐘又醒一次，慢慢地個sleep cycle長返，意味著我哋應該有曙光，佢可以變返打針之前咁。
其實心理上會有信心咗好多，因為BB總係會有啲ups and downs，例如打針就係最衝擊嘅環節，但係媽媽如果冇呢啲知識嘅話會好panic，會唔會以後都係咁樣，從此以後每晚醒五次？
C：係呀，你講得好好，我哋預先知道即將會發生啲咩事，有個心理準備，真係發生嘅時候我哋就唔會亂晒。同埋堅持底線，你頭先都有提到一點好好，就係堅持我哋而家做緊嘅嘢。
我哋好多時候，如果冇去做準備嘅時候，尤其是半夜醒咗唔知點算嘅時候，往往就會做咗好多你之後會後悔嘅事。所以當你明知道嚟緊會打針，或者知道18個月睡眠倒退期，之後會發生呢啲情況，你有個心理準備嘅時候，你個人真係會冷靜好多。
同埋另一點，你頭先提到priority，你自己覺得點樣係最好，屋企人其他人嘅配合，呢個都係好重要。所以可能有陣時唔係每一個家庭都可以順利得到所有人嘅配合嘅時候，唔代表冇嘢可以做，都仍然有好多嘢可以做。
譬如假設可能好多雙職父母，日頭係有其他人去照顧，工人姐姐或者長輩去照顧都好，變咗日頭可能會比較難安排到跟時間表去瞓覺；但都唔代表冇得做，都可以，只要你夜晚黑睇返個時間，掌握返好個瞓覺時間，做返好畀佢可以床上入睡等等，其實都一樣可以做到改善。
所以就係點解我話唔係一條方程式，真係睇返每一個家庭嘅情況去決定：「OK我而家咁樣情況，我希望可以達到呢個目標，我做啲乜嘢可以達到呢個目標呢？」真係要睇返嗰個家庭可以做到幾多嘢，去做一個調整。所以我成日都好強調嗰樣嘢就係，我雖然係一個睡眠顧問，但我好希望可以幫到更多媽咪爹地去了解到你BB嘅需要，知道點樣去做好多唔同嘅調整，點樣處理唔同嘅情況，令到你能夠成為你BB嘅睡眠專家。
我係一個睡眠顧問，「OK，發生呢件事，Catherine點算呀？」當然我好希望可以答到你，可以即刻幫到你，但有陣時三更半夜發生呢個情況，真係好難覆到你。
所以呢一個位，大人、爸爸媽媽自己知道，有個心理準備，知道點樣去做；好似雨僑咁，你好勤力，我聽到你頭先提到我喺啲文章入面講過嘅十個安睡因素等等，睇好多資料真係幫到好多。
心態上面都係，個人可以輕鬆好多，頭先你提到BB早啲瞓覺，大人終於可以坐低食飯，有返個me time，可以做到多啲嘢。好多媽咪都有同我分享，BB早咗瞓嘅時候，可能六七八點已經瞓咗嘅時候，跟住夜晚終於可以有返自己嘅時間；甚至有媽咪同我講，佢時間多到唔知做乜嘢好！
雨：係呀，我開頭真係同老公你眼望我眼，佢七點半瞓咗，咁我哋而家點呀？
原來慢慢地又可以將少少工作安排返夜晚用吓電腦做嘢，之前真係完全冇，24小時on call，好似急症室醫生咁。
C：係呀，小朋友瞓得唔好嘅時候，大人又瞓得唔好，夜晚瞓得唔好又會影響到日頭，除咗瞓得唔好仲會影響到心情；當然小朋友越來越大個，亦都可能越嚟越多情況需要處理，如果大人瞓得唔好，可能都會比較難保持冷靜去處理嗰個情況。
對於其他受睡眠問題困擾嘅媽咪，你有冇啲乜嘢想同佢哋講或者分享呢？
雨：我自己就覺得，一來就係知識，即係譬如上Catherine你嘅課程，又或者搵邊一類型嘅課程去上都好，媽媽其實有好多basic knowledge要知道咗先嘅，例如小朋友唔同月齡睡眠上嘅需要，一啲睡眠儀式嘅基本，BB最佳嘅入睡時間，每一個時期個window有幾長，呢啲都係一啲基本嘅知識，咁樣你就會發現見招拆招，小朋友嚟嚟去去大概都係呢幾瓣。
然後就係生活上面，close friend嘅group chat都已經知道我呢兩個月都唔會出嚟食晚飯，或者再早啲嘅時段、晏晝都唔會約人，因為我晏晝都要觀察佢個nap。其實朋友都要好清楚呢一段時間，畀多啲支持同鼓勵我，我搞掂咗佢，佢瞓得穩定啲，將來先至可以約返大家晚飯。
喺生活上面同家人朋友交代定，都會令我哋好過啲。如果唔係有時我都知道，譬如一啲多長老嘅聚會，「吓，你唔帶BB嚟，早講呀！」咁樣，會好失望，「你唔帶BB，唔洗嚟啦！淨係想見BB啫！」呢啲說話我想講係唔需要理會嘅。當你個BB七八點就瞓咗，然後你每日都爽歪歪嘅時候，你又可以接受一日半日出去，可能有時人地會話「哎呀，點解你唔帶BB嚟㗎！」別人嘅失望你係可以頂得住，真正頂唔住嘅係日日都冇得瞓呢件事。
C：係呀，你講得實在太好，好多時候我哋知道我哋做緊呢樣嘢係對BB好，對我哋自己都好。我成日都講，好重要嘅嗰樣嘢，我哋有咗BB之後，當然我哋唔可能好似之前咁樣生活，維持返一模一樣；但我哋可以做嗰樣嘢係compromise而唔係sacrifice，唔係犧牲自己所有嘅嘢去圍住個BB，全日都不斷係：BB瞓得唔好、不斷喊、BB好多嘢咁嘅情況。
好多嘢我哋可以做到，令到大家、大人同埋BB其實都輕鬆啲，瞓得好其實真係對所有嘢都有好處。
好多謝雨僑你今日同我哋分享。
雨：多謝你嘅訪問。
C：有機會我哋再傾過啦，多謝你，拜拜。
