個案分享 - Mia

媽咪分享
再次證明
識得自行入睡唔代表會瞓得好

BB：Mia（諮詢時7個月大）
「睡眠問題：小睡過短，夜醒」

Dolphin媽媽見到Kelly媽媽嘅分享，即刻就搵我幫手，因為佢嘅囡囡Mia一樣係喺睡眠訓練後，雖然能夠自行入睡，但仍然半夜會醒，同埋日頭每次只係瞓得30分鐘。

由於Mia已經識得自行入睡，同Dolphin初步傾過後，我認為主要問題係喺個時間表度。

BB出世後頭一年，睡眠需要不斷改變，所以作息時間表亦需要每隔一段時間作出調整至得。而且，亦必須視乎之前一覺嘅長度及睡眠質素，而作出相應嘅輕微調整，至能夠避免出現過度疲勞嘅情況 - 小睡過短以及夜醒，正正係疲勞過度所致。

所以，時間表係我做睡眠諮詢時最著重嘅一點，我會為每一個個案編排適齡時間表，同埋講解點樣去作出調整。

BB唔係機械人，做睡眠調整時，我哋要做嘅並非要去改變佢哋，將佢哋個個整到一模一樣，而係搵出適合佢哋生理時鐘嘅作息。

只係一個星期，Mia嘅睡眠問題已經得到明顯嘅改善，日頭可以瞓到超過一個鐘，夜晚亦冇再晚晚醒咗大喊嘞 ！