有方法可以唔再一晚醒幾次？
最令人困擾嘅睡眠問題，應該都係夜醒嘞
點樣可以改善一晚醒幾次嘅問題，甚至令BB能夠「一覺瞓到天光」呢？
最致命嘅一點，亦係香港家庭最常見嘅問題，就係太夜瞓
曾經有一項調查，香港小朋友喺17個地區之中最遲瞓，比最早瞓嗰班小朋友遲咗3個幾鐘囉！
伸延閱讀："How parents tackle bedtime around the world"
每一段時期，BB/小朋友都有唔同嘅睡眠需要。
就算每日嘅睡眠時數足夠，但入睡時段對於睡眠質素亦有一定影響。
最健康嘅睡眠習慣，是跟隨晝夜節律（circadian rhythm）去制定睡眠時間 – 日出而作，日入而息。
因此，2歲前就寢時間應該喺6:30-8點之間。3-5歲小朋友亦不應遲過9點瞓。
咁早！
係呀，其實由4個月大開始，BB就已經可以在晚上連睡10-12小時。所以，如果理想嘅起床時間為7am，咁7pm就應該已經瞓㗎嘞！
你或者會問，咁早瞓，唔會天未光就醒咩#？
我可以好肯定咁同你講，夜瞓至係早醒嘅原兇！
其實，好多睡眠問題都是因為夜瞓所引起：
1. 難以入睡
由於已經超過咗入睡嘅最佳時機，大腦會分泌壓力荷爾蒙（cortisol），令身體能夠繼續支撐下去。所以，當你見到囝囝囡囡夜晚極度興奮，咁其實係因為佢哋已經攰得滯，進入咗精神異常亢奮嘅狀態嘞...
2. 夜醒
壓力荷爾蒙亦會影響睡眠質素，令BB/小朋友無法連接睡眠週期，於是半夜瞓唔冧不斷醒。
3. 早醒（6am前）
睇起嚟似乎有違常理，但其實當BB/小朋友夜晚就寢時已經疲勞過度，反而會瞓得唔穩，喺睡眠荷爾蒙（melatonin）處於低水平時會易醒，無法再次入睡。
4. 長期睡眠不足
研究顯示，習慣夜瞓嘅BB/小朋友，全日睡眠總時數會較少。就算日頭瞓得耐，亦唔能夠補得返㗎！
提提你，記得確保最後一次小睡時間，同夜晚就寢時間之間有合適嘅清醒時間，咁BB/小朋友至會感到足夠睡意，但又未至疲勞過度而無法入睡。
