8點前要瞓？

有媽咪問

「你話BB應該要8點前瞓，但我見朋友啲BB冇一個會咁早瞓㗎囉，10點前已經算係早㗎嘞...」

呢個其實正正係我開專頁嘅原因，因為香港嘅嬰幼兒睡眠文化其實非常之唔健康，令好多BB同媽咪爹哋都瞓得唔好，所以我好希望可以喺香港推廣健康睡眠，幫到幾多得幾多。

我哋做嬰幼兒睡眠嘅，之所以會建議畀BB喺8點前瞓（其實係6:30-8pm呢個時段），係因為BB必須要已經進入咗深層睡眠，大腦至會分泌生長激素，而晚上9點至凌晨1點係激素嘅分泌高峰期，所以8點前瞓至可以完全benefit得到。有人話，瞓得多至生得高就係咁解囉 （仲有好多其他好處，例如BB嘅情緒會較穩定，專注力及學習能力較高等等）

我知道好多人會話夜瞓冇所謂，應該要BB遷就返父母嘅生活節奏。相信佢哋都唔知道以上我講呢一點，而且覺得BB瞓得唔好，一晚醒幾次要氹至瞓得返係正常嘅，「你個B瞓得多係你好彩」云云...

但其實睡眠問題係可以解決㗎，就算只係得幾個月嘅BB，都可以瞓得好。只要我哋明白同尊重佢嘅睡眠需要，幫佢安排好作息時間，夜晚連睡11-12小時係絕對有可能嘅事嚟㗎！

我明白香港人嘅工時長，家長返到屋企已經好夜，呢個無奈係一個好有挑戰性嘅難題，點樣處理就要視乎返你有幾看重BB嘅睡眠健康嘞。