小睡系列 - 最重要的時間因素

好多人以為，只要BB日頭瞓少啲，夜晚夠攰就可以一覺瞓到天光。

呢個係好常見嘅 睡眠誤解 ！

其實日頭唔瞓，夜晚勁醒大喊嘅情況，一般嚟講會更加嚴重！

咁有媽咪話嘞，氹極都唔瞓喎，或者瞓得一陣就醒，咁可以點？

想囝囝囡囡容易啲瞓著，同埋可以瞓耐啲，其實有好多影響因素。

今日先同大家講下 時間因素。

上次個post有幾位媽咪留言話：

「經常過咗最大清醒時間」

「清醒時間時長時短，攪到好易錯過最佳入睡時間」

呢個「清醒時間」究竟係乜嘢嚟呢？

清醒時間係指，由瞓醒開眼，去到合埋眼瞓著之間呢段時間。有啲媽咪話餵完奶後過一個鐘畀BB瞓，咁樣去計嘅話其實已經遲咗㗎嘞

隨住BB年紀越嚟越大，佢哋能夠支撐到嘅清醒時間會越嚟越長，詳情可以睇返呢篇文章 -《最重要的睡眠貼士》

你會見到，每個年紀都有個range嘅，咁係因為一般嚟講，朝早嘅清醒時間會短啲，就寢前一段會最長。

之不過，當你囝囝囡囡已轉為只瞓一次晏覺，咁就會相反，朝早嘅清醒時間較長，就寢前一段較短。

一般而言，我哋會喺 清醒時間完結前15分鐘開始哄睡或放床，畀時間佢哋慢慢平靜落嚟，迎接睡眠嘅來臨。

所以，如果你見夠鐘至開始氹你囝囝囡囡瞓，又會遲咗㗎嘞！