小睡時間要出街，點安排好呢？

「可以分享出街令小朋友小睡嘅方法嗎？」

答：呢個問題好少講，因為我唔係咁主張帶BB出街令小睡時間受到影響嘅…

其實都係習慣問題，諗吓我哋大人喺飛機都好難瞓得好啦係咪? 所以好難強求要小朋友可以好似平時咁樣瞓得咁好。

真係要出嘅，可以揀平時瞓得比較短嗰覺出街（多數係朝早嗰覺），咁之後仲有得補返。

盡量避免喺平時囝囝囡囡瞓得最長嗰次小睡出街。每日應該要有一次超過1小時嘅小睡至能夠減低疲勞度，呢覺必須要喺床，睡眠質素至會好。

如果係去人屋企嘅，睇吓有冇空間可以帶張摺疊式嬰兒床畀佢瞓，咁會係最理想嘅解決方法。盡量營造返個睡眠環境，例如要夠黑同有白噪音，同埋最好做返個日間小睡儀式。

如果只能夠喺BB車瞓，而你囝囝囡囡唔習慣喺呢個環境入睡，咁你唯有不斷推住架BB車，用搖晃嘅感覺令佢入睡。通常去到最大清醒時間都會瞓到嘅，但睡眠質素唔會太理想，而且你都唔好期望會可以瞓到多過一個睡眠周期。

另外，記得日頭瞓少咗，夜晚一定要提早就寢時間補返，否則積落睡眠債，至少要還幾日㗎！