氹BB瞓，越氹越炆

「我BB初生時是抱睡，而家雖然能夠床上入睡，但要拍好耐，愈來愈炆又喊... 日頭要幫佢接覺至瞓到耐啲，夜晚亦都成日會醒。有時見佢有努力想打側自己訓返，但佢好似唔夠力打側咁，最後就喊。拍幾下打側可以再入睡，但隔10幾分鐘又醒。出世到宜家快5個月冇一覺訓天光，好迷惘...」

第一樣要注意嘅係，盡量嘗試唔好越做越多，一來令你覺得有壓力越嚟越炆，二來BB失去練習嘅機會，形成依賴，咁就同參加呢個工作坊嘅原意相反嘞！

當BB大喊，我哋總係好想「幫」佢。之不過，當你將目的定喺停止佢嘅淚水，往往會吃力不討好...

嘗試細心觀察BB嘅真正需要，瞭解吓佢嘅感受先 -- 佢試緊打側但做唔到，同大人一樣會失望會炆憎，所以會喊。即刻去拍佢係咪最好嘅回應方式呢？咁做會唔會忽視咗佢嘅感受呢？

一或可能先睇吓佢，保持冷靜，唔好即刻諗住要制止佢喊。你可以放隻手喺佢身上，嘗試代佢講出佢嘅感受，用你嘅平靜去感染佢，令佢能夠慢慢冷靜返落嚟。

當你見到有需要，就抱起佢啦！咁細嘅BB，唔需要勉強做床上入睡呀，只要你係靜靜坐喺度抱住佢就得，唔需要做太多嘢又行又拍，避免造成更大刺激。等佢放鬆返，你自己亦都可以輕鬆啲呀！

好多時都聽到有媽咪爹哋話，BB好易醒成日要拍佢至瞓得返。但更多時候係氹極都氹唔到，大人炆憎BB又不安，身心俱疲...

瞓覺，係要放鬆至做到嘅事呀！

你諗吓你自己瞓覺，如果好緊張好不安咁，或者環境有好多刺激，例如有人不斷同你講嘢，你仲瞓唔瞓得著呢？

一晚醒幾次，係好辛苦嘅事，長期唔夠瞓情緒就更差，要保持冷靜絕對唔容易。

但其實喺呢個時候，係更需要保持冷靜呀！

點樣可以保持冷靜？首先你要預先諗定個計劃，決定應該點樣做，喺腦入面run幾次。

當BB夜醒大喊，先深吸一口氣，然後一邊數1-10一邊慢慢呼出嚟，然後先至開始執行計劃。

如果BB一直大喊唔停，你感覺到自己開始情緒受到影響，咁就先停止所有動作，再深呼吸，令自己冷靜返落嚟先。

記住，BB係會受到你嘅情緒所感染，如果你又急又炆又嬲，咁BB都會感到不安，冇辦法瞓得著㗎！