拍睡好唔好?

上次講到，陪睡時，刻意逃避眼神接觸，可能會引致反效果，令BB無法安心入睡。

於是有另一啲媽咪，就會採取相反嘅方式，一直拍呀拍呀拍... 拍到囝囝囡囡瞓著覺為止。

月齡細嘅BB，拍睡會係好唔錯嘅哄睡方式。

當拍睡能夠令BB得到佢所需要嘅安撫，你幫到佢順利啲瞓著，咁似乎好理想吖！

之不過，如果BB需要你一直拍住至瞓得著嘅話，咁佢半夜醒咗，好可能同樣亦會需要你拍佢至瞓得返。

當BB越嚟越大，呢個情況就會越嚟越明顯。而且，BB亦可能因為想自己搵個舒服嘅睡姿，唔再鍾意你再拍佢。

相反嚟講，亦有媽咪就同我講過，拍睡一段時間後，BB落床會指住自己個patpat叫人拍佢 （但弊在拍極都瞓唔到 ）

除此之外，你有冇試過一放BB落床就即刻拍，結果佢原本冇嘢嘅，點知越拍越醒，甚至開始大喊？

我相信，BB天生就識得自行入睡，有時我哋諗住幫BB，其實好可能係好心做壞事，反而對佢造成太大刺激，影響到佢嘅入睡過程...

再講，冇人可以控制到另一個人入睡。

如果BB未準備好瞓覺嘅，你拍佢都冇用，甚至好似喺度催佢咁，令佢發炆憎，喊得更勁。

所以，如果拍睡時BB郁嚟郁去，咁佢可能係想畀你知佢唔想你拍佢囉！