點樣減低停課對小朋友嘅影響？
養兒100歲，長憂99。我哋都希望BB能夠健康快樂地成長，但有時睇好多網上資料，以及接觸到其他媽咪同BB，難免會比較，擔心BB係咪正常。今集0-3歲寶寶podcast，我邀請咗復康社工April媽媽回答幾個常見嘅問題，希望能解開你嘅疑慮。
“每個小朋友都係獨一無二嘅，發展都有佢嘅步伐，有佢自己嘅時間表... 所謂嘅checklist只係一個參考嘅指標，方便醫療人員能夠喺短時間內大概掌握到小朋友嘅情況。我哋應該去諗點樣幫到小朋友，而唔係去諗佢有乜嘢問題。”
Click下面左邊嘅三角形箭咀，即能收聽（19:28）
文字版本請繼續拉到下面 👇
文字版本
C：Hello April，好多謝你今日上嚟podcast，同各位媽咪爹哋分享你對於有特殊需要嘅小朋友嘅認識，因為我知道好多媽咪都好擔心小朋友會唔會有發展遲緩，或者特殊學習需要，所以我都收集咗一啲問題，想請你同大家分享一下。
事不宜遲，第一條問題係：好多媽咪發現嘅小朋友開始識得行，之後開始識得跑，就發現佢跑嚟跑去冇時停，跟住就會諗：「咦，佢會唔會有過度活躍症呢？」其實係咪咁樣㗎呢？
另一個case係，好多媽咪又會話：「仔仔囡囡成日都好怕人，同佢講嘢又唔應，佢會唔會有自閉症呢？」
過度活躍症、自閉症都係我哋好常聽到嘅特殊需要，小朋友可能有咁嘅情況，但其實乜嘢叫過度活躍症，乜嘢叫自閉症，其實係點樣形成、點樣嚟嘅呢？
A：其實我諗呢段時間，家長喺資訊上都聽到好多，或者上網搵都有非常多嘅資訊可以睇到。咁樣係咪純粹見佢跑嚟跑去，冇時停，或者唔講嘢，就等於佢有一啲嘅特別嘅情況要去處理呢，其實又未至於咁直接嘅。
通常我哋都會好整體地去睇個小朋友佢呢一啲嘅程度啦，或者本身佢嗰個脾性、氣質係點樣樣。因為有啲小朋友可能本身個氣質係好活潑好動，亦都有啲小朋友可能比較觀察型嘅，咁所以要睇小朋友佢本身嘅個性。
同埋佢個程度，例如佢跑到會唔會係所有時間，食飯呀，或者出去，都完全係不受控地走嚟走去㗎呢？定係其實佢都有啲時間其實可以坐到嘅呢？或者佢唔講嘢，佢係對住啲陌生人唔講嘢，定還是佢係整體地對住屋企人都唔講嘢？我哋會睇嗰個程度，同埋持續幾耐。
又或者嗰啲時間有冇一啲特別嘅嘢發生咗，例如搬屋，或者係一啲屋企嘅成員，例如多咗個細佬妹，呢啲都會係一啲因素；加加埋埋先會去定論佢有冇過度活躍症或者自閉症嘅徵狀。
同埋呢啲徵狀通常我哋都會話，唔會因為我哋家長個教育方法令到佢哋咁，通常都會係一啲佢哋本身先天上面，例如佢本身先天身體上面，令到佢有呢啲情況發生。而唔係家長佢嘅管教方法，或者家長而家點樣去同佢相處，令佢突然之間出現呢啲情況。
C：我哋嘅照顧方式最多可能係令到小朋友嘅待人處事、待人接物，或者性格上，可能都有少少影響，但係唔會trigger、導致到有呢啲自閉症，好多媽咪話「好驚BB喊得多冇咗安全感，會唔會有自閉症呀？」就唔係咁樣嘅情況。
A：係呀，其實冇一個咁樣嘅關係，因為呢個真係佢本身先天inborn，身體上出現咗一啲trigger到嘅位，令到佢有呢啲徵狀出現；就唔關後天我哋點樣去照顧佢事。
但係當然後天亦都係一個因素，去點樣令到佢嘅成長上面，根據佢本身有嘅特質，我哋去幫佢去建立多啲好習慣，或者好啲嘅處事方式，咁呢個係後天可以幫到佢嘅地方。但就唔係後天令到佢會有呢件事嘅發生。
C：OK明白，咁有冇啲乜嘢可以講一講，例如過度活躍症或者自閉症嗰個red flag，有啲乜嘢要特別注意呢？可能有咁樣嘅情況，經常性都係咁樣嘅時候，就真係要再留意一下，或者係要去做吓檢查等等嘅情況呢？
A：其實通常而家我哋講佢哋嘅一啲徵狀，我哋都唔會好直接就話佢係等於有自閉症，或者等於過度活躍症。因為喺學前呢個階段、六歲前，都係一個發展緊嘅階段；我哋通常六歲先叫做正式去定佢係咪叫做有徵狀。
所以喺六歲之前，我哋可以純粹去留意一下呢啲條件。例如過度活躍症，其實都係講緊差唔多去到四五歲先會比較容易睇到；如果自閉症，相對地可能有一啲小朋友可能兩三歲會開始，佢哋有多啲社交發展嘅時候，會容易啲觀察得到，例如可能係一啲重複行為，或者佢有啲興趣好狹窄。例如佢好鍾意車，有好多小朋友都好鍾意車嘅，但佢鍾意車嘅程度係佢完全接受唔到其他嘅玩具，咁嗰個狹窄程度係佢唔容許有其他新嘅嘢去接觸或者去嘗試。
係啦，呢啲都係一啲重複行為，可以留意多少少。咁我哋都會話：如果你有擔心或者有疑問，其實可以去返健康院，搵醫生去再了解多啲。
C：OK，明白，好清楚。
咁除咗頭先講嘅過度活躍或者自閉症之外，另一個情況好多媽咪都好擔心，就係小朋友會唔會有發展遲緩或者言語遲緩嘅問題。好多時候啲媽咪就會話：究竟小朋友幾多歲要識得講嘢呢？歲半都淨係識講媽媽爸爸，係咪其實有言語遲緩、有問題呢？
A：呢個都係而家因為疫情，可能見得少咗好多街外嘅人，或者社交機會少咗，可能間接令到佢哋講嘢會慢咗；或者喺一啲發展上面，例如佢出少咗出街，佢去探索嘅機會少咗，都有可能令到佢一啲發展上面睇落好似慢咗。
所以呢個位其實都好難好清楚咁去講到，其實佢係咪真係有啲嘢要處理，定還是純粹係條件上喺疫情裡面呢一刻所以會發生。
咁我諗家長都係去睇返，佢係咪有言語嘅影響呢，我哋都係好general去睇。例如健康院，其實我哋定期返去打針嘅時候，佢哋都會講吓一啲checklist，佢哋有啲書仔都會講，有呢啲情況，如果佢仲未咁咁咁，你就可以搵返醫護人員。
呢啲都係一啲可以參考嘅指標；要提醒係指標，而唔係「佢一定要做到呢啲嘢」嘅checklist，因為始終每個小朋友都係獨一無二，每個小朋友佢哋嘅發展都有佢哋自己嘅步伐，我諗你有呢個疑問係可以去了解吓，睇吓喺呢個階段上面點樣幫到小朋友，而唔係純粹去諗「佢係咪有啲咩問題？」
我哋都係諗吓點樣去了解多啲我哋眼前呢個小朋友，點樣喺佢呢個情況可以幫到佢多啲，可以陪到佢多啲，喺呢個角度去諗。唔係純粹去諗佢係咪有問題，而係諗緊點樣去陪伴佢成長。
C：講到呢度，其實有時都幾驚，好多時候有人話：BB應該三個月就要做到呢樣嘢，四個月要點，六個月要點樣，一歲要點樣，歲半要講到幾多個字。呢個checklist好多時候都令到好多媽咪會幾大壓力，但所謂checklist其實唔係話你小朋友做到呢樣嘢就ok，而其實係一個指標，唔係話全部都要達到晒先叫OK，唔係有一兩點做唔到就係有問題。
A：係呀，我諗個checklist真係一個參考，亦都方便同事喺一個好短嘅時間裡面大約掌握到小朋友個情況。
所以我諗家長作為最照顧、最親近小朋友嘅人，其實可以喺平日多啲自己去觀察小朋友，或者相處上面睇吓小朋友係點樣，佢哋個情況係咪咁樣㗎呢？
又或者例如返到學之後，佢啱啱返N班，或者上playgroup，上到幼稚園，其實都會睇到佢同同齡小朋友嘅發展會唔會有一啲唔同。咁一定係會有一啲快啲、一啲慢啲嘅，但個差距上面係咪去到需要評估呢，我覺得家長可以自己考慮一下。如果有擔心嘅都可以評估，冇事你咪安心囉。
但如果你話純粹跟checklist，其實用嗰個指標，大人細路都會太大壓力。
C：我覺得你講得好好有一點就係，其實我哋照顧小朋友，每日對住佢咁多個鐘，可能十幾廿個鐘，甚至24小時，我哋係最了解我哋小朋友嘅情況。
相反當然好明白佢哋可能去健康院或者做檢查嘅時候，因為佢哋始終係有個time frame限住一個時間，要好快可以做一個判斷，呢個小朋友究竟需唔需要多啲輔助或者等等嘅情況，變咗呢個list係方便醫療人員去做一個快速嘅判斷，但係其實唔係最準確，唔係話有就OK、冇就唔得咁樣嘅情況。
A：係呀，真係唔好畀呢一樣嘢限制住自己，同埋我諗就算係做評估，都唔係等於話我哋要去搵小朋友係有問題定冇問題，而係我哋見到佢有啲需要，我哋去幫佢了解多啲。我諗個角度上面或者個重點係去幫小朋友。
C：我分享少少吖，我自己本身嘅孖仔而家五歲，佢哋其實都好遲先開始講嘢，三歲先講嘢；但係我嗰陣時又唔係太擔心，因為我喺佢哋十六、十七個月嘅時候，我已經知道我同佢哋講嘢其實佢哋係完全有回應，我畀一個指示佢：「拎條褲畀我」、「拎個波畀我」，佢哋其實完全可以回應得到，我知道佢哋其實係知我講啲乜嘢，佢有吸收到，但係佢未表達得到出嚟。
所以喺嗰個位，加上我自己本身係有睇開RIE育兒法，Magda Gerber其實好多時候都講，頭先你都提到每一個小朋友都有佢自己嘅發展時間表， 一個range。其實RIE育兒法都係based on另一套相輔相成嘅做法叫Pikler，佢專門研究小朋友嘅發展，尤其是係身體上嘅發展，佢亦都有個表，可能之後我會post返出嚟畀大家參考一下。其實你見到佢都會話，呢個年紀應該做到乜嘢，但佢個range好闊，闊得好緊要，可能會差半年或以上，所以變咗我都好相信，我都好開心你都好贊成Magda Gerber個講法，就係每個小朋友都有時間表，最緊要係我哋知道小朋友improve緊，佢係有一個進展，有學習緊，變咗我哋都唔需要太擔心呢一點。
A：係呀，因為最近都聽到好多分享就係，因為疫情令小朋友少咗一啲社交機會，都幾多會令到佢哋嘅發展、講嘢上面會叫做滯後咗。呢個係呢一兩年小朋友會比較多見到嘅情況。
咁你話平時，其實頭先你講得好好就係，其實我哋每個人發展言語一定係理解快過表達，所以點解我哋喺就算佢未講嘢，或者佢未識得好多詞彙嘅時候，其實我哋平時同佢講多啲，去輸入多啲唔同嘅說話、詞彙，多啲交流，或者純粹敘述畀佢聽發生緊乜嘢事，其實都已經幫緊小朋友的語言發展一啲前期、基礎嘅功夫。
C：係呀，呢個都係一個好RIE嘅做法。
因為孖仔細個嘅時候開始都係，雖然我係一個人照顧佢哋兩個，基本上係一個湊兩個，開頭嗰段時間係好少出街，真係做唔到呢件事。但係我會全日不斷同佢哋講嘢，不斷形容：我哋而家要食奶喇，我而家抱起你喇，而家放低你喇，同你換條片，條片喺呢度呀，不斷講，講到口乾。
RIE育兒法嘅睇法係：唔好諗住BB聽唔明你講嘢就唔同佢講嘢，而係我哋要不斷同佢講、甚至預告即將會發生啲咩事；呢一個除咗幫到BB佢個言語發展之外，亦都可以令佢安心啲，因為佢知道嚟緊會發生乜嘢事。
A：都係呀，其實都幾相輔相成，點樣去幫佢語言發展，其實真係好日常裡面一啲好細節嘅嘢，你點樣同佢分享。同埋語言發展其實講緊，呢個係一個好美麗嘅語言，你覺得溝通原來係大家有往有來，大家可以互相了解。咁你平時同佢講得多啲嘢，佢覺得：原來語言係一個好開心嘅嘢嚟㗎喎，原來有啲開心嘅output返返嚟，或者一啲開心嘅回應返返嚟，佢就會有多啲動機去學表達。
C：係呀，雙向嘅溝通亦都係RIE好重視嘅一樣嘢。其實頭先我話一口氣講好多嘢，但其實中間我都有停頓，去睇返孖仔畀返一個回應我。
例如好多時候Magda Gerber最經常提出嘅例子就係，我哋如果想抱起BB嘅時候，我唔會一下就抱起咗佢，我會同佢講，我而家會抱起你喇，跟住伸隻手出嚟望住佢，畀幾秒鐘嘅時間佢先，咁其實你如果畀啲時間BB，你會見到佢舉起手想你抱起佢，你得到佢一個回應，你再抱起佢，慢慢佢會學到：呢個就係「抱起」。佢亦都會知道你同我講一樣嘢，我同你講一樣嘢，你會聽我講嘢㗎喎。呢個都係一個促進親子關係、溝通好重要嘅一點。
A：你咁講我都諗起，我哋有時會幫一啲SEN小朋友做一啲訓練，其實都有少少似呢種做法。講說話裡面我哋形容畀佢聽，其實無論係佢哋認知上面，一啲情緒社交上面，或者係一啲大小肌訓練上面，其實我哋都好細節，將一啲過程步驟拆到好細嘅部件咁樣去表達返畀佢聽。
我哋就算練佢行同跑，甚至係練佢講嘢，口肌裡面點樣講，我哋都特登將啲動作放慢，將一啲行為拆到細件去教佢哋。呢個過程其實好需要同小朋友面對面嗰個人好專注去睇住小朋友嘅回應，再畀返個feedback佢。呢個都係幫緊佢哋去建立返基礎去發展，建立好個基礎先會再可以令到佢更加容易掌握之後可以做啲咩嘢，或者係能力嘅理解上面，或者係掌握一啲技巧上面，都會更加容易可以幫到佢多啲。
C：係呀，呢個都好RIE呀，我一路聽你喺度講嘅時候，我就係諗緊，又係Magda Gerber成日都講，我哋要觀察BB，觀察、聆聽、了解佢嘅需要，再去做一個回應。
最後想問一問，如果家長真係發現小朋友似乎真係可能有啲特殊需要嘅時候，佢應該點樣做呢？喺邊度可以得到協助呢？
A：其實最簡單直接嘅方法就係返返去健康院，如果小朋友兩歲之前、未返學之前，返健康院有一個好全面嘅服務支援，佢哋會聽到你嘅情況。可能每次打針返去會做一啲評估；又或者如果打針前後你聽到突然覺得有啲嘢擔心，你可以打返去同姑娘傾，咁醫生就會幫你去會見，去睇吓小朋友嘅情況點樣，有需要就會轉介去衛生署嘅兒童體能智力評估測驗中心。
但因為呢啲評估有時都要排得比較耐，而家都可能要排一年，有啲家長可能會選擇等評估期間搵私人機構去做。我知道喺一啲測驗中心裡面佢都會有一啲list畀家長自己去參考，佢可以自費去出面去做一啲評估，叫做買返一啲等待評估嘅時間，希望快啲安心，又或者派到一啲政府嘅資助服務。
C：OK，早啲做咗個評估，真係有需要嘅時候，咁就盡早可以幫到小朋友得到協助。
好多謝你呀April，好多媽媽佢哋其實佢心裡面都係好擔心呢樣嘢，佢哋可能未得到一個好清晰講解或者資訊去點樣做，你知道呢啲位可能越講越驚。希望啲媽咪聽完你講解可以安心一啲。
好多謝你今日接受訪問，咁有機會我約你再傾過第二集podcast啦，我仲有好多其他問題都想問吓你。咁我哋再傾啦，拜拜。
