二寶就嚟出世，點樣做好準備呢?
當BB出世，我哋人生好多時會被完全改變。當你諗住自己已經準備好，可以迎接第2個BB嘅來臨，點知好多情況都會同你想像中好唔同！今集0-3歲寶寶podcast，我邀請咗Yoyo媽媽，同大家分享，佢照顧大囡Alicia同細仔Virgil嘅經歷。
“睡眠呢樣嘢，喺唔同嘅階段都會發生好多轉變。作為媽媽，我需要按住唔同嘅情況，見招拆招。”
Click下面左邊嘅三角形箭咀，即能收聽（17:45）
文字版本請繼續拉到下面 👇
文字版本
C：Hello Yoyo，好多謝你今日接受訪問呀。
Y：Hello，你好Catherine。
C：唔覺唔覺原來Alison而家已經兩歲幾，我記得你搵我嗰陣時佢係十五個月大左右，連Virgil都已經七個半月大，真係時光飛逝。
咁你喺照顧兩個小朋友嘅方面，你有啲咩想同大家分享呢？
Y：我覺得我自己經歷開頭照顧一個小朋友，再加埋另外一個，其實真係好大分別，喺時間分配上面同埋你自己對佢哋嘅愛都係好唔同㗎，所以我都好想同其他媽媽傾吓，其實照顧兩個BB真係比想像中唔簡單。
C：其實比孖仔可能更加困難，孖仔我一個對兩個，可能兩個一齊喊唱雙簧嗰吓好混亂，但係起碼例如睡眠時間我唔需要砌餐死，因為好多時我試過幫啲有兩個小朋友嘅家庭，兩個小朋友唔同年紀，要同佢砌個時間表，其實都幾頭痛。
喺睡眠上面，兩個小朋友有啲乜嘢唔同呢？或者你嘅做法上經過Alison之後，又有啲乜嘢心得可以同大家分享呢？
Y：其實喺Alison細個嘅時候，我處理佢睡眠好冇經驗，好束手無策。
本身佢有濕疹皮膚，佢皮膚唔好嘅時候，我哋成日覺得佢瞓得唔好，成日就習慣咗抱睡。抱睡之後抱吓抱吓咁，成日都擺唔返落床。呢個情況應該維持咗年幾，然後到咗一個位好崩潰，覺得「都唔係人哋坊間講嗰啲越大會瞓得越好嘅」，佢由出世到歲幾都好似未試過一覺瞓天光。
最後就覺得：唔得喇，自己搞唔掂，應該搵專業人士幫手。所以最後就好好彩地搵到你啦Catherine，Alison接受咗sleep training，然後係有好大嘅改善同幫助，由佢要抱睡，到可以自己床上入睡、陪睡，到最後佢而家係可以自行入睡。
呢個情況由佢歲半開始成功自行入睡之後，到而家一直都係Keep住，係有進步嘅，雖然我自己覺得睡眠呢樣嘢喺每個階段都會發生好多唔同嘅改變，作為一個媽媽都要按住唔同嘅情況見招拆招。但係so far佢都係瞓得好嘅。
C：都穩定嘅，因為有個基礎喺度嘅時候，當你遇到一啲情況，你會比較清楚點樣去處理，呢個都好重要。
好多時候我同好多媽咪都講，我覺得好重要嘅係，當然我作為睡眠顧問，我希望可以幫到你、答到你嘅問題，但係好多情況之下，例如半夜醒咗點處理，我可能唔能夠即時可以答到你。
所以我都好希望咁多位媽咪爹地會認識多啲，知道啲情況點樣去處理，我覺得呢個好重要，媽咪爹哋你哋先至係你哋仔仔囡囡嘅睡眠專家、睡眠顧問。
Y：我都好同意，因為我覺得照顧者打好個基礎，有基本嘅認知，然後到嗰一刻，其實始終都係你最了解你個小朋友，佢嘅生活習慣、佢嘅喜好，然後你按住嗰一刻嚟決定應該用啲咩方法係最幫到你嘅小朋友。
所以你真係要好相信自己，同埋好相信個小朋友，先可以行到落去。
C：即係你知道個方向應該點樣做，都有個信念、對自己有個信心去做。我哋大人如果都猶豫不決、好混亂、好唔冷靜嘅情況之下，我哋點樣能夠幫到BB、幫到小朋友，可以平靜、可以瞓得到呢？呢個真係好重要嘅一點。
可唔可以再講一講，Alison細個嘅情況唔係咁理想，你到第二次機會，照顧Virgil嘅時候，情況又係點樣呢？有咩唔同呢？
Y：我經歷過第一次，我同自己講：我唔可以再畀第一次嘅嘢發生多一次。
所以我喺陀緊第二胎嘅時候，我已經搵Catherine，問吓佢我應該點樣做呢？我係咪應該等到小朋友六個月先接受睡眠training呀？抑或我應該趁早打好個底？
好多謝嗰陣時你提醒我應該趁早打好基礎先，所以嗰陣時我就報咗一個零至五個月嘅健康睡眠course，我就了解多咗好多初生嬰兒嘅睡眠知識，到細佬真係嚟到嘅時候，真係好多位都可以應用到。例如其實初生嬰兒係會狂瞓㗎啦，唔應該有一個固定嘅timetable，應該按住佢差唔多清醒時間夠，就應該擺佢落床。
同埋我自己嘅心態都好唔同，可能已經打好咗基礎嘅時候，我見到細佬呢一覺瞓得好，或者嗰一覺瞓得唔好，我知道下一步應該點樣做，我可以改善吓。或者有陣時佢瞓得唔好，我唔會成日話：哎呀，點解佢瞓得咁差㗎。
我覺得我嘅態度開放咗啲，有陣時覺得細佬瞓得唔好，唔緊要呀，我adjust吓，希望等佢下一覺瞓返好啲。我覺得自己個心態open咗、健康咗、樂觀咗嘅時候，唔覺得件事咁大壓力，我自己覺得BB都好感受到照顧者嘅情緒，所以佢又覺得件事容易啲、我又容易啲嘅時候，就覺得順利啲。
C：我成日都提到嗰樣嘢，頭先都有講到，我哋用我哋自己平靜去感染BB，因為其實佢哋真係對我哋嘅情緒好敏感。咁所以我哋可唔可以冷靜啲去照顧得輕鬆啲，我哋越輕鬆去看待嗰件事嘅時候，咁當然唔係話輕鬆嘅意思係乜都唔理，但我哋知道，你頭先提到有一點好好就係，發生呢件事嘅時候我都知道點樣去調整，有個頭緒點樣去調整，我覺得呢個真係好重要。
呢個就係點解我成日都講，嬰幼兒睡眠其實有好多基本嘅知識，好希望咁多位媽咪爹哋都會知道咁嘅情況要點樣去調整等等，呢個係好重要嘅一點，唔好盲目諗住要跟個時間表，「跟唔到個時間表點算呀，亂晒呀點算？」好多時候我都會收到咁樣嘅message；唔緊要，你嗰覺瞓短咗，下覺瞓耐啲囉，下午瞓得唔好，咪夜晚早啲瞓補返囉，其實冷靜啲，唔需要咁緊張。你越緊張嘅時候，真係會令到BB都覺得不安，呢個情況都好常見。
你可唔可以再分享吓，Alison對於細佬嘅出現，佢有啲咩改變呢？
Y：嘩，個改變就大囉。本身佢係屋企嘅big boss，突然之間有人入侵咗佢嘅地頭。
開頭我好記得，我其實由Alison接受sleep training嘅時候，十五個月開始，佢每一個夜晚覺同埋睡前儀式都係我負責嘅。
到我入院要生細佬，我要交畀屋企人，其實對佢嚟講已經缺乏咗安全感。
到我返嚟屋企，我仲帶咗個外來物返嚟，嘩，對於佢嚟講簡直好似晴天霹靂。我記得開頭呢，佢本來睡眠作息已經好穩定，突然之間佢啲作息時間好亂，朝頭早又早醒，係講緊平時七點起身，佢會變咗五點幾就醒。午覺佢一般都可以瞓到個半至兩個鐘，變咗半個鐘就醒。然後每一覺瞓醒個情緒都好激動，大喊、尖叫，夜晚夜醒嘅情況都出現返。
咁我好清楚呢個情況絕對係因為我帶咗細佬返屋企，佢覺得安全感低咗好多，缺乏安全感我覺得係主因。
所以其實細佬開頭嘅照顧，我都好靠屋企人幫手，而我喺坐月嘅時間係分身、分咗好一部分時間去畀返多啲愛同關懷Alison，令佢覺得媽咪其實同樣重視你，要ensure返、畀返一個實實在在嘅安全感佢，「我嘅對你嘅愛係冇少嘅」咁樣。
我諗我開頭其實都有啲束手無策，我見到佢瞓得咁差，其實我都好唔開心，但係我同自己講，首先我個心態上面要adjust，我要去幫佢，如果我都好亂嘅時候，其實佢就冇咗一個好重要嘅倚靠。
咁當我調整完我自己嘅心態之後，我就開始處理佢嘅睡眠同情緒問題。我諗最後用咗兩個星期左右，佢終於瞓得穩定返，起碼朝頭早冇再五點幾醒，午覺可以瞓得長返少少。其實個過程大家都有啲掙扎、都有啲辛苦嘅，但係我同自己講相信係會過渡到，咁一步一步最後係睇到個結果，要有信念真係可以adjust返。
C：可唔可以分享多少少，有啲乜嘢最重要嘅改變，或者做咗邊一點能夠令到Alison安心返呢？因為幼兒嚟講，小朋友歲幾兩歲幾，呢啲年紀佢哋個心理因素對睡眠嘅影響係大好多。除咗多啲時間陪佢之外，喺呢一方面你做咗啲乜嘢呢？
Y：其實開頭有少少倒退咗㗎，退前咗一步，由佢自行入睡變返陪睡，我有喺床邊陪佢。因為佢實在喺房裏面自己尖叫大喊，我就覺得唔緊要啦，我退返一步，我喺返佢床側邊陪睡先，跟住然後我再一步一步坐遠啲，變返好似佢歲幾training嗰陣時咁，我再等佢適應咗、情緒穩定咗之後，我再一步一步坐返喺門口呀，坐返喺門出面呀，門半掩呀，最後關返門。
當然我每做一步之前，我都會同佢講，我都會尊重佢，我都會喺前一日同佢講定：「好啦，我哋今晚就咁樣，但係呢聽日之後，媽咪就會再坐遠少少」，畀個心理準備佢，唔好突然改變，咁佢嘅接受程度會大啲。
C：係呀，呢個都係RIE育兒法成日都提到，同小朋友預告改變，可能佢唔接受都唔定，佢會抗議，但至少我哋嘅責任就係要同佢講。呢個係好重要嘅一點，咁先至可以令到佢安心，因為突然間改咗好多嘢嘅時候，反而會令佢更加難受。
所以其實你講到有一點都好好，好多人都會覺得做咗sleep training就一勞永逸，可以自行入睡啦。但係其實真係唔係，有好多嘢都可以影響到佢，例如成為哥哥姐姐、開始返學、開始戒片等等，好多情況都會影響到原本個睡眠情況；變咗有陣時真係要行返後一步，如果你係講到個心理因素嘅時候，變咗你唔能夠由佢喺間房困住佢，黑蚊蚊，佢真係尖叫，呢個只會令件事更差。
所以有時我都會建議，可能退返後一步先，但係重點係你有計劃，你唔係話「咁算啦，入返入面陪返佢啦，以後都係咁」，咁樣唔能夠真係解決。好重要嗰樣嘢就係你知道「OK我退後一步，但係我有個計劃點樣去再繼續去做返好成件事」，呢個真係好重要嘅一點。
Y：我覺得嗰刻首先你自己個決心要夠堅定，同埋你要相信你個小朋友佢有咁樣嘅能力，所以大家一步一步磨合、配合。
C：最後都想請你再同其他即將迎接第二個BB嘅媽咪爹哋分享，你有啲乜嘢想同佢哋講呢？
Y：我覺得睡眠健康對小朋友好緊要。有陣時我見有啲媽媽個著眼點同用神會擺咗喺食奶，例如好想佢一日每隔三四個鐘就要食奶，如果我餐奶夠鐘餵，但佢個狀態已經好攰，係咪佢瞓住覺都要塞咗佢飲飽奶先呢？我自己就覺得如果小朋友肚餓，佢會醒、會叫你要食，但佢需要睡眠嘅時候，我哋喺嗰個位應該畀佢瞓咗覺先。我自己會擺睡眠健康喺好前。
C：我覺得你講咗好好嘅一點，就係好多家長都會話：BB應該每三個鐘頭餵一次奶，後來變成一個四個鐘嘅cycle，大家都會有一個咁嘅concept；但係對於睡眠嚟講，其實好少人會諗要有一個時間表，或者隔幾耐要瞓一次覺。而家當然多咗人知道健康睡眠呢一件事，但係喺兩年半之前係完全冇人講呢一樣嘢。
所以呢個都係我開呢個podcast嘅原因，希望可以借咁多位媽咪爹哋佢哋嘅親口分享，同大家去講佢哋嘅心得，佢哋嘅經歷，有啲乜嘢真係幫到佢哋，令大家知道呢件事其實真係work到嘅，唔係作出嚟嘅，有好多科學、嬰幼兒心理學嘅support嘅。
咁今日好多謝Yoyo同我一齊傾計，其實我都有好多嘢都仲想請你分享，關於照顧Virgil嘅情況等等，有機會我再請你同我錄第2集嘅podcast啦。好多謝你接受訪問，拜拜。
