點解溫和嘅戒抱睡方法都會令BB爆喊瞓唔到？
琴日講到，外國都會有收人錢但唔知自己做緊乜嘅人，竟然喺睡眠顧問群組，問好唔好同3個月大BB做CIO
類似嘅情況大家可能都聽慣聽熟（早排某育兒page至出咗篇有關CIO嘅文章，受到好大爭議，我都寫咗個回應 ）
但有另一個情況，就未必好多人知道...
同樣係攪到BB爆喊好多晚都瞓得唔好，但原因唔係狠心CIO，而係完全相反 -- 因為唔想BB大喊...
個睡眠顧問教媽咪用「抱放法」，幫已經1歲幾嘅BB做「睡眠調整」，仲話要堅持一個月...
所謂嘅抱放法，即係將BB放落床，喊就抱起安撫，唔喊就放返落床，如是者不斷重覆直到BB瞓著為止。
好多人覺得，咁做溫和啲，唔駛留低BB喺床爆喊。
我喺 健康睡眠工作坊 有講解呢個做法，但由於BB未滿6個月，唔建議做正式嘅睡眠訓練，所以試咗10-15分鐘都仲喊瞓唔到嘅話，就應該停止放床，抱睡返算，畀BB瞓得足夠緊要啲，下次再試過就可以（因為BB對入睡方式未有好大依賴）
而喺 睡眠調整全面睇，亦有一個少少相類似嘅做法（不過分開咗好多階段，唔止抱放咁簡單 ）。但我喺課程影片講明，只適合月齡細嘅BB，講緊係6-8個月至會啱用啲。
因為，抱放法其實係一個刺激度好大嘅做法（試想像成個人不斷升起降落，你咁樣瞓唔瞓到呢？）
而且，月齡大個啲嘅BB已經有因果關係嘅認知。
佢喊你就抱，BB接收嘅訊息，就係喊就會被抱起，佢其實唔會明白你係想佢喺床上入睡。
睡眠訓練，其實係設限嘅一種，我哋畀BB嘅訊息要清晰及一致，咁BB至可以接收 理解 執行。
你想BB喺床上入睡，但又不斷抱起佢，咁做根本冇辦法令佢知道你到底想點，於是BB只好不斷咁喊落去，直到斷電...
而負責執行抱放法嘅媽咪，不斷又抱起又放低個十幾公斤嘅人仔，手痛腰斷，仲話要做一個月，根本完全頂唔住...
係，BB太重，亦係抱放法唔work嘅原因。
結果我同個媽咪講即刻停止呢個抱放法，改以陪睡方式去做，BB幾日就已經習慣床上入睡，唔再晚晚喊餐死。
戒抱睡嘅方式有好多，需要視乎最少以下4個因素去決定，應該選擇邊個做法：
BB月齡
BB性格
現行入睡方式
父母育兒觀
而就算係同一個方法，實際執行細節亦有好多唔同嘅方式：離房嘅話幾時至入房睇BB？陪睡嘅話係咪應該安撫BB？幾時同點樣去安撫？
睡眠顧問嘅責任，唔係講用邊個方法就算（睇書或網上都搵到啦！）
面對BB喊時，能幫到你去有信心處理，而唔係單單叫你忍幾（十）晚，至係睡眠顧問嘅真正責任所在。
共勉之。
