睡眠訓練可以係一件充滿愛嘅事
一提到「睡眠訓練」 ，好多人都會覺得好「殘忍」 ，因為BB會大喊，而父母就要袖手旁觀，唔可以幫BB…
究竟做睡眠訓練，唔喊得唔得㗎呢？
首先要澄清一點，我絕對唔會叫你放低BB喺床，然後就走咗去唔理佢，天光至抱返BB出嚟（即係稱為cry it out嘅做法）。
但至於喊唔喊呢個問題，我會話，有可能唔喊，但大多數時候都比較難避免。
當我哋要改變BB嘅入睡方式，因為係由大人主導嘅一個轉變，BB冇say，所以覺得唔慣，要表示及宣洩不滿，係健康而且正常嘅事。
而BB因為未識講嘢，能表達自己嘅方式有限，所以只能夠通過喊聲去同我哋溝通，同我哋分享佢嘅感受。
有人會覺得，特登整喊BB，係好唔自然嘅事，唔應該迫BB自己瞓覺呀！
但其實，當你抱持住尊重BB嘅心態，以細心敏感嘅方式去回應BB，睡眠訓練並非一件殘忍嘅事，反而係一件充滿 「愛」 嘅事。
RIE育兒法創辦人Magda Gerber認為，睡眠訓練其實應該稱為睡眠 「反」 訓練。
BB天生就擁有自行入睡嘅能力。
睡眠訓練的目的，其實係解除我哋之前喺無意之中，訓練BB依賴咗嘅入睡條件（即係搖睡抱睡奶睡等），令BB重新習慣，點樣唔駛依靠外在幫助而自己都瞓得著（有關呢點之前寫過一篇文，連結見留言）。
睡眠訓練 =/= 自行入睡
睡眠訓練 =/= 留低BB自己喺房
睡眠訓練亦係設限嘅一種，同你平時日頭同BB say no，原則上係一樣嘅。
就好似你要阻止BB將污漕或危險嘅嘢放入口，或者唔准佢打人咬人一樣。
你只係唔再用之嘅方式氹BB瞓覺而已。
我哋自己嘅心態，應該係：我明白你唔願意咁樣，但我必須堅持，因為呢件係重要嘅事。
睡眠訓練，其實亦唔係訓練BB，而係訓練照顧BB嘅大人，訓練我哋必須改變一向嘅行為（因為唔能夠再持續落去）。
睡眠訓練之所以比平時設限嘅難度更高，係因為你需要BB瞓覺，所以唔能夠做平時可以用到嘅方式，去處理BB嘅不滿（例如畀第二件玩具佢，甚至開手機播youtube ）
改變，可能會令人覺得不安。
BB覺得不安，就會喊。
但BB大喊，並不等如佢覺得好痛苦。
BB面對改變而產生不安，我哋要做嘅係提供情緒上嘅支持。
我哋冇需要，亦唔應該以 「幫BB解決問題」 嘅心態，認為BB係需要得到拯救。
請相信BB，佢哋嘅能力，遠比你想像中強大㗎！
