所謂嘅睡眠問題，其實只係大人嘅期望同BB嘅情況有差距

睇得呢個blog嘅你，一定好關心你BB嘅睡眠情況

喺同超過450位媽咪爹哋做電話諮詢傾佢哋BB嘅睡眠問題，加上兩年嚟差唔多每日寫一篇文章之後，我醒覺到...

其實，所謂睡眠問題，並非真係一個問題。

其實，只係大人嘅期望，同BB嘅情況，兩者之間有差距。

差距越大，失望及沮喪感越重，掙扎自然越大，越辛苦。

而呢個差距，好多時係出於愛

因為愛BB，想畀到最好嘅佢。

因為愛BB，所以唔想令BB唔開心。

因為愛BB，於是令到自己陷入兩難嘅局面...

湊BB並冇一條方程式，跟住做就得。

每個人對點為之 「好」，都有唔同嘅定義。

而且，每個人嘅諗法，都會隨住時間及經驗而慢慢改變。

而家覺得OK嘅事，過2個月可能會後悔...

而家覺得唔想做嘅事，過2個月可能恨不得早啲開始...

所以，好多時，我都會同啲媽咪爹哋講：

「你覺得咁樣做，會畀咗乜嘢訊息BB呢？之後個情況你覺得會點樣發展呢？」

「你對於而家呢個情況，覺得有需要急切得到改善，定係暫時頂住先，做好其他部份至再諗呢？」

「最重要嘅係，你有足夠心力去做改變嗎？」

早前有一個研究*發現，英美父母每日平均用5小時25分鐘去氹BB瞓覺

一日至得24小時，氹BB瞓覺好多時仲要又行又拍，忙得不得了...

當BB終於瞓咗，大人都已經冇晒力又冇晒精神，仲點能夠仲去諗同做更多嘢呢...

又或者話，就算一時三刻能夠行前一步去改變，但撐到幾耐呢？

所以，好多嘢其實都需要天時地利人和。

而且，唔好諗住要一步登天。

逐步嚟，拆開成件事嚟一步步去做。

做好一點先，得到改善，儲吓氣，然後至再繼續行落去。

☆☆☆

嬰幼兒睡眠顧問 Catherine

#全港首位本地嬰幼兒睡眠顧問 ‧ #RIE育兒法專業課程畢業生 ‧ #孖仔媽媽

網上課程 / 電話諮詢 / 免費資源分享