經常被忽視嘅早醒原因

最近呢幾日，好多媽咪都同我講BB有早醒嘅問題。

早醒嘅成因有好多，但有一個好易解決嘅方法，卻經常被忽視...

睡房夠黑嗎？日出時間房會唔會光咗好多呢？

有媽咪喺研習班分享話（見留言），囝囝之前5點幾就會醒，夜晚亦要8點太陽落山至瞓得著。但當換咗全遮光窗簾後，囝囝可以瞓到7點都未醒，夜晚亦6-7點就瞓咗，成家人嘅睡眠質素從而提升咗好多

當然，換窗簾係最徹底嘅做法。不過亦可以有其他替代，或者臨時嘅方法嘅

1）用黑色不透光隔熱貼封咗個窗佢，如果睡房只係用嚟瞓覺，一了百了封咗佢唔駛煩

2）買塊吸盤形旅行遮光窗簾，呢種窗簾其實係一塊黑色不透光嘅布，可以自己裁剪大細，唔用時除落嚟就得，例如呢種

3）去IKEA宜家家居買SCHOTTIS遮光風琴簾，呢隻款可以自己裁切成需要嘅尺寸，而且唔駛鑽窿，極為容易安裝

4）未得閒買，或買咗要等送貨，可以用錫紙封住先都得㗎

當然，環境因素只係其中一點。如果你囝囝囡囡太夜瞓攰得滯，亦都會出現早醒嘅問題㗎！（唔好以為攰就會瞓得好同遲啲醒，實際情況係完全相反㗎囉...）