BB唔鍾意瞓低，點樣能夠令佢喺床仔自然入睡？

「我BB一出世已經好冇安全感，一定要抱住至得，一放低就喊。瞓覺時更加冇可能做到床上入睡，有乜嘢方法解決呢 ？」

BB喊原因可以有好多，可能係攰，或者有其他生理需要或不適；有陣時亦都可能係一個習慣問題。

我哋平時抱住BB、揹住BB嘅時候，個BB係打直嘅，好似我哋咁樣睇嘢，但係當你放低佢，佢未識得自己坐起身嘅時候，佢望嘢嘅時候成個世界唔同咗，佢就會覺得唔習慣

尤其是，當你見BB攰想放佢落床氹佢瞓...

一來BB可能已經攰得滯唔係咁舒服，加上成個世界突然改變咗，於是就會大喊...

所以，希望BB能夠喺BB床自然入睡，唔係話單單喺想佢瞓覺時，就咁放低佢喺床就得。

咁應該幾時，至可以畀BB習慣返瞓低嘅姿勢呢？

你可以喺瞓覺之間嘅清醒時間，aka 遊戲時間，同BB一齊練習㗎！

RIE育兒法資深導師及代言人Janet Lansbury 建議過一個做法：

首先，放低BB之前要同佢預告一聲，然後再慢慢放低佢，記得要溫柔啲，再坐喺佢身邊。

BB習慣有人抱住，瞓低時覺得唔對路會發出不滿嘅聲音，呢個時候你可以同BB講吓嘢先，用RIE稱之為「sportcasting」嘅方式，同佢講：「我見到你似乎唔係好舒服... 唔係好開心咁...」

講嘅時候要保持冷靜，千祈唔好諗住「唉... 唔work喎... 喊到咁...」全心全意陪住BB，同佢進行對話，對佢啲哭泣作出回應，表示你明白佢嘅感受。可以點頭，摸吓BB，同佢講「我知道...我明白...」

你甚至可以瞓埋喺BB隔離都得㗎！

如果過咗一陣BB仲係抗議緊嘅，就問吓佢要唔要抖抖，張開手問佢要唔要抱。畀啲時間佢回應，當你明白佢想你抱（例如張開雙手），就可以慢慢抱起佢，抱一陣傾一陣計，等佢平靜返就同佢講畀佢聽，你會放返低佢，跟住再次溫柔地慢慢放低BB喺地下。

如是者重覆幾次，慢慢畀BB適應瞓低嘅姿勢，就可以瞓耐啲㗎嘞！