點樣避免BB出現日夜顛倒，夜晚唔瞓覺？

好多媽咪都聽過人教，日頭要光啲，夜晚就暗啲，至能夠教BB識得分辨日夜，避免出現日夜顛倒嘅問題。

咁到底BB日頭瞓覺時，係咪都應該喺光線充足嘅地方呢？

的確，初生BB之前喺媽媽子宮內不見天日，所以出世後亦未有日夜之分。

尤其是，BB出世後仍然存在母體褪黑激素呢種睡眠荷爾蒙，所以可以隨時隨地都瞓得著，瞓得好。

有啲人會建議將BB放喺客廳嘅嬰兒餐躺椅，畀佢瞓覺，方便媽咪或其他照顧者可以睇住BB。

但係，其實任何傾斜嘅表面，都並非安全嘅睡眠環境（美國已禁止銷售呢類聲稱可以畀BB瞓覺嘅產品）。而且，BB習慣咗喺一個咁嘅環境瞓覺，亦會較難適應喺BB床入睡。

再加上，當BB去到6-8周大，母體褪黑激素開始用晒。呢個時候，好多BB都會開始出現入睡困難，或者瞓著又好快醒嘅情況。

咁應該點樣做，至能夠令BB瞓得好呢？

首先，就係營造返子宮內嘅安睡環境畀BB。

無論日夜，睡眠環境都建議暗一啲，甚至最好係黑到伸手不見五指嘅程度。因為，一個黑暗嘅環境，能夠減少刺激，令BB容易啲瞓得著。

除此之外，你亦可以用白噪音模仿子宮內嘅聲音。呢種連綿不絕，冇任何高低起伏嘅聲音，除咗能夠幫到BB容易啲適應子宮外嘅世界之外，亦能夠遮擋一啲突如其來嘅環境噪音，例如車聲或生活上嘅聲音，避免嘈到BB。

所以，日頭都最好入返睡房，拉埋窗篇氹BB瞓覺啦！

另一個避免日夜顛倒嘅重點，係唔好畀BB喺日頭一次過瞓太多，每覺2小時就好。如果距離上一餐奶已經有一段時間，亦應該叫醒BB餵奶（當體重已回復出生時重量，夜晚就唔駛叫醒餵奶）。

日頭食得多啲奶，夜晚至可以快啲停夜奶嘛！

想知道更多令BB瞓得好嘅重點，即刻收睇［初生嬰兒睡眠貼士］講座啦！