如何處理睡眠倒退期？

上一次講到，BB總共會經歷5次睡眠倒退期，出現嘅時間一般都會喺BB 4/8/12/18/24個月大時，回顧 👉 睡眠倒退期

呢個時候，BB唔係瞓晏覺，半夜又頻頻驚醒，好容易令大人同BB同時睡眠不足。

咁應該點處理好呢？

當BB只有4個月，年紀仲細，腦部亦未發展到能夠掌握好自我安撫能力（所以唔建議喺呢個時候進行睡眠訓練，或要求BB一覺瞓到天光）。

因此，喺呢個階段，你應該注意BB能支撐得到嘅最長清醒時間（一般為1.25-2小時），喺BB攰得滯之前就畀佢休息，夜晚亦可以早啲畀BB上床就寢（以6-8時內為佳）。

BB得到充分休息，睡眠時間及長度就會漸漸鞏固。

喺倒退期過去後，你就應該檢視BB嘅入睡方式。

當BB喺6個月大後習慣咗奶睡或搖睡，每次夜醒都會需要同樣嘅協助至能夠瞓得返。

所以，你必須問問自己係咪願意繼續抱睡或奶睡落去，再決定係咪有需要作出改變。

至於另外4次睡眠倒退期，你可以用以下方式去處理：

• 給予BB所需要嘅安撫，但應避免養成無法長期維持嘅睡眠習慣 – 你可以多啲抱住BB，令佢覺得舒服安心一啲，但唔好喺呢個時候開始抱睡搖睡睡嘅習慣呀！如果BB已戒奶咀，亦唔好再塞畀佢啦！

• 輕微調整作息時間表 – 如果BB需要掙扎好耐至瞓得著，你可以早啲放BB上床，補回小睡不足或半夜經常醒來而失去咗嘅睡眠時間。

• 定立睡前儀式 – 睡前儀式能給予BB安全感，幫助入睡。
伸延閱讀 👉 用睡前儀式營造安全感

• 尋求/接受幫助 – 如果你覺得無法再支撐下去，請務必搵屋企人或朋友幫忙，無論係照顧BB，或打掃煮飯等家務都好。睡眠不足唔單止損害身體健康，亦會對情緒及親子關係造成影響…