BB冇乜安全感，抱住至得，一放低就喊

「我bb一出世已經好冇安全感，一定要抱住至得，一放低就喊。究竟抱唔抱好？抱驚佢會慣咗，唔抱又驚佢覺得冇人理佢...」

喊 = 冇安全感？

BB喊係正常嘅，育兒專家普遍同意，哭泣係BB嘅基本溝通行為，以表達佢哋嘅需要同感受。

覺得BB因為冇安全感而喊，呢點我認為係作為父母我哋自己嘅projection區多，係我哋形住bb成日喊，梗係覺得唔開心，覺得冇安全感。

其實，正正相反。

英國精神病學家、發展心理學家John Bowlby所創立嘅依附理論，將小朋友同父母嘅關係分成4種。

安全型依附（Secure attachment）嘅小朋友喺主要照顧者離開時會喊，當主要照顧者返嚟時，佢就會即刻靠近尋求安撫。

所以，如果你BB好痴身，令你一步都行唔開，其實正正係BB喺你身上建立咗足夠安全感嘅證明！

我哋嘅行為，對BB嘅習慣有絕對性影響，佢對世界嘅認知，生活作息嘅習慣，都受我哋嘅行為，同埋回應方式所影響。

平時bb清醒時，你會唔會不斷同佢有互動，諗住可以刺激吓佢嘅大腦同身體發展？

係咁佢習慣咗得到你100%嘅專注，當你想行開飲啖水或去toilet，佢當然唔會願意自己玩啦！

除此之外，不斷嘅互動，仲有五顏六色會發光發聲嘅玩具，對bb大腦都會有好大刺激，玩緊時冇嘢，一停就會因為佢大腦呢個時候已經overload而大喊。

重有最重要但經常被忽略嘅一點：BB會唔會係長期瞓得唔夠／唔好，所以疲勞過度好辛苦而喊呢？

瞭解BB嘅真正需要BB喊係正常嘅，但原因可以有好多，如果每次喊我哋唔理乜嘢原因，淨係諗住抱佢抱到佢唔喊為止，咁唔單止無法回應到BB真正嘅需要，而且亦會令BB以為，無論咩事都係用抱嚟解決。

要強調一點，我並唔係話BB喊唔應該抱，但抱唔應該係第一個動作。例如，當你放低個BB落地，佢會喊係可能因為唔習慣，又或者係攰得滯要你抱住安撫。

搵出BB喊嘅原因，至係令大人同BB都開心啲舒服啲嘅做法啦！