點解睡眠訓練唔work?
好多人誤以為「自行入睡」 係萬能嘅，可以解決所有睡眠問題。
於是，有啲媽咪爹哋諗住「 狠心」 由得BB喊就得。殊不知，喊咗成個月，BB識得自行入睡，但仍然會夜醒大喊
同時，好多人亦冇諗過，睡眠訓練係有可能會「失敗」 。又或者話，因為BB一直大喊，媽咪爹哋唔「忍心」 ，於是頂唔住只好「放棄」...
其實，睡眠訓練唔應該要「狠心」同「忍心」㗎！
呢個星期，我會同大家拆解有關睡眠訓練嘅種種誤解。
今日先講講，點解BB會一直大喊唔停，令睡眠訓練未能達到預期效果。
1. 喺錯誤嘅時候開始睡眠訓練
初生BB嘅睡眠周期發展仲未成熟，而且亦未完全掌握到自我安撫入睡嘅能力。所以，企圖喺BB未滿4個月前就進行訓練，希望BB能夠自行入睡或瞓過夜的話，只會吃力不討好。一般建議等BB滿6個月大至進行睡眠訓練，能有更大成效。此外，亦應避免喺小朋友啱啱開始學行，或喺戒片期間開始訓練，因為呢啲重要嘅發展里程碑，好多時都會對睡眠質素造成影響。
2. 未有合適嘅睡前儀式
睡前儀式能幫助BB轉換狀態，令佢哋明白到，喺做完呢幾件事之後，就係時候瞓覺。所以，如果你喺囝囝囡囡玩到興奮嘅時候，突然熄燈要佢瞓覺，咁佢哋當然唔願意合作，抗議大喊唔肯瞓啦！
3. 無穩定嘅就寢時間
規律嘅作息時間，能穩定生理時鐘。為BB定一個穩定嘅就寢時間（相差盡量喺30分鐘內），BB到時到候自然有睡意想瞓覺。而當小朋友嘅就寢時間飄忽不定，佢哋就可能會大吵大鬧拖延住，唔願意去瞓覺嘞...
4. 錯過畀BB入睡嘅關鍵時間
好多人以為，放晒BB啲電，就會更容易入睡，呢個誤解害咗好多家庭... 越細嘅BB，能支撐嘅清醒時間就越短。當佢哋攰要瞓時但又冇得瞓，清醒時間超過身體負荷， 就會令大腦分泌壓力荷爾蒙，令BB想瞓都瞓唔到，好辛苦於是爆喊。就算最終攰到斷電，睡眠品質亦唔會好，好易半夜驚醒。
5. 未能保持一致性
呢個係睡眠訓練唔成功嘅最主要原因。三更半夜大家都攰，自然好想BB快啲瞓返，於是立即飛撲埋去抱睡奶睡，甚至抱上大人床。咁樣做，就等如話畀BB聽，只要佢半夜大叫，媽咪就會嚟抱佢或餵奶，慢慢就會失去意慾自己瞓返...
要成功令你囝囝囡囡自行入睡，唔能夠單單盲目跟隨一兩種睡眠訓練方式。
聽日再同大家講講，應該點樣決定用邊種睡眠訓練方式。
