點同仔仔解釋，佢需要學自己瞓覺？

如何向3歲小朋友解釋，他需要開始學自己瞓覺，但爸媽可以喺隔離房一齊瞓？

要改變一直以來嘅習慣，並非易事。與其直接話畀小朋友聽要佢自己瞓，不如試試同小朋友一齊坐低傾吓，聽吓佢有咩諗法先啦！

《溝通解難五步曲》

先揀定一個大家都能夠輕鬆平靜嘅時間，再進行以下呢5個步驟，一齊去搵出問題嘅解決方法。

1. 請小朋友形容佢嘅感受及需要

2. 再形容你自己嘅感受及需要，或問題所在

3. 共同提出各種解決嘅辦法

4. 用紙筆寫低所有諗法及意見，唔好加任何評語

5. 一齊決定採取邊個做法

• 聆聽孩子，尊重孩子

第1個步驟，係請小朋友講吓點解佢仍然想同媽咪一齊瞓。

因為，咁樣至會令小朋友覺得自己嘅諗法及感受被尊重。如果你一開始就提出問題，或者淨係掛住講你自己嘅需要，要求小朋友去配合你，其實佢並唔會留心去聽你講，甚至直接shut down唔想再傾落去。

• 開放接納所有意見

第3同第4個步驟，其實係一齊進行嘅。

當你哋各自表達咗自己嘅諗法同感受之後，就可以用紙筆寫低所有建議。就算你明知小朋友所提出嘅方法唔work，或者甚至佢一開口就話「唔得，我要同媽咪一齊瞓」，都照樣寫低，唔好畀任何評語或作出批評。

因為，如果你咁快就拒絕佢嘅建議，佢就會覺得你其實唔係真係想聽佢講，而只係想佢聽你嗰套，跟你所講嘅嘢去做，冇尊重到佢嘅感受同需要。就算之後揀定咗個解決方法，佢都未必肯合作，因為佢冇動力去改變，同埋缺乏參於其中嘅感覺。

• 尋求共識

同小朋友合作，一齊尋求共識。你會發現，當小朋友見到你放棄咗控制佢哋嘅諗法，並且願意聆聽佢哋嘅觀點同建議時，你哋之間嘅親子關係就會變得輕鬆好多㗎嘞！

☆☆☆

嬰幼兒睡眠顧問 Catherine

全港首位本地嬰幼兒睡眠顧問 ‧ RIE育兒法專業課程畢業生 ‧ 孖仔媽媽

網上課程 / 電話諮詢 / 免費資源分享

安全睡眠ABC