農曆新年有家庭聚會，點處理好?

「下星期就係農曆新年，今年未必會周圍去拜年，但同屋企人食團年飯點都要嘅！

問題係，BB平時習慣6-8pm瞓嘅話，咁點算好呢？」

可以嘅話，喺自己屋企食，夠鐘就帶BB入房瞓先，然後大人至食飯，咁當然最理想（一向瞓得OK嘅話，入睡後頭幾個鐘係深層睡眠期，噪少少都唔太易醒嘅）

又或者睇下食lunch得唔得，日頭瞓少咗最多夜晚早啲瞓補返。

如果以上兩個方案都唔work嘅話，都有幾點可以做：

首先，最好晏覺瞓長啲，如果平時係叫醒嘅，咁可以由得佢盡瞓，咁夜晚或者可以頂耐少少。

當然，BB幾點起身比較難控制到，所以可以嘅話，帶張網床或BB車去畀佢照返平時嘅時間瞓就最好。

記得做返全套睡前儀式，換定睡衣，睡眠環境盡黑，用開白噪音就帶埋去，有需要可以推BB車用搖晃嘅感覺幫佢入睡。

之後搭車返屋企時好易會瞓咗，呢個時候要有咁輕手得咁輕手，返到屋企仲瞓緊千祈唔好叫醒佢嘞，直接放床就得，整醒佢你會好大鑊

當然，去咗街唔沖涼，好多媽咪未必過到呢個心理關口...

可以問吓借個浴室幫BB沖完至走，或者走前抹乾淨對手同換定衫，冬天BB著到成隻糭咁，受污染範圍應該有限嘅（記得戴埋帽 ）

大時大節，作息受影響在所難免。最重要係緊守底線，做返一向以嚟嘅處理方式，同埋第二日就跟返足個時間表，唔好諗住琴晚瞓少咗，今日就畀佢瞓晏啲，否則生理時鐘亂晒會更大鑊

不過講到尾，做定心理準備就好，唔好畀自己太大壓力。有可能會夜醒，但一向係自己瞓嘅話，畀返空間佢自己瞓返就得。一向瞓得夠嘅話，一日半日唔跟時間表影響不大嘅，放鬆啲好好食餐飯啦！