你知道BB喊嘅真正原因嗎？

BB雖然未識得講嘢，但都一樣有自己嘅思想同感受，而且會好想話畀我哋知。

問題係，我哋未必識得聽...

又或者，我哋甚至冇諗過去理解BB想表達嘅意思... （嘗試去理解，唔係你「覺得」喎 ）

正常嘅，冇人鍾意聽BB喊，尤其是當嗰個係自己囝囝囡囡，我哋好自然會覺得，佢喊就要幫佢，令佢停止唔再喊...

但你有冇諗過，其實BB喊，係想同你表達一啲嘢，而唔係想你停止佢嘅淚水呢？

試諗下，當你想同你嘅家人/朋友講你諗緊嘅嘢，但佢哋未聽你講完，就話「我知，我明，你想xxx嘛，得㗎嘞，唔駛同我講！」

你會有乜嘢感受呢？

其實，除咗肚餓同眼瞓之外，BB其實仲有好多其他嘢會令佢想同你溝通㗎！

例如：

- 太熱/太凍

- 有奇怪嘅氣味

- 太光/突然黑晒睇唔到嘢

- 條片太緊/件衫拮肉

- 姿勢唔舒服

- 有胃氣

- 環境太嘈

- 周圍太多人/畀太多人輪住抱唔鍾意

- 唔想你搖/抱/拍佢

- 玩緊嘅遊戲太大刺激性

- 練習緊新嘅技能，用緊力/未做到有啲炆

- 佢掛住你，想同你講今日發生過啲乜嘢事...

仲可以無限伸延落去㗎！

喊，係BB嘅溝通方式。

嘗試控制住自己想停止哭聲嘅衝動，嘗試去對BB嘅喊聲保持好奇，諗吓佢可能會想同你表達啲乜嘢...

你就會發現，你能夠做嘅嘢，其實遠比「抱」同「餵奶」多好多㗎！