母乳媽媽注定冇覺好瞓?

有媽咪問

囝囝係人奶B，一晚醒4-5次，次次都要啜幾吓至瞓得返... 我已經成年冇連續瞓多過3個鐘嘞...

呢位媽咪，同埋好多同一處境嘅媽咪，你哋真係全宇宙最強呀！我知道有好多親餵嘅媽咪，都想等囝囝囡囡自然離乳，唔忍心見到佢哋喊，唯有辛苦自己做人肉奶咀。

但係，晚晚冇得瞓，日頭囝囝囡囡又勁痴身，根本冇得抖，真係人都癲

有唔少媽咪搵過我傾呢個問題，我嘅建議係...

唔駛戒人奶，但一定要戒奶睡

因為，當小朋友由細到大習慣咗奶睡，佢哋唔知道，亦唔識得用另一種方法入睡。所以，當佢哋半夜醒咗，就算唔係肚餓，都一樣需要啜幾吓至瞓得返。

夜間睡眠非常重要，成晚不斷又瞓又醒，睡眠質素會好差，對小朋友嘅記憶力、學習能力、專注力、行為，以至整體嘅生理及心理發展都會有所影響。

而媽咪冇覺好瞓，個人唔單止攰同冇精神，而且亦會冇乜耐性，好容易會爆，影響到親子關係

咁應該點樣戒奶睡呢？可以有好多唔同嘅方法。

之不過，可以嘅話，我都會建議媽媽餵完奶後，就同BB講早抖，離開睡房，將氹瞓覺呢個咁重要嘅任務交畀爸爸

好多媽咪都有咁嘅經驗：「明明其他人湊住就好地地嘅，一到我手個B就勁扭計」

係㗎，我嗰兩個仔都係咁。我同自己講呢個係囝囝最愛我嘅證明 -- 只有喺你最愛嘅人面前，你至會想嗲佢，同埋放心宣洩自己嘅情緒。

所以，交畀爸爸攪掂，好多時囝囝囡囡會合作好多，投訴抗議完，就會乖乖就範。有好多搵過我幫手嘅媽咪都可以作證，呢招真係work㗎啦！

你都想幫囝囝囡囡戒奶睡？即tag仔仔囡囡嘅爹哋，等佢哋識做啦！

註：記得一定要注意就寢前嘅清醒時間，同埋唔好太夜瞓。因為如果BB攰得滯會勁喊，只有媽咪至會安撫得到㗎（呢個係好常見嘅情況嚟）

神隊友

要培養㗎

畀個機會佢啦

效果或者會意想不到㗎