戒夜奶會令孩子缺乏安全感嗎?

有媽咪問

「睡眠係生理需要但夜奶係安全感，心理需要? 依家越來越多研究指出安全感係可以影響一生，極為重要。點衡量生需要重要過心理需要? 睡眠重要過安全感? 」

呢個問題問得好好，相信好多母乳媽媽都會考慮到呢個問題。

我相信，要從餵母乳中建立健康嘅親子關係，需要雙方你情我願至得。

只要媽咪覺得餵夜奶係ok嘅，咁唔需要理其他人講乜嘢，而繼續餵到自然離乳。

之但係，如果媽咪係喺冇辦法下容許仔仔囡囡隨時開餐，其實有可能會覺得好煩好炆（半夜瞓瞓吓被整醒，心情多數都唔好）。

小朋友對媽咪嘅情緒好敏感，佢哋會sense得到，從而感到不安而需要更頻密地食奶。咁就會形成咗一個惡性循環，令媽咪覺得更加炆憎，甚至開始對餵母乳產生負面感覺。

而且，好多媽咪仍然選擇會同仔仔囡囡同床，仍然留喺仔仔囡囡身邊，可以隨時安撫到佢哋，戒夜奶只係換過一個形式去提供安全感。小朋友感受得到你有幾愛佢，並唔會因為冇得食奶而冇咗安全感。

再者，安全感並非單單話畀仔仔囡囡痴住自己就能夠形成，雙方嘅溝通方式，係咪全心全意咁相處更加重要（quality not quantity）。好多人（甚至餵奶樽嘅爹地）會喺餵奶嘅同時篤手機，冇將注意力放喺仔仔囡囡身上，仔仔囡囡得到嘅只係一對乳房，咁樣又究竟係咪真係提供到安全感呢？

就算仔仔囡囡自己瞓一間房，係咪就代表佢哋冇咁有安全感呢？定係正正係因為佢哋喺日間嘅相處中能夠得到足夠嘅安全感，所以能夠自己喺房一覺瞓到天光唔駛人陪，起身開開心心say hello呢？

所以，我建議媽咪可以首先問吓自己，究竟點解想戒夜奶，有啲乜嘢驅使你產生呢個念頭？會唔會係只喺某啲情況下唔想餵？一或係因為感受到其他人嘅壓力？夜晚媽咪同仔仔囡囡都瞓得唔好成日醒，對雙方以及成家人又會造成乜嘢影響呢？呢幾個問題都需要先處理好。