次次帶佢入都唔肯瞓

有媽咪問

「次次帶囝囝入房準備瞓覺，佢都好興奮唔願瞓咁，可以點做？」

你同囝囝入房之前，會做緊乜嘢呢？

如果你同佢沖涼，呢個應該是令小朋友放鬆嘅活動，但浴室內開晒啲燈勁光，佢又玩水玩到好興奮...

喺客廳，除了天花燈之外，電視係咪又一直開住，甚至小朋友係電視撈飯呢？

咁多燈光，會抑制大腦分泌睡眠荷爾蒙褪黑激素（melatonin ），令小朋友無法感到睡意，自然唔願意睡覺啦！

想囝囝囡囡安穩入睡，就應該盡量令佢哋身處嘅環境，有令人放鬆嘅感覺，等佢哋喺生理及心理上都準備好就寢。

咁並代表要熄晒屋企啲燈嘅，但喺小朋友食完晚飯後，你可以調暗少少啲燈，入睡前2小時亦應該熄咗部電視 ，其他一切如常。

你唔需要強迫囝囝囡囡靜落嚟，你只需要營造合適嘅環境就夠㗎嘞

除此之外，對部份BB/小朋友嚟講，沖涼其實係好刺激嘅活動。喺呢個情況下，最好就將沖涼嘅時間提早。

最後，精神亢奮，唔願瞓覺，並非因為小朋友唔夠攰。其實呢個反而係疲勞過度嘅跡象嚟！當你見到佢終於肯停落嚟，往往已經太遲啦