為幼兒戒夜奶
《為幼兒戒夜奶》
「餵哺母乳，係媽咪同囝囝囡囡最親密嘅時光。」
好多媽咪都非常享受同囝囝囡囡緊緊相擁嘅感覺，會畀佢隨時「開自助餐」。
只不過，當囝囝囡囡已經歲幾兩歲，半夜仍然醒幾次要食奶至肯瞓返，就令到唔少媽咪頭痛不已。
我相信，要從餵母乳中建立健康嘅親子關係，媽咪同小朋友都應該尊重彼此嘅意願。
充足睡眠係一種生理需要，就算係全職媽咪亦有權瞓得好。
如果媽咪唔希望每晚醒幾次餵奶；如果媽咪希望囝囝囡囡能夠一覺瞓到天光；如果媽咪日間嘅精神受夜奶所影響，咁我會支持媽咪為囝囝囡囡戒夜奶。
其實從生理上而言，幼兒最多去到1歲就已經唔再需要半夜食奶，可以連續瞓到11-12個鐘。1歲以上嘅幼兒半夜醒咗要奶，只是一種自少養成嘅習慣。因為佢哋除咗啜住奶之外，就唔知道原來有其他方法可以重新再瞓返。
咁應該點樣戒夜奶呢？
